Булевар Србија

Градот Скопје успешно го заврши проектот за изградба и проширување на булеварот Србија (втор дел), на потегот од булеварот Видое Смилевски Бато до улицата Првомајска, со вкупна должина од 2.000 метри. Булеварот Србија денеска /13.04.2011 година/ и официјално го предадоа во употреба градоначалникот на Град Скопје, Коце Трајановски, премиерот Никола Груевски, и градоначалниците на општините Аеродром и Кисела Вода, Ивица Коневски и Марјан Ѓорчев.

- Ми претставува особена чест што токму на овој ден, кога одбележувам две години од мојот мандат како градоначалник на Скопје, го предаваме во употреба проширениот булевар Србија. Успешната реализација на овој значаен сообраќаен проект го симболизира растот на Скопје во модерна метропола. На булеварот Србија, од булеварот Видое Смилевски Бато до улицата Првомајска е изградена нова сообраќајна траса со 3 коловозни ленти со широчина од по 3,5 метри. На овој потег сега има вкупно 5 коловозни ленти, средишно зеленило, тротоари со велосипедски патеки и странично зеленило. Вкупната широчина (профилот на сообраќајницата) на овој потег изнесува 50 метри. На потегот од улицата Првомајска кон цементарницата „Усје“ е изградена комплетно нова сообраќајница со 4 коловозни ленти со широчина од по 3,5 метри (без средишно зеленило), тротоари со велосипедска патека и странично зеленило. Вкупната широчина (профилот на сообраќајницата) на овој потег изнесува 30 метри. Асфалтирана е вкупна површина од 42.200 квадратни метри, при што се вградени 16.500 тони асфалтна маса. Крстосницата пред цементарницата „Усје“ е решена со кружен тек со дијаметар од 40 метри – рече градоначалникот Трајановски.

Тој додаде дека по должината на булеварот е изведена секундарна атмосферска мрежа во должина од 794 метри со профил Ф 250 и 784 метри со профил Ф 200. Поставени се 80 сливници и 25 ревизиони шахти, а изведена е и комплетна семафоризација на крстосниците со улиците Трета Македонска Бригада и со Првомајска.

- По должината на коловозот се поставени големи рабници со вкупна должина од 6.085 метри и мали рабници со вкупна должина од 11.118 метри. Со бекатон-плочки се покриени тротоари и пешачки острови со вкупна површина од 17. 250 квадратни метри. Поставено е комплетно ново осветлување, со 108 столбови со висина од 8 метри и 176 штедливи светилки. Употребени се 108 конзоли од кои 58 еднокраки, 49 двокраки и 1 шестокрака. По должината на булеварот Србија е уредено парковско зеленило со површина од 12.700 квадратни метри. Засадени се 910 грмушки, зимзелени и листопадни садници. За наводнување на зеленилото e изведена хидрантска мрежа со комбиниран систем на полевање, капка по капка и прскалки, со вкупна должина од 2.350 метри. Изградбата на булеварот Србија е целосна инвестиција на Градот Скопје во вредност од 2 милиона евра. Градежните активности ги изведуваше „Маврово инженеринг". Изградбата на булеварот Србија ќе ја подобри комуникацијата меѓу трите општини, Гази Баба, Кисела Вода и Аеродром, ќе ја зголеми проточноста на сообраќајот, а со тоа ќе го намали загадувањето на средината – објасни градоначалникот Трајановски.

Претседателот на Владата на Република Македонија, Никола Груевски, нагласи дека раскопаните улици во градот сведочат за големиот број почнати проекти, а настаните како денешниот - за успешно завршените проекти.

- Изградбата на булеварот Србија е пример за тоа како се решаваат тесните сообраќајни грла. Булеварот ќе одговори на зголеменото ниво на сообраќај во овој дел од градот и во годините што следуваат – рече премиерот Груевски.

Градот Скопје Ве поканува на официјалното отворање на булеварот Србија (втор дел) коешто е закажано за утре /13.04.2011 година, среда/ во 13 часот  на крстосницата меѓу булеварот Србија и улицата Првомајска.

Проширениот булевар Србија ќе го предаде во употреба градоначалникот на Град Скопје, Коце Трајановски.