Во Македонија петта година по ред има вкупно 911 километри магистрални патишта. Од нив, 826 километри се асфалтирани, додека 85 километри се земјени и непросечени

И стари возила и стари автопатишта

Ниту еден километар магистрален и регионален пат не бил изграден во изминативе пет години во Македонија, покажува најновиот извештај на Државниот завод за статистика за транспортот во земјава заклучно со 2010 година. Лани, како и во изминатите години во Македонија имало вкупно 911 километри магистрални патишта. Од нив, 826 километри се асфалтирани, додека 85 километри се земјени и непросечени. Интересно е што, за разлика од магистралните патишта, каде што состојбата не се променила, кај регионалните патишта има намалување на должината. Така, во 2006 година во земјава имало 3.830 километри регионални патишта, а лани 3.771 километар. Ваквата промена најверојатно се должи на промена на категоризацијата на одредена патна делница. Статистичките бројки покажуваат дека најголем напредок има во изградбата на локални патишта. Пред пет години во земјава имало 8.995 километри локални патишта, а лани оваа бројка пораснала на 9.252 километри. Сепак, над 4.000 километри од локалните патишта сé уште се земјени.

Во извештајот се дава и детална слика за тоа какви возила има на домашните патишта. Така, од вкупно 353.028 регистрирани патни и приклучни возила во 2010 година, повеќе од половината, односно 191.610 се произведени до 1997 година. Над 55.000, пак, се произведени од 1998 до 2000 година. Математиката покажува дека речиси 250.000 возила во земјава се постари од десет години. Според извештајот на ДЗС, лани во земјава биле купени само 5.693 нови возила.

По сé почестите сообраќајки, градоначалниците од источна Македонија се „самоорганизираа“ и побараа подобрување на безбедноста во сообраќајот со повеќе мерки, од кои и трета лента на патот Велес - Штип

Најкритично на патот за Штип е кај Крива Круша и кај Сарамзалино

Нови сообраќајници, изградба на трета лента на патот Велес - Штип и подобрување на вертикалната и на хоризонтална сигнализација се мерките што единаесетмина градоначалници од источна Македонија викендов ги побараа по сé почестите сообраќајни несреќи во нивниот регион. Најкритично е на патот Велес - Штип, кај Крива Круша и кај Сарамзалино. За само една недела тука во три сообраќајни несреќи загинаа три лица. Не помалку опасна е и делницата меѓу Штип и Радовиш, на три места, на 23-от, на 25-от и на 29-от километар.

Небезбедните патишта, зголемениот интензитет на сообраќај и честите морничави слики од сообраќајки со жртви ги мобилизираа градоначалниците да се „самоорганизираат“ и да побараат итно решавање на овој проблем. Тие очекуваат итна средба со министерот за транспорт и врски Миле Јанакиевски и со надлежните во Владата.

- Верувам дека со нашата заложба црниот биланс од патиштата во источна Македонија во целост ќе биде избришан - вели Дарко Митевски, градоначалникот на Македонска Каменица.

Дека изградба на трета лента во голем дел може да придонесе за подобрување на сликата со сообраќајните несреќи во Македонија, да ја зголеми безбедноста и да придонесе за подобра комуникација добар пример е реконструкцијата на патот на превојот Плетвар, меѓу Прилеп и Градско.

- По доизградувањето на третата лента на Плетвар, за 70 проценти е намален бројот на сообраќајките.
Исто така, намален е бројот на загинати и на тешко и лесно повредени лица. Од 2008 година наваму, кога беа регистрирани 47 несреќи со тројца загинати и петмина тешко повредени, од година во година бројката на сообраќајки, но и на загинати и повредени перманентно се намалува. Во 2009-та се случија 37 незгоди, во кои имаше двајца загинати и шест повредени, во 2010-та едно лице загина, а пет беа повредени. Годинава во првото полугодие, меѓу јануари и јуни, од 35 несреќи, во една загина едно лице и едно беше тешко повредено, другите беа со материјална штета - ни изјавија од полициската станица во Прилеп, од секторот за безбедност во сообраќајот.

Продолжување на третата лента до Росоман и да се освежат коловозите, бараат и прилепските бизнисмени од Регионалната стопанска комора.

Во Македонија има 169 опасни места по безбедноста во сообраќајот. Од нив, 53 црни точки се на магистралните патишта, 63 се на регионалните, две се на локалните патишта, а 51 се во градовите. Причина за половина од сообраќајните несреќи се тесните и непрегледни коловози и немањето осветлување, раскопаниот асфалт и уништените сообраќајни знаци, непочитувањето на сообраќајната сигнализација.

Статистички, по неприспособената брзина, главните причини за несреќите се непрописното престигнување, непочитувањето на сообраќајните правила и пијаните возачи. Процената на Европската асоцијација за безбедност на патиштата е дека состојбата на патната мрежа во Македонија е алармантна.
Владата пред неколку години најави обнова на постојните 500 километри патна мрежа, како и изградба на една патна лента од магистралниот пат Кочани - Штип - Велес - Скопје, преку Миладиновци. Во меѓувреме, институциите си ги префрлаат надлежностите една на друга. Министерството за внатрешни работи, велат оттаму, ги брои само сообраќајните несреќи и нема евиденција каде и колку лица загинале. Републичкиот совет за безбедност на сообраќајот на патиштата само можел да укаже на недостатоците, а пак од Министерството за транспорт и врски и од „Македонија пат“ изјавија дека прават сé што е во нивна моќ за надминување на ситуацијата.

За шест месеци 1.973 незгоди

Годинава во Македонија, меѓу јануари и јуни, се случиле 1.973 сообраќајки. Во нив 67 лица загинале, додека 3.044 се потешко или полесно повредени. Поголемиот број несреќи се случиле на места што се обележани како црни точки.

Проширувањето на коловозот ги намали несреќите и жртвите на Плетвар