Патна мрежа (општо)

Реконструкцијата на патот Макази - Маркова нога

Работите им се доверени на скопската градежна фирма Гранит, струшки Илинден и на австриската Алпине Бау, кои мора да ги запазат роковите за рехабилитација на овие делници чија вкупна должина изнесува околу 330 километри

Изградба и реконструкција на патни делници ќе бидат главните приоритети на Министерството за транспорт и врски оваа и наредната година. Станува збор за 11 најоштетени патни делници што една година ќе се реконструираат со 35-те милиони евра кои Македонија ги доби од Светската банка. Работите им се доверени на скопската градежна фирма Гранит, струшки Илинден и на австриската Алпине Бау, кои мора да ги запазат роковите за рехабилитација на овие делници чија вкупна должина изнесува околу 330 километри. Од нив најдолга и најоштетена е делницата Струмица - Дојран, потоа Макази - граница со Грција, Ржаничино - Свети Николе, како и Лакавица - Неготино. Сите овие делници се со должина над 30 километри. Меѓу селата Превалец и Стојмирово, како и помеѓу Давидово и Раброво ќе се реконструираат по 13 километри, додека на преостанатите четири патни правци ќе се врши нивна ревитализација во должина од 25 километри.

Охридската обиколница треба да заврши за половина година а речиси две години работа ќе бара изградбата на патот до ски центарот Кожуф во должина од 17,5 километри, а слично времетраење ќе има и патот Штип - Струмица и од месноста Коломот до селото Близанско.
Со буџетски средства ќе се реконструира делницата од Тетово до граничниот премин Јажинце, а пари се предвидени и за патот до Сончев град и за продолжување на третата лента Градско - Прилеп до Росоман и од Дебар до Кичево. За наредната година е предвидена да заврши и автопатот Куманово - Табановце што е инвестиција од 12 милиони евра, а средствата се обезбедени од државната каса и заем од Светската банка.

Од Владата која ја крои инвестициската политика во патната инфраструктура велат дека за реконструкција на патната инфраструктура во земјава се обезбедени највисоките инвестици во историјата што ќе бидат реализирани во предвидените рокови. Инаку, во Агенцијата за државни патишта велат дека се подготвува документација за реконструкција на уште девет патни делници за кои се обезбедени средства од Европската банка за обнова и развој. Станува збор за двегодишен проект што треба да почне да се рализира од наредната година.

За натамошното унапредување на патната мрежа, како што велат од Министерството за транспорт и врски ќе се спроведува концесионерство на кое на повикот од Агенцијата за државни патишта интерес покажале 40-тина компании.