Бизнис центар Меги (Synergy Business Center)

Повредени четворица градежни работници во Скопје

Четворица градежни работници се повредени по уривањето на бетонската плоча на зграда во изградба, вчеравечер нешто по 23 часот.

Според првичните информации, работниците се здобиле со скршеници по телото и екстремитетите и нивната состојба е стабилна.

Работеле на бизнис центарот „Меги“ во скопски Аеродром, на улицата „Владимир Комаров“, зад училиштето „Браќа Миладиновци“.

Неофицијално, се шпекулира дека вчеравечер градежните работници ја полнеле плочата со бетон, по што таа се урнала. Екипи на противпожарната единица и брза помош веднаш пристигнале на местото на несреќата.

Повредените работници од под урнатините ги извадиле нивните колеги. Веднаш се префрлени во болница. Никој од учесниците во градбата не сакаше да го коментира уривањето.

Дежурните доктори во ургентниот центар одбија да зборуваат пред камера за состојбата на повредените.

Увидните екипи на местото на настанот забранија приближување до спорниот објект.

Се гради македонско- бугарски бизнис-центар „Меги“

Инвеститори се македонско- бугарска компанија „Медија инвестмент“ и Зоре Темелковски

Бизнис-центар според европски стандарди ќе биде изграден во Општина Аеродром за приближно една година. Инвеститори се мешовитата македонско-бугарска компанија „Медија инвестмент“ и македонскиот бизнисмен Зоре Темелковски, кои ќе вложат 10 милиони евра. Мнозински сопственик на компанијата е семејството Бузарови, кое во Бугарија се занимава со градежништво.

Објектот „Меги“ ќе биде деловен центар со површина од 10.000 квадратни метри со два ката под земја, приземје и четири ката, каде ќе се сместат голема конференциска сала и паркинг- простор. Проектот е на италијански проектант познат по идеите за луксузни бизнис- центри. Македонскиот центар ќе биде опремен според европски стандарди и ќе се рангира во А- категорија, со посебна климатизација, освежување на воздухот, дупли електростатски подови, висина на катовите од 3,5 метри и други карактеристики. Објектот ќе го гради домашната компанија „Зам инженеринг“.

Македонскиот инвеститор Темелковски, кој во инвестицијата учествува со 49 проценти, најавува соработка со кредитни линии од домашни банки. Засега не се знае дали деловниот центар по завршувањето на изградбата ќе се издава, или ќе се продава. Таа одлука ќе биде донесена во јули на собрание на холдинг-компанијата.

„Центарот ’Меги’ е првиот бизнис-објект кој ќе се гради според проект направен според европски стандарди. Планирано е да се гради една година, а до јуни треба да биде готова карабината. Во објектот ќе има поголем дел деловни локали за кои во иднина ќе се одлучува дали ќе се издаваат, продаваат или пак објектот ќе се продава во целина. Заинтересирани партнери има за сите опции“, вели Темелковски. (С.Н.)