Општинска зграда Центар

Роза Петкова

До петти февруари ќе се бара идејно решение за нова зграда во која треба да се сместат службите на Општина Центар. Дотогаш трае конкурсот за изработка на архитектонско и урбанистичко решение на комплексот за општинска зграда кој го распишаа општинарите. Жири-комисијата што ќе го врши оценувањето на пристигнатите трудови има обврска во рок од 30 дена од денот на завршување на конкурсот да ги објави резултатите. Надлежните во Центар велат дека немаат повеќе информации за нивниот проект, се додека не се избере идејното решение. - Што ќе понудат авторите на конкурсот кои ќе се пријават се уште не е познато и затоа не би можеле да ви кажеме нешто конкретно. На локацијата каде што се бараките на Општината, во согласност со генералниот урбанистички план е предвидена државна локална управа, а, исто така, и во ДУП стои објект за државни институции - објаснува Јовица Ацковски, портпарол на Општина Центар. Властите велат дека во општинскиот буџет за 2010 година имаат обезбедено средства за идејниот проект, а откако тој ќе се избере, ќе се знаеле податоци за тоа колку ќе чини изградбата. Изградбата на општинска зграда беше актуелна уште во мандатот на поранешната градоначалничка Виолета Аларова. Според идејното решение што тогаш го работеше фирмата „Инпума“, во објектот требаше да се влегува преку портата од старата учителска школа, која се наоѓа зад општинските бараки. Аларова најавуваше дека зградата ќе се вцрта во деталниот урбанистички план за Дебар маало, а за нејзина изградба ќе се искористат стоте илјади евра што општината во 2006 година ги доби како награда од Европската агенција за реконструкција за обнова на улицата Македонија. Според Аларова, во новите простории на Општината требаше да се смести и матичната служба. Меѓу другите, нови објекти за своите служби најавуваа и општините Гази Баба и Ѓорче Петров, со истата намера да се иселат од привремените објекти или бараки и да добијат порепрезентативни места за работа. Со години и Град Скопје најавува дека ќе гради Градска куќа, а според последните најави на градоначалникот Коце Трајановски, за проектот ќе се предвидат пари во буџетот за следната година.