Електронски табли на десет автобуски постојки

На информативните табли стојат податоци за тоа кој автобус минува на стојалиштето, која е крајната станица и за колку време ќе пристигне следниот

Десет автобуски постојки на линиите „2“ и „5“ деновиве се опремени со електронски информативни табли. Како што информира Ацо Стојановски, технички директор на јавното сообраќајно претпријатие „Скопје“, информативните табли се' уште не се во функција, бидејќи се чека енергетската согласност од ЕВН.

- На информативните табли ќе има податоци за тоа кој автобус минува на автобуската постојка, која е крајната станица и за колку време ќе пристигне следниот автобус од таа линија - објаснува Стојановски.

Електронските информативни табли се поставени на автобуските стојалишта кај ресторанот „Три бисери“ во Аеродром, кај Комплексот банки, кај Соборниот храм „Свети Климент Охридски“, на улицата Димитрие Чуповски, кај поликлиниката „Букурешт“ и спроти маркетот „Тинекс“ во Ѓорче Петров.

- Освен поставувањето на овие табли, новина од ЈСП е и тоа што 30 автобуси што сообраќаат на линиите „5“ и „2“ се опремени со ЏПС-опрема за автоматско сателитско следење - вели Стојановски.

Овие активности на ЈСП се дел од програмата „Ренесанса“, која предвидува и преадаптирање на автобусите да работат и на нафта и на природен гас.

- Со програмата е предвидено да се адаптираат 12 автобуси, а од нив четири возила веќе возат и на природен гас. До крајот на февруари треба да се преадаптираат и останатите - вели Стојановски.

Тој објаснува дека е потребен подолг временски период за да се преадаптираат автобусите, бидејќи во нив се вградуваат нови елементи.

- Уште кога автобусот е отворен по поставување на инсталацијата и опремата за преадаптирање на моторот, доаѓа комисија од Машинскиот факултет да провери дали тие се правилно поставени. Потоа автобусот се затвора, а следната фаза е добивање на писмената документација за атест - потенцира Стојановски.

Стојановски вели дека ЏПС-опремата чини 500 евра по автобус, а опремувањето на автобуските постојки со информативни табли чини 4.500 евра по стојалиште. Поставувањето на таблите, опремувањето на автобусите со ЏПС и преадаптацијата на моторите предвидени со проектот „Ренесанса“ се дел од програмата „Сивитас - од град за град“. Преку овој проект Европската комисија има цел да ги поддржи амбициите за интегрирање на одржлив урбан транспортен систем.

http://dnevnik.com.mk/?ItemID=8D7B1E22ED59F548BF3E1A0148FD3BC5

Elena Ma~evska

Патниците што треба да патуваат надвор од земјава, за да стигнат до аеродромот „Александар Велики“ мора да платат од 20 до 30 евра за такси-превоз бидејќи немаат друга алтернатива поради непостоењето редовна автобуска линија. Градските власти, претпријатијата за автобуски превоз и Министерството за транспорт и врски, иако признаваат дека автобуски превоз до аеродромот е повеќе од потребен, сепак сега засега не најавуваат решение кое ќе ги намали трошоците на патниците. Овие институции сметаат дека најверојатно ваквата линија би била нерентабилна и, според нив, ова е главната причина за долгогодишното одложување за наоѓање решение на овој проблем. Во моментот во таа насока сообраќа единствено автобуската линија со број 52, која оди до селото Петровец, но таа воопшто не е корисна за патниците што одат до аеродромот бидејќи дотаму има уште неколку километри. - Многу често патувам во странство и принудена сум месечно да издвојувам голема сума за да им платам на таксистите за да ме превезат. Живеам во Ѓорче Петров и за да не платам огромна сума за превоз, најчесто се договараме со таксистот за која цена ќе ме превезува, а притоа да не го вклучува таксиметарот - раскажува Лидија од Општина Ѓорче Петров. Бидејќи станува збор за многу атрактивна и исплатлива релација за таксистите, пред аеродромот секојдневно има паркирано голем број такси-возила, кои буквално се борат за секој патник, особено ако се работи за странец. Сепак, и покрај ваквата состојба, која се провлекува со години, најверојатно во блиска иднина нема да се најде решение. Директорот на ЈСП „Скопје“ вели дека во моментот прават внатрешни консултации во претпријатието за тоа дали треба да побараат да им биде одобрена дополнителна линија за превоз на патници до скопскиот аеродром. - Правиме калкулации за тоа колку ќе биде рентабилна таа линија, а со тоа и дали ние ќе имаме некаква заработка од превозот на патници. Иако сметам дека ваква автобуска линија е повеќе од потребна за Скопје, сепак ние свесно во никој случај нема да се впуштиме во дополнителни загуби за нашето претпријатие - вели Мишо Николов, директор на ЈСП „Скопје“. Ленин Јовановски, директор на „Слобода превоз“, објаснува дека тие никогаш не побарале дозвола за воведување на ваква автобуска линија затоа што тоа спаѓа во вонградски превоз. Од Град Скопје, пак, сметаат дека тие не се надлежни за воведување автобуска линија до аеродромот „Александар велики“ и покрај тоа што ЈСП „Скопје“ е во нивна надлежност. - Организирањето на јавниот превоз кон аеродромот е во надлежност на Министерството за транспорт и врски и доколку надлежните се договорат со ЈСП „Скопје“, може да се отвори директна автобуска линија до аеродромот - велат од Одделението за односи со јавност на Град Скопје. Од Министерството за транспорт и врски кое, според Законот за превоз во патниот сообраќај, е надлежно за одобрување меѓуградски автобуски линии, велат дека досега тие не добиле какво било барање за воспоставување автобуска линија до аеродромот.

Во соседството е поинаку

Во земјите во соседството функционираат редовни автобуски линии до аеродромите. До белградскиот аеродром има автобус на секои 32 минути, а цената на билетот е 65 динари. Во другите европски центри патниците имаат можност да одберат различни видови превоз на патници за да стигнат до саканото место.

http://vreme.com.mk/DesktopDefault.aspx?tabindex=1&tabid=1&EditionID=1874&ArticleID=127305