Елитната станбена населба Расадник, како што беше најавено на почетокот, сè уште е далеку од просечните стандарди на домување, а камо ли од луксузот што им беше ветен на граѓаните кога ги купуваа становите.
Иако, според Деталниот урбанистички план, визијата за уредување на овој дел од градот е навистина привлечна, засега освен издигнати станбени блокови и веќе функционални комерцијални и угостителски објекти, друго нема. Уличната инфраструктура сè уште не е комплетно решена, особено не е гламурозен делот кога возилата од внатрешноста на станбениот комплекс поминуваат низ тесни и нерамни премини за да се приклучат до главната улица Сава Ковачевиќ.
Пробивањето на улиците е условено и од решавањето на повеќе имотно-правни односи, но и од изградбата на нови згради кои според планот треба да се дел од населбата. Од општина Кисела Вода велат дека до сега се изградение околу 70 отсто од станбено-деловниот комлекс, а за другиот дел во тек е изработка на техничка документација.

- Според ДУП-от, се предвидува изградба на уште неколку станбени објекти за колективно домување, градинка, спортски комплекс, спортска сала, црква и бензиска пумпа. Со ДУП-от е предвидена доградба и надградба на постојната градина во локалитет Расадник (градинката „8-ми Март“) за која се изрботува техничка документација. Локалитетот Расадник сообраќајно се поврзува кон улицата Првомајска со две улици, кон Сава Ковачевиќ со три улици и кон улица Народни харои со две улици - велат од општината.
За црквата која ќе се наоѓа во непосредна близина на „СП маркет“, во моментов се изработува проектно–техничка документцација која е во завршна фаза, а потоа ќе се премине на изградба на објектот. 
ГМВ/БИ