Јавен автобуски превоз (општо)

ЈСП „СКОПЈЕ“ ЌЕ ПОСТАВУВА ИНФОРМАТИВНИ ТАБЛИ НА АВТОБУСКИТЕ СТАНИЦИ

Јавното сообраќајно претпријатие „Скопје“ од 15 септември ќе постави 10 информативни табли на автобуските станици за линиите „2“ и „5“, кои ќе го прикажуваат точното време на пристигнување или задоцнување на автобусите на овие две линии.

Не се знае кој ќе ги поправа кинеските автобуси

Градските власти се' уште немаат акционен план за тоа кој, како и за колку пари ќе ги одржува новите 302 двокатни кинески автобуса, кои наредниве три години ќе се испорачуваат во Скопје. Сепак, имајќи предвид дека Јавното сообраќајно претпријатие „Скопје“ две децении работи со загуби, парите за нивното одржување ќе се обезбедуваат од градскиот буџет.

- Во предизборната програма на градоначалникот Коце Трајановски беше посочена неговата заложба дека ќе продолжи со субвенционирање на јавниот градски превоз, бидејќи ЈСП не работи за комерцијални цели - изјави портпаролот Неделчо Крстевски.Иако и самиот премиер Никола Груевски изјави дека набавката на новите 302 двокатни автобуса е за потребите на Градот Скопје, оттаму велат дека се' уште немаат официјална потврда од Владата оти новите возила ќе бидат наменети за ЈСП. Велат дека штом ќе добијат потврда од Владата, ќе направат процена колку од старите автобуси се во добра, а колку во лоша состојба и ќе решат на кој начин ќе ги расходуваат. Сегашниот возен парк на ЈСП, според извештајот за остварените резултати во 2008 година, има 377 автобуси. Од нив, лани дневно биле исправни во просек по 275. Од Градот се' уште немаат информации колку возила ќе бидат во оптек со доаѓањето на новите, односно дали бројката ќе се зголеми или ќе се намали.

Загубите на ЈСП за минатата година изнесуваат 4,9 милиони денари, што е значително помалку отколку во претходните години, кога загубата се броеше во милиони евра. Минусот на претпријатието е помал бидејќи лани Градот им ги покри загубите со субвенции вод 140 милиони денари. ЈСП лани остварило приход од околу 18 милиони евра.Годинава ЈСП од Градот ќе добие 109 милиони денари субвенции. Директорот на претпријатието, Александар Бошковиќ вели дека секаде во светот, јавните превозни претпријатија се субвенционирани од државата со 30 до 70 насто од трошоците, а кај нас само 10 насто. И покрај намалувањето на загубата и обновата на возниот парк со државни пари, на ЈСП ќе му останат уште проблеми за решавање, како нелојалната конкуренција, сообраќајниот метеж, дивите превозници и друго. Според заклучоците во извештајот за работата на ЈСП во 2008 година, за подобар јавен превоз е потребно обнова на возниот парк, субвенционирање, елиминирање на нелојалната конкуренција, прекршочна санкција за патниците кои не платиле билет и доследна примена на одлуката со која ЈСП е единствен превозник на сите градски и приградски линии.