Железници (општо)

ЕБОР ЌЕ ИНВЕСТИРА ВО ЖЕЛЕЗНИЦАТА И ЕНЕРГЕТИКАТА

СТАВРЕСКИ - ПОЗИТИВНИ ОЦЕНКИ ОД ЕБОР ЗА МАКЕДОНСКАТА ЕКОНОМИЈА

Бордот на директори на Европската банка за обнова и развој е задоволен од подобрувањето на бизис климата во Македонија и постигнатите резултати во услови на економска криза, а за следната година најавува подготвеност за финансирање проекти во државава.

Тоа го изјави вицепремиерот и министер за финансии Зоран Ставрески по денешната средба со Бордот на директори од ЕБОР.

Според Ставрески, од ЕБОР за следната година изразиле подготвеност за посериозно финансирање проекти во Македонија во износ меѓу 100 и 150 милиони евра. - Разговаравме за повеќе области во кои би можело да се смета на нивна поддршка, пред се во делот на инфраструктурата. Од наша страна беше истакнато барање за поддршка во финансирање проекти како што се гасификацијата и некои други, како и гасната електрана во Скопје, рече министерот Ставрески.

Тој додаде дека било разговарано и за поддршката која ЕБОР биле подготвени да ја дадат во делот на патната и железничката инфраструктура.

- Тие веќе искажаа подготвеност за финансирање од околу 18 милиони евра на ремонтот и реконструкцијата на пругата на Коридот 10, а го отворивме и прашањето на помошта од ЕБОР за Коридорот 8 за железничката пруга кон Бугарија, што е еден од проектите кој би можел во иднина да биде поддржан од Европската банка, изјави Ставрески.

Според него, оценките од ЕБОР се уште една потврда од релевантна меѓународна финансиска институција дека реформите во Македонија се одвиваат добро, а макроекономските политики се солидни.

Одговарајќи на новинарско прашање министерот Ставерски информира дека предлог-буџетот за наредната година е веќе доставен до Собранието, со што се создадени услови да се објави на веб-страницата на Министерството за финансии.

- Имавте можност да слушнете од ММФ и од сите други меѓународни институции што мислат за нивото на буџетскиот дефицит. Тоа од нивна страна беше оценето како соодветно за вакви услови и препораките и на ЕК и на другите релевантни фактори се дека извесна поддршка од буџетските средства треба да се даде на стопанството во овие кризни времиња, а тоа е она што го правиме. На долг рок веројатно е можна една поинаква комбинација на во делот на постепено намалување на буџетскиот дефицит, меѓутоа нагло намалување би било штетно во вакви околности, бидејќи дополително би ја продлабочило рецесијата, потенцираше министерот Ставрески.

Тој најави дека до крајот на годинава, односно во декември ќе има уште една аукција на државни записи.

- Покрај тоа, можна е уште една дополнителна аукција на подолгорочни обврзници трезорски да емитуваме, а има интерес од пензиските фондови за нивно емитување, така да доколку се постигнат услови кои се поволни за државата можно е да одиме на таква аукција, истакна министерот Ставрески.