Расадник

Кисела Вода гради улици на приватно земјиште

Од Градот и од Општината признаваат дека постојат неколку спорни улици со нерешени имотно-правни односи и велат дека додека тече постапката за денационализација, тие нема да се асфалтираат

Општината Кисела Вода и Градот Скопје без да се консултираат и без да водат сметка дека е во тек постапка за денационализација на земјиште, градат улици во новоизградената населба Расадник на место што припаѓа на нашето семејство, тврди скопјанката Добринка Јанковска.

- Новопроектираните улици во Расадник се градат иако се' уште е во тек постапката за денационализација, односно за враќање на имотот што јас и моите браќа и сестри го наследивме од нашите татко и дедо. Според Законот за денационализацијата не е дозволено располагање со имотот што е предмет на денационализација, како и искористување на таквиот имот. На ваков начин општината врши бесправна градба, без претходно да се консултира со наследниците - обвинува Јанковска.

Нејзината реакција следува откако во печатот го прочитала известувањето од градските власти дека екипи на „Улици и патишта“ деновиве почнаа да ги асфалтираат новите улици во населбата Расадник во Кисела Вода. Во информацијата се велеше дека прва ќе се асфалтира улицата Новопроектирана 2, со вкупна должина од 162 метра, а потоа ќе се работи и на другите три улици во населбата.

Спорот за враќање на земјиштето Јанковска, со своите браќа и сестри, го води од 1998 година. Тие имаат и судско решение дека се наследници на имотот. Јанковска вели дека повеќепати се обратила до Општината Кисела Вода, но и до Градот, но оттаму не презеле ништо, иако и' ветиле дека ќе добие обесштетување.

- Бидејќи постапката е во тек, јас не очекувам додека да бидам обесштетена додека не заврши. Го очекувам конечното решение за денационализација и нема да дозволам некој да ми го одземе тоа што е мое. Градските и општинските власти нека ми покажат документи со кои ќе потврдат дека легално ми го одземаат земјиштето, па нека градат улици. Исто така, кај раскрсницата меѓу Првомајска и Народни херои, спроти „Тинексот“ еднаш веќе ми одзедоа земјиште, за кое до ден-денес не ми е дадено обесштетување - огорчена е Јанковска.

Таа во февруари годинава се обратила и до Државниот инспекторат за градежништво, каде што ги запознала надлежните со случајот. Инспекторатот и' наложил на Општината Кисела Вода во рок од три дена да му одговори на подносителот на барањето и да достави копија со одговор до Инспекторатот. Но, досега Општината Кисела Вода не се изјаснила, иако Јанковска вели дека се обратила и до сегашниот градоначалник Марјан Ѓорчев.

Од Градот велат дека асфалтирањето е заостаната обврска, договарана уште од претходниот градоначалник на Скопје, Трифун Костовски, и на Општина Кисела Вода, Џорџе Арсов, и додаваат дека нема да се задира во спорниот дел.

- Не се гради во тој дел што е спорен. Спорен е делот пред салата, каде што не се чепка. Се работи на спротивната страна. Ние не можеме да одиме против Законот и не сакаме да навлегуваме во спорови. Се асфалтира во делот каде што се решени имотно-правните односи и каде е извршена комплетна експропријација на имотите. Кога ќе се заврши постапката и кога ќе се изврши експропријација, општината Кисела Вода и во тој дел ќе може да го реализира урбанистичкиот план - вели Неделчо Крстевски, портпарол во Градот.

Од Општина Кисела Вода признаваат дека има неколку спорни улици, но велат дека додека тече постапката за денационализација, тие нема да се асфалтираат.

http://dnevnik.com.mk/?ItemID=35D0000B37DB0F4D95B3523AA2E774CD