„Енергетика“ се вклучи во енергетскиот систем

Вчера официјално беше пуштен во употреба новиот производствен капацитет „Енергетика“, кој комбинирано ќе произведува електрична и топлинска енергија. Станува збор за инвестиција на ЕЛЕМ од 3,5 милиони евра, со која целосно се реконструираа двата стари турбоагрегата. Нивната вкупна инсталирана моќност е 30 мегавати и ќе работат во конгенеративен режим на комбинирано производство на електрична и на топлинска енергија. Како погонско гориво ќе се користи природниот гас. „Енергетика“ ќе произведува до 160 гигават-часа електрична енергија, со можност за производство до 200 гигават-часа топлинска енергија годишно. „Владата постојано инвестира и работи на осовременување на системот за енергетска поврзаност“, рече Груевски.

Когенеративниот систем, во споредба со конвенционалните системи, овозможува пониска цена на струјата. Воедно, природниот гас што ќе се користи како гориво, значително ќе влијае и за намалување на загадувањето на околината.

Според Чингоски, реновирањето на „Енергетика“ започнало во 2008 година, во соработка со хрватската „Алстом“. „Енергетика“ ќе се трансформира од класична топлана во когенеративна термоелектрана-топлана со висок степен на искористување на примарната енергија - природниот гас“, рече Чингоски.

Производната цена на електричната и на топлинската енергија од „Енергетика“ ќе биде пазарна и ќе изнесува од 40 до 45 евра за мегават-час. Ќе им се понуди на компаниите во кругот на „Железарницата“ во Скопје, каде што е сместен и капацитетот „Енергетика“. (М.Т.)

„ЕНЕРГЕТИКА“

Прва државна комбинирана централа на струја и топлинска енергија