Вода во темелите поткопува зграда

Извесен Тони Велјановски сакајќи да направи доградба на зградата ги раскопал темелите во длабочина од 2,5 метри, кои сега се полнат со вода затоа што изградбата е стопирана, а објектот не е вратен во првобитната состојба

Зградата на улицата Никола Тесла 8 во Карпош 3, изградена пред земјотресот, е во опасност. Тони Велјановски, кој се јавува како инвеститор, сакал да направи доградба на зградата, поради што ги раскопал темелите во длабочина од 2,5 метри за да изгради високи столбови. Станарите се исплашени дека објектот ќе претрпи многу голема штета, бидејќи во дупката кај темелите се собира вода од врнежи. Градилиштето е затворено, односно надградбата е стопирана, а ниту општината ниту инвеститорот не преземаат ништо.

Освен поткопаните темели, станарите ги загрижува и тоа што не е испитана статиката околу можноста за градење на надградба врз двата влеза.

- Зградата е нестабилна и одамна тоне в земја. Тоа е случај со многу згради во Карпош, поради подземните води - велат станарите.

Инвеститорот Велјановски, по налог на Општината, пред некое време ги прекинал градежните активности, но не го вратил теренот во првобитна состојба, како што му било наложено. Во Општина Карпош велат дека градбата ја прекинале затоа што ја преиспитуваат легалноста на издаденото одобрение за градба.

- Во тек е управна постапка за преиспитување на одобрението за градење на надградбата. Издадено е решение со кое се одложува дејството на претходно издадената градежна дозвола. Поради тоа, при почнувањето на градежните активности на 29 октомври, градежната инспекција направи увид и на инвеститорите им врачи решение за запирање на градбата. При повторниот увид активностите не беа прекинати, а градежната инспекција го затвори градилиштето. Деновиве е изготвено и решение за отстранување, и понатаму ќе постапуваме согласно законската регулатива - изјавија од Општина Карпош.

За овој случај се пишуваше и пред неколку месеци. Одобрението за доградба беше издадено во мандатот на в.д. градоначалникот Сашо Димиќ, во екот на изборите во март годинава. Дел од станарите тогаш тврдеа дека не ставиле потпис за изградба на потпокривот. Тие од надлежните добиле фотокопии за платени комуналии и останале вџашени кога виделе дека парите се уплаќани на нивно име без да знаат.

- Потписите на уплатниците не се наши и речиси сите се иницијали. На некои уплатници како градители се водат и починати лица, наши поранешни соседи - тврдат станарите.

На незадоволните станари не им била оставена можност за жалба, напротив одобрението станало правосилно неколку дена по издавањето.

Надлежните под знак прашалник го ставија и квалитетот на приложената студија за статика, со што стана оправдан стравот на станарите за стабилноста за зградата. Освен раскопаните темели, статиката според станарите е нарушена одамна и поради некои нивни соседи кои пробиле влезови на првите катови, при што урнале некои столбови.

Тони Велјановски се појавува како инвеститор на сомнителна надградба и на зграда на улицата Даскал Камче. Тој случај го обелодени градоначалникот Стевчо Јакимовски и одобрението падна на Управен суд.

Обвинителството прифатило две пријави за Димиќ

Општина Карпош во изминатите месеци поднесе 14 кривични пријави против бившиот в.д. градоначалник Сашо Димиќ. Повеќето се однесуваа за злоупотреба на службена должност, како и за оштетување на Општината. Од Карпош велат дека обвинителството досега прифатило две пријави, но не кажаа за што се однесуваат.

- Пријавите се процесуирани. За таа цел наши претставници од Општината беа повикани да дадат изјава во МВР и на суд - изјавија од Карпош.

По доаѓањето на Јакимовски на чело на Општината и неколку службеници од Секторот за урбанизам заработија кривични пријави за злоупотреба на службената позиција.

Роза Петкова


Граѓанин нелегално си направи паркиралиште врз зелените површини и дворните места пред нашите згради и наплаќа по 40 денари за паркирање. На празниот простор што никој не го користеше сега имаме прометен паркинг-простор, секојдневно под прозорите ни поминуваат автомобили и се задушуваме во прав и во издувни гасови, се жалат станарите од зградите на улицата 191, зад продавницата „26 јули“ на Бит-пазар. Тие тврдат дека самопрогласениот газда на истото место издава две напуштени магацински простории како веце, но и за складиште, каде што на дивите продавачи од пазарот за 20 денари им ги чува картонските кутии на кои ја редат стоката. Ова не е единствениот случај незаконски да се узурпираат слободните површини за паркиралишта. Иста е состојбата и со просторот пред зградите зад трговскиот центар „Мавровка“, каде што на диво се поставени рампи, а тие што наплаќаат не издаваат фискални сметки, туку парагон-блокчиња. Наспроти нив, преку уличката работи паркиралиштето на ЈП „Градски паркинг“, кое има овластување од Град Скопје. За нередот што владее на овие простори, кои некои самоиницијативно си ги претвориле во паркиралишта, никој од локалните власти не сака да преземе одговорност. Напротив, тие вината ја префрлаат од една на друга институција. Од Општина Чаир, каде што всушност и припаѓаат овие простори, тврдат дека не се одговорни за дивите паркиралишта. - Во тој дел од градот надлежност имаат Министерството за култура, заедно со Град Скопје зашто тоа е контактната зона на чаршијата. Ние тука немаме никакви ингеренции, сите ни ги зедоа со Законот за старата чаршија. За паркирањето, исто така, не сме надлежни, прашајте ги „Градски паркинг“ - вели Омерфејзи Билали, раководител на секторот. Од Град Скопје го тврдат спротивното, Општината била одговорна затоа што за просторот имало детален план. - Нашата инспекција реагираше по приемот на дописот од станарите на улицата 191 и утврди дека посочениот паркинг-простор е на површина регулирана со ДУП, за која е надлежна општинската комунална инспекција во Чаир. Истото се однесува и за сите други површини во близина на Бит-пазар, каде што нашата инспекција не може да реагира бидејќи просторот е во надлежност на Општината - одговараат градските власти. Во меѓувреме, додека надлежните не реагираат и оставаат нелегално да се узурпираат јавни површини, дивите паркиралишта непречено работат на штета на граѓаните. Работата им оди непречено и со добра заработувачка бидејќи на овие многу фреквентни места близу ТЦ „Мавровка“ стотици скопјани секојдневно ги оставаат возилата. За парите што ги даваат за паркирање добиваат само парагон-блокче од луѓето што ги креваат рампите за минување. Невообичаено е што на ова не реагира ни полицијата. И во СВР Скопје тврдат дека не можат да преземат ништо за дивите паркиралишта околу „Мавровка“, доколку не добијат барање од Градот и од Општината. - За паркиралиштата во Скопје надлежни се општинските и градските инспектори. СВР Скопје може само да даде асистенција доколку тоа го побараат Општината и Град Скопје - вели Лиза Бендевска, портпаролка на скопската полиција.

„Срамстор“

Марија Тасев

Вчераутро на Плоштадот Македонија немаше ниту еден фрижидер за сладолед. Комуналните инспектори на Град Скопје проверувале кој од нив има дозвола за работа по што на сопствениците им издала налог веднаш да ги отстранат ладилниците.
- Акцијата на градските инспектори за отстранување на фижидерите од Плоштадот е во рамките на тековните активности на инспекторатот. Фрижидерите се отстранети затоа што ниту еден од нив немал одобрение за поставување на опрема на јавна површина -информираат од Град Скопје.
Оваа акција вчера ги исплаши и дивите препродавачи од Камениот мост и пред Градскиот трговски центар. Нивните импровизирани тезги за чудо ги немаше до попладнето иако за нивно отстранување (бидејќи се работи за недозволена трговија) надлежен е Државниот пазарен инспекторат.