Ќе треба уште една деценија за завршување на битолскиот храм

Храмот „Собор на сите македонски светители“ ќе биде долг над 80 и широк над 50 метри

БИТОЛА - Битолскиот соборен храм „Собор на сите македонски светители“ кој треба да биде најголемото македонско светилиште на Балканот и по цели 15 години од почетокот на градбата и поставувањето на темелите се' уште срамежливо наѕира над земјата на огромниот градежен плац пред хотелот „Битола“. За да се поттикне изградбата на раскошното архитектонско решение, годинава првпат се ангажира и државата. Владата издвои 150.000 евра од буџетот за интервенции во градежните работи. „Ова е првпат државата да даде пари за црквата. Средствата стасаа во Битола и Црковниот одбор ќе има увид во трошењето на парите издвоени од буџетот“, рече митрополитот Петар.

Изградбата на храмот не се одвива според определената динамика. По долгогодишниот застој, епархијата минатата година едвај успеа да ја постави првата плоча. Сега единствената надеж да се охрабрат верниците и донаторите е да се осветат двете помали цркви на истата локација: „Свети Апостол Павле“ сместена под олтарот на соборниот храм и црквата „Св. Атанасиј Велики“, која минатата година по желба на ктиторот Драган Герзовски, бизнисмен од Битола, почна да се гради во дворот на големата црква.

„Црквата ’Собор на сите македонски светители’ е огромен проект за кој не можеме да се надеваме дека бргу ќе може да биде изграден. Најверојатно ќе треба уште една деценија ангажман додека не се заврши тоа импозантно здание. Но, мислиме ако се осветат двете помали цркви одделно, тогаш можеме да сметаме на редовни приходи од верниците во црковната каса што може да ја потпомогне градбата“, вели владиката Петар.

Изградбата на најголемата црква на овие простори запре 1997 само две години од почетокот на градежните работи во годината кога пропадна пирамидалната штедилница ТАТ. И додека православните битолски верници состојбите ги поврзуваа со гласиштата дека во ТАТ пропадна позначителна сума црковни пари, владиката Петар тврдеше дека стопирањето навистина е поврзано со ТАТ, но од сосема друг аспект. Своевремено бил направен начелен договор меѓу црквата и битолските фирми и бизнисмени да донираат сите по 500.000 денари за изградба на храмот. Меѓутоа, финансиската афера ја разнишала нивната економска моќ така што речиси сите големи газди без двоумење се откажале од ветувањето и ја запоставиле идејата да се подигне црквата. „Имавме застој зашто не можевме да ги намириме обврските спрема ГП ’Пелистер‘ од Битола. Сега тоа се разреши и продолжуваме понатаму. Сметаме дека кога ќе излеземе од првата плоча нагоре ќе има и поголем одѕив од донаторите, а со тоа и прилив на средства“, смета владиката Петар.

Проектот за раскошниот верски објект е дело на битолскиот архитект Јорго Константинов. Тој треба да биде со грандиозни димензии - должина над 80 метри и ширина над 50 метри. Само еден столб има пречник од 5 метри. Ќе ја носи највисоката купола на Балканот. Според нацртите, градбата треба да биде поголема и од белградскиот храм „Св. Сава“ и од софискиот Соборен храм „Св. Александар Невски“. Идејата е овој соборен храм да ја врати симболиката на Битола кога градот под Пелистер бил нарекуван Монастири со над 60 цркви и манастири.

Сепак, за да заземат работите сериозен тек, според овдешната епархија, потребни се најмалку 1,5 милиони евра. Битолчани како и другите православни христијани-верници, кои во годините наназад оставаат скромен прилог врз иконите на малите параклиси во дворот на храмот, се сомневаат дека со нивните пари, иако, како што велат, се подарени од срце, ќе бидат доволни соборниот храм да го огрее сонце. „Работите треба најсериозно да се насочат. Богатите бизнисмени да го одврзат кесето и истовремено да се поттикнат нашите по белиот свет да вложат во оваа македонска црква, затоа што на оној свет сите сме еднакви. Тука треба да покажеме кој колку може, колку ја сака верата и татковината“, вели Ѓорѓи Ѓорѓиевски, битолски верник. (Б.Т.)