Градоначалникот Трифун Костовски вчера со свој став на дел од изјавите на премиерот Никола Груевски, дадени во ТВ настапот по повод "100 дена Влада", а кои, меѓу другото, се однесуваат и на набавка на автобусите и новиот Закон за Град Скопје.
- Неодговорно се тврди дека Владата е принудена да подари 300 двокатни автобуси на ЈСП, бидејќи Градот нема намера да го обнови возниот парк. Одговорно тврдам дека во изминативе две и пол години во два наврата е спречена набавка на автобуси во ЈСП, со недавање финансиска гаранција и поништување на објавениот тендер за набавка во ЈСП, изјави вчера Костовски. Според него, Градот сака да го реши проблемот со јавниот градски автобуски превоз како животно прашање на граѓаните, додека Владата ја сведува набавката на автобуси на "туристичка атракција". Тој вчера ја обвини Владата и дека не се изјаснува за предлог текстот за новиот Закон за Град Скопје, како за системско прашање. Притоа изјави: "Владата има намера, претпоставувам, да го користи во кампањата за локалните избори".

http://vecer.com.mk/?ItemID=535E49CF37108141B36F9813B6D26781

Костовски го искритикува премиерот за односот на Владата спрема Скопје

Јавниот превоз не е туристичка атракција, му порача Костовски на Груевски

Сања Наумовска

Владата го третира јавниот превоз во Скопје како туристичка атракција, додека Градот се обидува да го реши како едно важно животно прашање на граѓаните, изјави вчера градоначалникот на Скопје, Трифун Костовски, како реакција на настапот на премиерот Никола Груевски по повод стоте дена од Владата. Ставот на Груевски дека „Владата е принудена да му подари на Скопје 300 двокатни автобуси поради тоа што Градот нема намера да го обнови возниот парк на ЈСП“, Костовски го оценува како неточен и неодговорен, бидејќи, како што вели, во минатите две и пол години Владата била таа која во два наврата го спречила Градот да го поднови јавното претпријатие.

Костовски потсетува на одбивањето на Владата да одобри финансиска гаранција за да може Градот да се задолжи, како и на поништувањето на објавениот тендер за набавка на автобуси. Изјавата на премиерот дека „за среќа, Костовски нема да биде веќе градоначалник при дарувањето на автобусите“, градскиот татко ја смета како евтин предизборен трик.

Градоначалникот на Скопје му забележува на Груевски и за игнорирањето на прашањето за измена на Законот за Град Скопје, за што градската администрација веќе достави свои предлози до Министерството за транспорт и врски.

„Владата не се изјаснува за ова прашање бидејќи, претпоставувам, ќе го користи во кампањата за локалните избори“, рече Костовски.

Вовед во предизборната кампања, според Костовски, се и обидите на Груевски за политички линч на градоначалникот, да се опструираат проектите на градската администрација, како и манипулациите со мнозинството во Советот на Скопје, особено на последната седница кога на јавното претпријатие „Комунална хигиена“, кое се соочува со огромни долгови, не му беше дозволено ниту да продава деловен простор и акции ниту, пак, да ја зголеми цената на ѓубрарината. Костовски го потсети премиерот и на фактот дека во последниот извештај на ЕУ токму изборните измами беа посочени како главни пречки за напредокот на земјата. (С.Н.)