На балконот скара, на тревникот перална

Градот три години никако да ја усвои одлуката со која најави дека Скопје ќе заличи на Љубљана, односно ќе се казнува за сушење алишта на тераси, за миење возила пред згради, за изронета фасада...

Раат немам од соседите што живеат под мене. Секој ден готват на терасата. Особено неподносливо е кога ќе распалат скара. Не се дише од чадот. Не можам ни да излезам на тераса. Никој не ги казнува, немаме каде да се обратиме. Мислев дека живеам во град, ама ова е бетер од село, се жали Лиле Г., која живее во Карпош.

Нецивилизираното однесување на скопјани зазема се' поголем замав поради немање регулатива за казнување на ваквите појави. Терасите на колективните објекти граѓаните ги претвораат во кујни, шпајзови, во сушални за алишта. На балконите, освен што се готви, може да се видат наредени тегли, обесени низи со пиперки, шкафови и креденци, а честа е појавата да се тресат и теписи или, пак, чаршафи со трошки врз главата на соседите. Дворовите на зградите, пак, служат за миење возила, и тоа од јавни хидранти, за перење теписи или за правење зимница. Се троши јавна вода, се гази и се уништува зеленилото со распалените ќумбиња, но и со прашокот со кој се мијат возилата.

- Пред една година Општина Аеродром дозволи граѓаните да ги користат хидрантите во парковите со цел тие да го полеваат зеленилото. Но, она што јас гледам е дека тие постојано се злоупотребуваат за миење или ладење на улиците или, пак, се оставаат отворени по цели денови да вртат и тоа во најголемите жештини - вели граѓанка од Аеродром.

Градските власти пред три години наголемо најавуваа усвојување на одлука за комунален ред во Скопје, со која ќе забранат сушење на алишта на тераси и миење возила пред станбените објекти. Исто така, со неа требаше да биде уреден и изгледот на фасадите на објектите, паноата низ градот, како и надворешниот изглед на дуќаните. Беше кажано дека нејзиното носење е со цел Скопје да стане метропола по примерот на Загреб и Љубљана. Но, до ден-денешен одлуката се' уште не дошла на дневен ред на седница на Советот на Град Скопје. Од Градот изјавија дека не се откажуваат од неа, но не кажаа кога точно ќе профункционира во практика.

- Правилникот за комунален ред на Град Скопје, кој беше најавуван во 2006 година, не беше донесен, затоа што требаше да се усогласува со многу закони, поточно да се прават големи измени во постојната законска регулатива. Овие прашања со сигурност во некаква форма ќе се регулираат, затоа што во изминатиот период беше донесен Законот за јавната чистота. Освен тоа, и градоначалникот Коце Трајановски во својата програма им посветува посебно внимание на чистотата и на урбаниот изглед на Град Скопје - изјавија од Одделението за односи со јавноста.

Од Градот сметаат дека Правилникот ќе има посебно значење затоа што би требало да претставува основа за подобрување на вкупните комунални состојби во Скопје. Уверени се дека доколку ја усвојат ваквата одлука, таа нема да остане само „мртва буква“ на хартија. Сметаат дека на терен таа ќе функционира, без разлика на менталитетот на нашите граѓани, кои не се навикнати да бидат казнувани за вакви нешта.Иако се прецизирани нештата за кои ќе се санкционира, висината на казните за непослушните граѓани допрва ќе се утврдува.