Зонско паркирање во Скопје

ЦЕНТАР ВОВЕДУВА САМОНАПЛАТА

Билети и кусур од паркомати

На локациите со кои стопанисува општинското претпријатие на Центар „Паркинзи“ нема да се плаќа со СМС-порака, туку само со припејд-картичка или во кеш

На општинските паркинзи во Центар, Kапиштец, Дебар Маало од септември ќе почне да функционира системот за електронска наплата преку паркомати. Тие ќе бидат поставени кај влезните рампи, а ќе функционираат по системот на самонаплата, со монети или со хартиени пари, но и со припејд-картичка која ќе се надополнува во трафиките, слично како онаа за мобилни телефони. За оние што ќе користат кеш, автоматот ќе враќа и кусур. 

Од општинското претпријатие „Паркинзи“ објаснија дека овој нов систем, кој во Македонија се воведува првпат, ќе важи само на локациите кои се под нивна надлежност. Додека, пак, на паркиралиштата на „Градски паркинг“ возачите и натаму ќе може да плаќаат со СМС-порака. Според надлежните, се одлучиле за овој начин за да ги лишат граѓаните од дополнителни трошоци кои сега ги издвојуваат со испраќање СМС-порака - 5 денари на почеток и уште 5 денари на крај.

Паркоматите личат на куќарки од затворен тип, а такви се за да се заштитат од временски влијанија. Иако не се во функција, граѓаните од наведените населби веќе може да ги видат на локациите со кои стопанисува општинското претпријатие „Паркинзи“. 

Повеќе детали за новиот систем за наплата, од претпријатието рекоа дека ќе обелоденат наскоро, а за време на летните одмори ќе спроведат кампања за едукација на возачите. Исто така, вработени од претпријатието, на самото место ќе им објаснуваат на граѓаните како да ги користат нивните услуги во иднина. 

За жителите од Центар ваквиот начин на наплата нема да значи никаква промена. Ќе продолжат да користат месечни повластени билети по цена од 250 денари. И тоа за два автомобила, а претходно беше 850 денари. 

Таква одлука неодамна донесе Советот на Општина Центар, откако локалната власт прифати да го субвенционира своето општинско претпријатие. (А.А.)

ОПШТИНСKАТА ФИРМА „ПАРKИНЗИ“ ЈА ОKУПИРА СЕKОЈА ПЕДА

Зонското паркирање што го воведе општинското претпријатие на Центар - „Паркинзи“ им ги истенчи нервите на скопјани. Откако пред два месеца оттаму најавија дека ќе почнат со обележување на повеќе улици во нивна надлежност, може да се видат работници како наплатуваат дури и за места што не се означени. Им приоѓаат на возачите и им нудат билети по цена од 40 и 50 денари. На оние што се паркирале, а не платиле, им бараат на увид билет и притоа им се закануваат со казна од 1.200 денари. Поради нејасниот начин на наплата, а некаде немањето прегледни знаци, често избиваат караници. Вакви жешки ситуации се најкарактеристични за сервисните улици во Kапиштец и Дебар Маало. 

- Автомобилот го паркирав до гаражите на зграда на улицата Kозара во населбата Kапиштец. Станарите ми кажаа дека тоа е нивен паркинг, а од друга страна, местото не беше одбележано. Kога се вратив на стаклото имав известување дека треба да платам казна од 1.200 денари. Воедно и дека возилото е непрописно паркирано, бидејќи зафаќа повеќе од едно паркинг-место. Се прашувам како може на необележано паркинг-место, на локација која не е на општинското претпријатие да се наплаќа за паркирање!? Нема ли за тоа сообраќајна полиција и „Пајак-служба“?- раскажа скопјанката Татјана Д.

На самото место веднаш дошол контролорот, кој и рекол да плати 40 денари за час, а доколку одбие - дома ќе ~ стаса казна - а тоа се 1.200 денари дневен билет, кој потоа може да го користи цел ден на сите паркинзи што се во сопственост на претпријатието.

Истото ова ~ се случило и на Марија Младенова, која била паркирана на тротоарот кај „Жито лукс“ во Kапиштец, каде што со години локацијата служи за таа намена. Тврди дека немало никаков знак дека се работи за зонско паркирање. 

- Работникот што дојде ми рече дека доколку не платам 40 денари, ќе ми ја фотографира регистрацијата и така ќе имал доказ за таа наводна казна. Ми издаде и фискална. Ова е невидено самоволие - револтирано изјави граѓанката. 

Наспроти граѓанските поплаки, од општинското претпријатие „Паркинзи“ децидно тврдат дека не наплатуваат за необележани места. За директорката Маргарита Бакев билетот од 1.200 денари не е воопшто таква мерка. Го нарекува „дневен паркинг-билет кој им се издава на оние што немаат валидна паркинг-карта“. 

- Ние не сакаме да внесуваме страв и тензија кај граѓаните. Не сакаме да ставаме блокатори и затоа реагираме на ваков начин. За да воведеме ред во паркирањето, имавме и едукативна кампања која траеше еден месец. Поделивме 5.000 летоци само во Kапиштец за тоа како граѓаните прописно да се паркираат, а и уште 5.000 како да се однесуваат и како да постапуваат на местото каде што се паркирани. Тој дневен билет може да се користи цел ден, во зоната каде што се наоѓа возилото - изјави Маргарита Бакев, директор на „Паркинзи“.

Жешка линија за подигање возило

Општинското претпријатие на Центар - „Паркинзи“ отвори посебна телефонска линија за пријавување несовесни возачи кои освен што се паркираат непрописно, блокираат и други возила. Во вакви случаи, граѓаните ќе може да се јават на телефонскиот број 072-253-253, а автомобилот ќе го подигне еден од двата пајаци на општинското претпријатие, информираше директорката Маргарита Бакев. Таа изјави дека за еден месец, откако функционира овој број, бележат 100 јавувања.

Анела Петрова