Возен парк (ЈСП - двокатни автобуси)

Двокатни автобуси ќе направат 302 проблема во Скопје

Од безбедносен, економски, еколошки, инфраструктурен аспект, многу подобри се нископодните автобуси

На Скопје не му се потребни двокатни автобуси, произлегува од аргументацијата на стручњаци од повеќе области. Тие ги споредуваа нископодните и двокатните автобуси што треба да бидат купени за обнова на возниот парк на Јавното сообраќајно претпријатие „Скопје“.

Владата веќе распиша тендер за 302 двокатни автобуса, чија набавка ќе трае три години, од 2009 до 2011.Два од нив ќе бидат отворени за панорамско разгледување, еден за Охрид, а еден за Скопје. Првите 102 автобуса ќе бидат испорачани в година, а ќе бидат платени со пари од буџетот, велат од Министерството за транспорт и врски. Според надворешниот дизајн, автобусите ќе потсетуваат на тие од 60-тите години, ќе бидат со унифициран изглед, а ќе поседуваат најсовремена техника (клима-уреди, видеомонитори...).

- Секаде во светот основен превоз се метроата, трамвајот или еднокатните автобуси, само кај нас е обратно. На пример, во Лондон никој не ви гарантира безбедност ако патувате на вториот кат од автобусот - велат од Градот.

Скопскиот градоначалник Трифун Костовски и Јавното сообраќајно претпријатие „Скопје“ имаа и промотивно пробно возење во нископодниот автобус од марката „мерцедес“. Според нив, решението треба да се бара во нископодните автобуси, за кои сметаат дека се поевтини, побезбедни, поекономични и можат да ги задоволат потребите на скопјани, како и стандардите на современ европски јавен градски превоз. Како што нагласи Костовски, овој вид автобус има двапати поголеми можности од двокатен и е за стотина илјада евра поевтин, а ги исполнува сите екостандарди.

УШТЕ ПОГОЛЕМ МЕТЕЖ

Сообраќајните стручњаци од Градот и од ЈСП велат дека воведувањето на двокатните автобуси ќе предизвика уште поголем метеж на скопските улици.Раководителот за сообраќај во Град Скопје, Јани Христовски, препорачува, ако бидат купени, претходно да бидат тестирани, поради опасноста од превртување при голема тежина на горниот кат.

- Улиците имаат дупки, поради што двокатните ќе мора да се возат побавно, што значи и создавање уште поголем метеж. Да не зборуваме за времето на чекање при влез и излез на патниците - вели Христовски. Сообраќајниот инженер и технички директор во ЈСП, Иле Ѓоргиевски, вели дека ова превозно средство бара и поцивилизирано однесување на патниците.

- Треба да се спроведе едукација за подигање на културата на однесувањето, бидејќи вториот кат е со висина од 1,50 до 1,60 метри. Ќе треба патниците да се поднаведнат при влегување и веднаш да седнат. Вториот кат не дозволува стоење. Ако двајца или тројца стојат во автобусот, тој може да се преврти - потенцира Ѓоргиевски.Експертите од ЈП „Улици и патишта“ потенцираат дека мора да се внимава на тежината на автобусите, зашто под притисок на тежината асфалтот може лесно да попушти.

- Немаме информации колку тежи двокатен автобус, но проценките се дека полн двокатен автобус би тежел најмалку 30 тони. Според сите светски стандарди, по градските улици можат да се движат возила со ограничена тежина од 3,5 тони и со специјална дозвола, над 5,5 тони. Оштетувањата на улиците секако би биле поголеми ако секојдневно се движат многутонски возила, посебно низ центарот на градот. При најмала реконструкција на сообраќајница има неверојатен метеж, а камо ли ако се интервенира почесто - вели Илија Мартиновски, директор на ЈП „Улици и патишта“.
Ниту инфраструктурата во градот не одговара за ваков вид автобуси. Подвозниците, дрворедите, семафорите, каблите, улиците се ниски за овие високи возила. Во практиката тоа ќе значи уништување на зеленилото и нов удар врз животната средина и здравјето на луѓето, бидејќи Скопје ќе биде уште позагадено. Се' уште не е пресметано ниту колку ќе чинат инфраструктурните зафати.

- Двокатните автобуси се непрактични за наши услови. Надвозниците Влајко или оној кај Бит-пазар се во ред, но не и во ГТЦ и Црниче. И раскрсниците со семафори би станале сериозен проблем, зашто минималната висина мора да е 4,5 метри. Трошоците за менување на инфраструктурата на крај ќе излезат минимални во однос на оние за експлоатација, за гориво, трошоци при зголемено време на чекање - вели Христовски. о ЈСП се песимисти во однос на безбедноста на горниот кат, особено кога во нив ќе се возат ученици. Практика укажува на многу инциденти.

ГЛАВОБОЛКИ И ЗА ЈСП

Двокатните автобуси, според Ѓоргиевски, не можат да користат природен гас, а ЈСП веќе ги пренаменува своите автобуси како гориво да користат гас, а не нафта.

- Нископодните се и поисплатливи, бидејќи гасот чини 25 денари. До нашите гаражи веќе е изградена бензинска пумпа за полнење гориво - додава Ѓоргиевски.

Поради споменатите инфраструктурни проблеми, ќе мора да се менуваат некои траси и автобуски стојалишта, што ќе доведе и до измена на возниот ред. Исто така, и возачите на ЈСП ќе треба да минат низ обука, која би можела да биде овде или надвор од земјава.В.д. директорот на ЈСП „Скопје“, Александар Бошковиќ, објасни дека нов возен парк со двокатни автобуси ќе бара и преадаптирање на гаражите, сервисот, пумпата и на сервисот за миење автобуси на претпријатието, што ќе чини многу пари.

- Двокатните автобуси се повисоки, околу 4 метри, а нашите објекти се приспособени на нископодни автобуси со висина од 3,10 метри. Ние сме подготвени и за двокатни, но не гарантираме удобен, безбеден, а пред се' ефикасен и социјален превоз во градот - вели в.д. директорот на ЈСП „Скопје“, Александар Бошковиќ.

Техничкиот директор во ЈСП, Ѓоргиевски, објасни дека ќе има проблем и со чистењето на двокатните возила.

- Миењето на возилата е автоматско. Четките сега се приспособени за нашите возила, а дополнителни измени би го чинеле ЈСП дополнителни 500.000 евра, кои ќе се бараат од Градот или од Владата. Има и такви кои оптимистички гледаат на целата ситуација.

- Првпат кај нас некој се сети да набави нови автобуси, кои му се неопходни на ЈСП. Оваа конфликтна ситуација што ја имаме во моментов е непотребна, бидејќи е многу битно да се обнови возниот парк на ЈСП. Сметам дека двата типа возила ја вршат истата работа, единствено нешто што ќе претставува можеби проблем е што двокатните автобуси подолго ќе се задржуваат на стојалиштата. Инаку, капацитетот им е приближно ист - дециден е Никола Крстановски, редовен професор на Отсекот за сообраќај и транспорт на Техничкиот факултет во Битола при Универзитетот „Свети Климент Охридски“.

Боцевски: Скопјани заслужуваат удобен превоз

Наместо аргументација зошто двокатните автобуси се подобри, вицепремиерот Ивица Боцевски не' упати на Министерството за транспорт и врски, кое, пак, по електронска пошта го испрати излагањето на Боцевски при промоцијата на проектот. Владината одлука за набавка на 300 нови двокатни автобуси ја соопшти вицепремиерот за европски интеграции. Според Боцевски, целата конкурсна постапка ќе ја води Министерството за транспорт и врски, а потоа автобусите, како донација, ќе му бидат предадени на ЈСП „Скопје“ за комплетна обнова на возниот парк.

- Инвестирањето во квалитетот на живеењето е инвестиција клучна за секоја земја, а во современите општества владите мора да влијаат, во соработка со одговорните локални самоуправи, да се подобри можноста на граѓаните за пристап до јавниот транспорт, што понатаму влијае и врз бизнисот, културата и останатите чинители на поквалитетниот начин на живеење. Станува збор за автобуси направени според најмодерните екостандарди, соодветно климатизирани и со рампи за лицата со посебни потреби. Скопје како метропола, како економски, културен, политички и социјален центар и место во кое се произведува најголемиот дел од домашниот бруто-национален производ, заслужува да им обезбеди на своите граѓани удобност. Ако локалната самоуправа не може да им излезе во пресрет, тогаш Владата ќе си го одржи зборот даден пред граѓаните - рече тогаш Боцевски.

Со оглед дека станува збор за конкурсна постапка, неизвесно е колку ќе чинат сега веќе 300-те нови автобуси. На првично објавениот јавен повик се пријавиле 14 понудувачи, а се очекува дел од автобусите да бидат во функција во првата половина од идната година. Од Министерството за транспорт и врски велат дека двокатните автобуси ќе воспостават врска со традицијата, ќе се врати стариот дух на градот, по примерот на метрополите Лондон, Даблин, Хонг Конг, Сингапур и Отава. Ентериерот ќе ги има сите најсовремени поволности за патниците.

„Со овие автобуси, скопјани ќе добијат далеку поквалитетни и покомфорни услуги, а ќе се овозможи и поголем капацитет со што ќе се обезбеди место за секој корисник на јавниот превоз, истовремено намалувајќи го метежот“ велат од Министерството за транспорт и врски.

Екипа на „Дневник“

http://dnevnik.com.mk/?ItemID=B2098A36D6176941ACA0AE8568AF98CB

Време - 18.12.2005

За новите 300 двокатни автобуси, кои треба да ги набави Владата за да го подобри јавниот превоз во Градот, заинтересирани се и приватните превозници. Во нивното здружение „Слобода превоз“ сметаат дека и тие треба да бидат земени предвид кога ќе се реализира тендерот за двокатните автобуси. - Вкупниот број автобуси што во моментов се активни и ги покриваат сите градски и приградски линии е речиси во ист број со оние што Владата сака да ги набави. Затоа не гледам зошто и ние не би биле вклучени во нивниот проект. Доставивме вакво барање до вицепремиерот Зоран Ставревски во кое ги образложивме нашите ставови, но се уште немаме одговор - вели Ленин Јовановски, директор на „Слобода превоз“. Тој смета дека државата, наспроти некои други тврдења, може да помага и во приватниот сектор, а како пример ги посочува субвенциите кај земјоделците. Од Владата, пак, велат дека новите автобуси ќе бидат наменети само за јавното сообраќајно претпријатие „Скопје“. - Идејата на Владата беше да се подобри јавниот градски превоз. Не беа консултирани приватните превозници, иако и тие имаат право да бараат да бидат вклучени во проектот. Но според информациите што ги имам, автобусите што треба да се набават се наменети само за ЈСП - вели Шефик Дураки, портпарол на Владата. Деновиве граѓаните, но и автобуските превозници, со голем интерес го следеа промотивното возење на новиот автобус од марката „мерцедес“, кој истоимената германска компанија го отстапи за одреден период. Во новото возило, направено според најсовремени стандарди, скопјани најпрво можеа бесплатно да се возат на линијата со број 15 на ЈСП, а потоа на линиите 23 и 55 на кои сообраќаат приватните автобуси. Директорот на здружението вели дека сите трошоци за возењето ги покрила фирмата „Мерцедес“, која го осмислила и начинот на промовирање. Кај приватните превозници, според Јовановски, за разлика од градските власти, идејата не била да покажуваат кој автобус е подобар - двокатниот или еднокатниот. - Нам би ни било поинтересно двокатен автобус да се вози низ градот. Дуплиот автобус на „Мерцедес“ што се промовира низ Скопје, сепак сметам дека не е за градот бидејќи не одговара на потребата на патниците - смета Јовановски. Тој смета дека е единечните автобуси се подобри од дуплите, бидејќи кај нив капацитетот се искористува максимално.

http://www.vreme.com.mk/DesktopDefault.aspx?tabindex=1&tabid=1&EditionID=1540&ArticleID=101418