Возен парк (ЈСП - двокатни автобуси)

Елена Мачевска

Министерството за транспорт и врски, по три неуспешни тендери, деновиве распиша нов, во кој ги послуша препораките на ЈСП „Скопје“, па покрај двокатните автобуси ќе набави и обични. Уште од самата најава на Владата дека ќе бидат купени двокатни автобуси, доброупатените ги предупредија надлежните институции дека улиците како што се направени во моментот во Скопје не се соодветни за по нив да сообраќаат толку високи возила.
Од Министерството за транспорт и врски објаснуваат дека условите во новиот меѓународен тендер се направени врз основа на искажаните потреби на ЈСП „Скопје“. Со тендерот треба да се купат 202 двокатни и 100 обични автобуси, од кои 80 единечни, четири зглобни и 16 минибуси.
- Целта е целосно да се обнови возниот парк на ЈСП „Скопје“, а со тоа и да им се овозможат подобри услуги на корисниците на јавниот превоз, како и намалување на сообраќајниот застој – тврди Драган Симоновски, портпарол на Министерството.
На три линии, кои во моментов ги опслужува ЈСП „Скопје“, не би можеле да се користат вакви автобуси. Поради висината на возилата, пречка се надвозниците во општините Кисела Вода и Бутел, како и подвозникот во Градскиот трговски центар. Дополнителен проблем е и светлосната сигнализација по скопските улици, која треба да се приспособи за превоз на патници на две нивоа, но, исто така, и недоволната обученост на возачите да возат двокатни автобуси.
Според надлежните од ЈСП „Скопје“, ќе треба да се издвојат дополнително пари за нивна обука, која најверојатно ќе мора да се изведува во странство.
Од директорот на Јавното сообраќајно претпријатие Александар Бошковиќ, и покрај многубројните инсистирања од наша страна, божем поради презафатеност, не добивме одговор што се било побарано од надлежното Министерството, ниту што ги натерало да ги сменат условите во конкурсот дури по три неуспешни тендери.
Првиот јавен оглас пропадна затоа што ниту една фирма не понуди изглед на автобусите како тие што се користеле во минатото во Скопје. Вториот тендер се поништи со образложение дека ниту една од компаниите не доставила банкарска гаранција, освен словенечката компанија која излезе од игра поради превисоката понуда од 111 милион евра за производство и испорака на 302 двокатни автобуси.
На третиот тендер, пак, пристигнаа понуди од четири заинтересирани фирми, турската „Гулерјуз“, бугарската „Кинг Лонг“, кинеската „Џенгџоу јутонг“ и од домашната „Санос“. На тендерот победи кинеската групација, но одлуката ја обжалија останатите три. По разгледувањето на поднесените жалби од бугарската и од македонската компанија, беше донесена одлука за поништување и на овој тендер и за распишување нов, но со делумно променети критериуми и намален број двокатни автобуси.

Ќе се купуваат и двокатни и обични автобуси

Директорот на ЈСП, Александар Бошковиќ, обелодени дека оваа варијанта за скопскиот јавен превоз е веќе договорена со Владата, а новиот конкурс се очекува во текот на месецов.

Освен двокатни автобуси, Скопје ќе добие и нови нископодни автобуси, како и минибуси. Ова е последната верзија за претстојната набавка на нови возила за скопскиот јавен превоз, која претставници на Владата им ја презентирале на надлежните во Јавното сообраќајно претпријатие „Скопје“.

Според Александар Бошковиќ, директор на ЈСП, работна група од експерти веќе ја подготвува спецификацијата за тоа какви карактеристики треба да имаат новите возила, односно какви двокатни, нископодни и минибуси ќе му бидат потребни на градот.

- Врз основа на таа студија Владата треба да одлучи колку двокатни, колку нископодни автобуси и колку минибуси ќе купи. Тоа ќе биде потребно за конкурсот за набавка, кој се очекува да биде објавен овој месец. Мене ми е многу мило што се менува климата и што Владата наиде на разбирање и го смени својот став а ова прашање - вели Бошковиќ.

Според неговите информации, двокатните автобуси ќе бидат наменети за централното градско подрачје, а нископодните, односно, обичните единечни автобуси и минибусите ќе бидат распределени по другите делови во градот.

- На тој начин и градскиот и приградскиот јавен превоз ќе бидат покриени со нови автобуси, а граѓаните на Скопје конечно ќе имаат соодветен, модерен и удобен превоз - истакна Бошковиќ.

Од Министерството за транспорт и врски потврдија дека ќе има нов конкурс месецов, но не прецизираат какви автобуси ќе се бараат овој пат.

- Во тек е подготовката на конкурсот за набавка на автобуси со кои ќе се обнови возниот парк во јавниот превоз во Скопје, кој е предвидено да биде објавен во септември - се вели во официјалниот краток одговор што го добивме оттаму.

За овој проект во Буџетот на Македонија средствата беа намалени уште со првиот ребаланс и тоа од предвидените 490 милиони денари за првите 102 двокатни автобуси, на 193 милиони денари. Се' уште не е официјално познато колку пари ќе има за оваа намена со новиот ребаланс, но од Министерството велат дека тоа нема да е проблем, бидејќи исплатата на оваа јавна набавка нема да се врши во текот на оваа фискална година.

Од Владата вчера не сакаа да коментираат за набавката на автобусите.

- Да почекаме да биде изгласан ребалансот на буџетот на седница на Владата, за да можеме и официјално да се изјасниме за ова прашање. Подетаљни информации би имале во наредните денови - изјави Мартин Мартиновски, портпарол во Владата.

Набавката на нови автобуси за ЈСП „Скопје“ се влече две години, а по улиците и понатаму возат автобуси постари и од 30 години. Кон крајот на 2007 година Владата одлучи да издвои 4,4 милиони евра за набавка на 45 еднокатни автобуси, за што ЈСП тогаш распиша конкурс. По налог на Владата, ЈСП го поништи конкурсот, а набавката ја презеде Министерството за транспорт и врски, кое на конкурс побара набавка на 102 двокатни автобуса. Овој тендер потоа беше дополнет за набавка на 302 двокатни автобуса, но пропадна бидејќи ниту една од фирмите учеснички не даде комплетна понуда. На вториот конкурс за двокатни автобуси беше избрана кинеската компанија „Џенџоу јутон групација“, која понуди цена од 51 милион евра. По изборот на кинеската компанија, партијата Обединети за Македонија обвини дека Министерството направило скандалозна набавка, бидејќи со прифатената сума државата ќе ги преплати автобусите. Оваа партија тврдеше дека еден кинески двокатен автобус чини 85.000 евра, а државата за еден ќе плати 170.000 евра. Кратко време по обвинувањата од Обединети за Македонија, Државната комисија за жалби го поништи конкурсот, со објаснување дека Кинезите не се обврзале оти навреме ќе ги испорачаат првите 100 автобуси.

Од Министерството за транспорт и врски информираат дека се подготвуваат за нова јавна набавка, но не откриваат кога ќе го објават огласот ниту пак дали ќе има менување на условите, кои според учесниците на минатиот тендер беа оценети како многу строги и нефлексибилни

Скопјани уште долго ќе се возат во старите, дотраени автобуси на јавниот градски превоз. Обновата на возниот парк нема да се случи набрзо, бидејќи Државната комисија за жалби го поништи тендерот за купување на двокатните автобуси на кој беше избрана кинеската компанија Џенгџоу Јутонг. Како единствена причина за ваквата одлука бил рокот за испорака на првите 100 автобуси од 12 до 18 месеци по склучувањето на договорот кој не одговара на бараните услови во Тендерската документација кои прецизираат стоте возила да се достават најдоцна за една година.

Од Министерството за транспорт и врски информираат дека се подготвуваат за нова јавна набавка, но не откриваат кога ќе го објават огласот ниту пак дали ќе има менување на условите, кои според учесниците на минатиот тендер беа оценети како многу строги и нефлексибилни.
- Со оглед на тоа што станува збор за повеќегодишна набавка која предвидува издвојување на средства од државниот Буџет во период од три години, Комисијата за спроведување на јавната набавка при Министерството за транспорт и врски ја прифаќа одлуката на Државната комисија за жалби по јавни набавки со цел отстранување на било каква можност во иднина да се остави простор за сомневање во однос на направениот избор. Јавноста благовремено ќе биде информирана кога ќе биде распишана новата набавка на автобуси - информираат кратко од ресорното Министерство.

На претходно распишаниот тендер беше избрана кинеската компанија која единствена понуди валидна банкарска гаранција и ги исполни сите останати барани услови
освен рокот за достава. Нивната понуда за 302 автобуси чинеше 51 милион евра.
На тендерот за набавка на 30 двокатни автобуси освен "Јутонг" се јавија и македонскиот производител на автобуси Санос и уште една турска и бугарска компанија.
Ова беше втор обид за набавка на нови возила. На првиот тендер ниту една компанија немаше доставено комплетна документација.