„Јуск“ пристигна и во Скопје

Данскиот гигант, кој е главен конкурент на шведската фирма „Икеа“, по Тетово отвори втора продавница во Скопје

Катерина Шеќеровска



Производите на данската компанија „Јуск“, главен конкурент на шведската фирма „Икеа“, од вчера се достапни и за потрошувачите во главниот град на земјава. По Тетово, „Јуск“ отвори своја продавница и во Скопје, сместена на улицата „Првомајска“, во близина на фабриката „Охис“. „Пред четири години го отворивме првиот салон во Тетово. По Косово и Албанија, Македонија е трета држава каде што сме присутни, а планираме набрзо да се прошириме и во останатите земји на Балканот“, изјави Агрон Беџети, менаџер на „Јуск“ за Македонија.

Салонот на „Јуск“ во Скопје се простира на 1.100 квадратни метри, има 22 вработени и работно време - секој ден од 9 до 21 часот. „Целата стока е од Данска, направивме микс на два концепта - германски и дански. Кај нас може да се најдат најразлични производи, почнувајќи од мебел, душеци, јоргани, перници и се' што е потребно за еден дом, ’слипинг и ливинг‘ - тоа е нашето мото“, додава Беџети.

Регионалниот менаџер на овој дански гигант, Виган Салиху, најави дека нивниот деловен план опфаќа да се отворат нови салони и во Струмица и во Велес, а во период од година-две и уште една продавница во Скопје, од другата страна на Вардар. 

„Се надевам дека ова ќе биде еден чекор понапред кон успешно ширење во цела Македонија. На нашите потрошувачи ќе им понудиме повеќе за цената што ја плаќаат. Ако сте платиле 10 евра, ќе добиете вредност за 15 евра. Така се работи во ’Јуск’. Секогаш има добра понуда и фиксни цени со кои добивате повеќе отколку на друго место. Производите се со висок дански квалитет, но главните артикли, како што се јорганите, перниците и душеците, се ексклузивно произведени во Данска, Норвешка и Шведска, во Скандинавијата“, додава Салиху. 

За продавниците на „Јуск“ се карактеристични достапните цени и квалитетни производи, како и кампањи со промоции што траат две недели, надополнети со миникампањи - на почетокот и на крајот на месецот, во кои се нудат попусти на цели асортимани на производи. 

Продавниците на „Јуск“ се присутни во повеќе од 35 земји во светот. Групацијата, чијшто сопственик е Ларс Ларсен, денес опфаќа повеќе од 1.850 продавници, главно лоцирани во Европа. Успешната приказна на компанијата почнува со иновативното и енергично момче Ларс, кое уште во времето додека го печело занаетот во продавница за текстил, а подоцна и во продавница за мебел, имал идеја да отвори сопствен синџир на продавници за продажба на постелнини. Без пари, но со многу идеи во главата, нашол неколку доставувачи и банка што го поддржала, па првата продавница во Данска ги отворила своите врати за купувачите уште во далечната 1979 година.

Имам впечаток дека М6, кој се франшизери на McDonald's во Македонија, премногу бавно се шират. McDonald's е присутен во Македонија од 94-95 некаде а до сега има само 5 ресторани во Скопје. Дали немаат капацитет (финасиски) или пак не работат доволно рентабилно рестораните навистина незнам.