Македонија

Тендерот за патиштата ќе се отвори на 20 мај

среда, 05 мај 2010, 17:13Реализацијата на проектот за изградба на нови 380 километри автопат низ земјава ќе започне најрано на средината на наредната година. По неколку одложувања на 20 овој месец властите ќе ги отворат понудите на заинтересираните компании кои во замена за инвестицијата ќе ги добијат автопатиштата на концесија од 35 години. Премиерот Груевски изјави дека станува збор за проект вреден околу 1,2 милијарди евра. Според него, станува збор за макотрпен процес, а имало доста заинтересирани компании.

Елена Костовска

Слабиот интерес за изградба и за стопанисување со македонските патишта по третпат го продолжува рокот за доставување понуди, предупредуваат упатените. Тие како причина ги наведуваат големината на проектот, кој е со мала заработка, како и односот на Владата кон странските инвеститори. Стручњаците сметаат дека Владата здобила лоша репутација зашто не го почитува договореното и ги брка странските вложувачи. Министерството за транспорт и за врски донесе одлука место до четврти април, заинтересираните компании да можат да ги достават понудите за јавниот оглас за давање под концесија на патните правци до четврти мај. На јавниот оглас, распишан во ноември минатата година, под концесија на 35 години се даваат патните правци по Коридорот 8 поделени во два пакета, источна и западна концесија. Во концесијата се вклучени и патишта што се веќе изградени, како што е обиколницата околу Скопје и автопатот Скопје - Гостивар и патни правци што не се дел од Коридорот 8, како што е патот Кочани - Штип. Концесионерот ќе има обврска во рок од осум години да изгради автопат, а во наредните години ќе треба да ги одржува патиштата и да наплатува патарина.
Во Министерството за транспорт и за врски тврдат дека рокот за доставување на понудите е продолжен за да им се овозможи на заинтересираните компании да ја комплетираат потребната документација за јавниот оглас. Ова е трето одложување од истата причина.
- Постои голем интерес од сите реномирани големи странски компании што може да се јават на тендерот за избор на концесионер за изградба на патиштата во Македонија. Се работи за голема инвестиција од околу една милијарда евра, така што компаниите мора да направат и свои дополнителни анализи и им треба повеќе време да се јават на повикот - вели министерот Миле Јанакиески.
Според експертот Сем Вакнин, давањето на патиштата под концесија како форма на јавно - приватно партнерство е најупотребуваниот модел на градење јавни објекти, посебно во земјите во развој. Овој модел е препорачан и од Светската банка, а годините на стопанисување со патиштата се движат од 15 години во развиените земји, до 75 години во некои земји во Африка- Концесија од 35 години е разумно за Македонија, но никој не сака да соработува со македонската Влада зашто овој временски период значи дека треба да се венча со неа. Необично во овој јавен оглас е што се даваат и патишта што се веќе изградени - вели Вакнин.
Според поранешниот министер за транспорт и за врски Џемали Мехази, многу е важно за развојот на земјата да се завршат коридорите 8 и 10.
- Ова е голем проект, кој како идеја постои одамна и јас, во принцип, го поддржувам. Завршувањето на коридорите е од голема важност за економијата на земјата зашто овозможува поврзување со другите земји и излез на море. Секој ден доцнење е загуба за Македонија - вели Мехази.
Сепак, тој додава дека не е сигурен дали е одбран најдобриот начин за нивно завршување зашто вклучувањето на правците што не се дел од Коридорот 8 може сериозно да го намалат интересот на странските компании поради нивната помала исплатливост.                                                                                                                                             http://www.vreme.com.mk/DesktopDefault.aspx?tabindex=2&tabid=1&EditionID=1986&ArticleID=137786 

ПОСТАПКАТА ЗА КОНЦЕСИОНЕРСТВО НА ПАТИШТАТА ПОВТОРНО ПРОЛОНГИРАНА

Место 4 април, доставување понуди до 4 мај

Од Транспорт велат дека новото одлагање за нови 30 дена на стартот на концесионерската постапка за патиштата е со цел да им се излезе во пресрет на заинтересираните понудувачи навреме и квалитетно да ја комплетираат потребната документација

Министерството за транспорт и врски по трет пат го пролонгира рокот за отпочнување на постапката за доставување барања за добивање концесии за изградба, реконструкција и наплата на патарина на дел од патната мрежа во земјава. Место 4 април, вчера Министерството јавно објави дека го пролонгира рокот за доставување понуди за доделување на концесии за патната мрежа долж транспортниот Коридор 8 за нови 30 дена, односно до 4 мај.
Според информациите од Министерството за транспорт и врски, и ова ново одлагање е со цел да им излезе во пресрет на заинтересираните понудувачи навреме и квалитетно да ја комплетираат потребната документација за добивање на патна концесија во државава.
-Пролонгирањето е по барање на заинтересирани компании кои сметаа дека им треба повеќе време за да ја комплетираат документацијата - вели Драган Симоновски, портпарол во Министерството за транспорт и врски.

Токму поради тоа, се врши измена и на документацијата за доставување барања за учество во првата фаза од постапката (претквалификација на кандидатите), а која може да се подигне во ресорното Министерство. Со тоа, заинтересираните компании, потенцијални патни концесионери во земјава, наместо 143 дена, колку што имаа досега, сега имаат вкупно 173 дена да се вклучат во овој мегапроект, тежок околу една милијарда евра. Истовремено, тоа ќе повлече и продолжување и на рокот за доставување понуди во втората фаза на постапката за воведување на концесионерството во изградбата, реконструкцијата и наплатата на патарина на дел од патната мрежа во земјава, а ќе се пролонгира и рокот за спроведување на целокупната постапка за доделување на патните концесии, што досега се проценуваше на најмалку една година.

Министерството за транспорт и врски во средината на ноември 2009 година, објави јавен повик за прибирање понуди од заинтересирани компании или конзорциуми за давање под концесија на два пакета веќе изградени, но и нови патни правци по трасата на Коридор 8. И тоа, Источен, во должина од 177,5 километри и Западен со вкупно 196 километри. За источната концесија беа понудени патните правци: Крива Паланка-Романовце, Кочани-Штип, Миладиновци-Штип, Миладиновци-Скопје и обиколницата на Скопје, во вкупна вредност од 434 милиони евра, а за западната концесија: Стенковец-Блаце, Гостивар-Ќафасан, Требениште-Охрид, Струга-Подмолје и Гостивар-Тетово-Скопје, во вредност од 558 милиони евра.

Според јавниот повик идните концесионери ќе имаат обврска да ги (до)изградат и реконструираат предвидените патни правци за најмногу осум години, а потоа со нив да стопанисуваат 35 години, но и истовремено и да ги одржуваат и да наплатуваат патарина. На иницијалниот повик за пројавување интерес за овој голем инфраструктурен зафат, дури 48 странски и домашни компании првично пројавија интерес.

Светлана БЛАЖЕВСКА
http://www.vecer.com.mk/?ItemID=FCC18056EA91954F9FBDC485B213D444