„Еуромакс Рисорсис“ подига средства за истражувањата на руди во Македонија

Кај Иловица ќе никне рудник за бакар вреден 700 милиони евра

Утврдени се геолошки резерви од над 500 милиони тони бакарна руда со средна содржина на металот од 0,22 процента

Иван Бојаџиски

Штип – Дали е на повидок најголемата инвестиција во Македонија? Кај струмичкото село Иловица се очекува да никне нов рудник за бакар, чија изградба според физибилити-студијата на заинтересираната странска компанија би чинела најмалку 700 милиони евра. На овој терен геолошките истражувања на бакарот траат од 2004 година, а првите наоди беа објавени пред два месеца во едно светско економско списание. Според експертите, утврдени се вкупни геолошки резерви од над 500 милиони тони бакарна руда со средна содржина на металот од 0,22 процента. Идентична ваква содржина се експлоатира во рудникот „Бучим“ кај Радовиш, кој од рудното наоѓалиште Иловица е оддалечен околу четириесет километри. Во досегашните геолошки истражувања компанијата има вложено над пет милиони евра.

Концесија за геолошки истражувања на овој терен пред седум години доби американската компанија „Фелпс доџ“. Деновиве тим од менаџерскиот состав на компанијата бил во посета на Иловица. Менаџерите биле мошне задоволни од виденото на теренот и најавиле продолжување на геолошките истражувања. Компанијата која кај нас има своја фирма-ќерка „Вардар Македонија“ пред еден месец поднела до Министерството за економија барање за добивање концесија за експлоатација на рудата. Одговор на барањето се' уште не е добиен, бидејќи за такво нешто, според законот, но и големината и значењето на целиот проект, треба повеќе време.

„Штом компанија која има концесија за геолошки истражувања бара и концесија за експлоатација, тоа значи дека таа е сериозно заинтересирана на самата локација да гради капацитети за преработка на бакарната руда. Тоа барање е најдобар знак дека инвеститорот е задоволен од квантитетот и квалитетот на утврдените рудни резерви. Бакарот, но и другите метали, како оловото и цинкот кои се наше драгоцено природно богатство, поради светската економска криза последните месеци доживува пад на цената на светската берза, но повеќе од сигурно е дека овие метали имаат одлична иднина. И од овој аспект заинтересираноста на компанијата е оправдана“, вели рударски експерт кој бара анонимност со напомена дека не е коректно да се меша во работи во кои големи пари инвестира странска компанија.

Иако од „Фелпс доџ“ не даваат никакви информации во врска со нивните намери во однос на иднината на Иловица, сепак, од сигурни извори дознаваме повеќе детали околу се' поизвесната голема инвестиција во струмичкиот крај. Имено, до овој момент на Иловица се направени 23 дупки, при што се избушени вкупно 13.500 метри. Од геолошки аспект, пак, истражена е само една третина од концесиското поле кое изнесува 5,5 квадратни километри. Но, според експертите, и таа истраженост, а пред се' резултатите од неа, се доволни за да се отвори рудник. „Фелпс доџ“, според нашите информации, веќе напролет ќе продолжи со геолошките истражувања на другите две третини од концесиското поле, а во меѓувреме ќе чека одговор на барањето за експлоатација, што би значело и отворена карта за големи инвестиции во нов рудник за бакар. Претпоставките се дека на Иловица има најмалку за два пати поголеми рудни резерви од досега утврдените.

Геолошки експерти за „Утрински весник“ тврдат дека бакарот, а не оловото и цинкот, е најзначајна суровинска база на метали во државата. Аргумент за тоа наоѓаат во успешната работа и новите инвестиции во засега единствениот рудник за бакар „Бучим“ кај Радовиш, утврдените геолошки резерви на Иловица, новиот рудник „Кадица метал“ кај Пехчево, каде што половина година руската компанија „Солвеј“ врши геолошки истражувања, а првите наоди се мошне надежни, потоа локацијата Боров Дол во општините Конче и Штип, во која, исто така, концесија за геолошки истражувања доби „Солвеј“ и каде што геолозите ќе стартуваат веќе напролет, како и реонот Плавица помеѓу Пробиштип и Кратово за кој концесиската дозвола за геолошки истражувања ја има кратовски „Силекс“.

Турците фрлаат око на балканското рудно богатство

Четиримесечните геолошки истражувања на месноста Кадиица кај Пехчево покажаа големо присуството на бакар

Иван Бојаџиски


Штип – Руската компанија „Солвеј“, во чија сопственост се рудниците „Бучим“ и „Саса“, вложува околу 200 милиони долари во отворањето на уште два нови рудника за бакар и во една фабрика за лужење и производство на катоден бакар. Во рудникот „Кадиица метали“ кај Пехчево ќе бидат инвестирани сто милиони долари, а во рудникот „Боров дол“, кој зафаќа територија на општините Конче и Штип, компанијата влезе со проект тежок 70 милиони долари. Во фабриката за лужење и производство на катоден бакар, во близина на рудникот „Бучим“ инвестицијата од 11 милиони долари е целосно реализирана и од се очекува во декември првото производство на катоден бакар.

Четиримесечните геолошки истражувања на месноста Кадиица кај Пехчево даваат мошне ветувачки резултати во однос на присуството на бакар на оваа локација. Благодарејќи на поволните временски услови работниците на бугарската фирма „Геопс“ бушеа на 14 места при што се избушени вкупно 2.700 метри со просечна длабочина на секоја бушотина од околу 200 метри.

„Врз база на направените лабораториски анализи уште сега можеме да кажеме дека во Кадиица имаме мошне ветувачки резултати во однос на количините и квалитетот на бакарот кој го има на ова подрачје. Нашиот оптимизам дека кај Пехчево ќе никне нов рудник за оксиден бакар сега е уште поголем“, вели Николајчо Николов, управител на новоформираната фирма „Кадиица метали“ и заменик генерален директор на рудникот за бакар „Бучим“ кај Радовиш.

„Кадиица метал“ во Министерството за економија има пријавено план за тековната година со кој се обврзува да направи бушотини во вкупна длабочина од 2.400 метри. Но, доброто време, опремата и квалификуваните работници овозможија натфрлување на обврската која, во однос на геолошките истражувања ја презеде новата фирма на руската компанија „Солвеј“.

„До крајот на годинава, под услов и натаму да имаме време без поголеми снежни врнежи, планираме да направиме нови бушотини со длабочина од 3.000 метри. Нашиот сегашен план е процесот на бушење да го завршиме до крајот на идната година, до кога ќе го имаме и елаборатот кој ќе го доставиме до Министерството за економија заедно со барањето за концесија за експлоатација на рудата, а во 2013 година да започнеме со изградба на фабриката за лужење на бакарните оксидни руди. Ако се' биде добро, како што е сега, тогаш за две до најмногу три години кај Пехчево ќе имаме нов рудник во кој ’Солвеј‘ инвестира сто милиони долари и каде ќе има работа за 150 до 200 работници од Пехчево и околината“, вели Николов.

И, додека на Кадиица е сосема сигурно дека ќе никне нов рудник за бакар, новата фабрика за лужење на катоден бакар во близина на „Бучим“ си ја врши работата, а првите количини катоден бакар ќе го видат светлото на денот веќе идниот месец.

„За нас производството на бакар по пат на лужење е од исклучително значење поради фактот дека бакар добиваме со примена на технологија која производството го прави за 50 проценти поевтино од класичниот начин на производство. Со тоа добиваме една сигурност дека и во време на економска криза и пад на цените на овој метал на светската берза полесно ќе ги пребродуваме проблемите. На ваков начин ќе добиваме годишно производство од 2.500 тони, што заедно со производството на бакар од ’Бучим‘ на светскиот пазар на метали ќе понудиме 10.500 тони“, вели Николов.

Во источниот дел на Македонија каде се наоѓаат сите поголеми рудници на обоени метали („Злетово“, „Саса“, „Бучим“, „Тораница“) со посебен интерес се очекува и стартот на геолошките истражувања на месноста „Боров дол“, каде концесијата ја доби новоформираната фирма под истото име. На овој локалитет вредно работат археолози организирани од Заводот за заштита на спомениците на културата и музеј Штип. Со оглед на фактот дека на овој простор се детектирани значајни археолошки наоѓалишта, археолозите имаат задача да го соберат вредниот археолошки материјал за да направат место за геолошки истражувања. Според Николов, археолозите треба да си заминат на пролет кога ќе стартуваат геолозите.

Завршено истражувањето на локалитетот „Боров дол“

Археолозите од Заводот за заштита на споменици и Музеј на град-Штип завршија со археолошките истражувања на локалитетите Падарница и Камено, кои се наоѓаат на рударското наоѓалиште за бакар „Боров дол“.

Заменик директорот на рудникот „Бучим“, Николајчо Николов информира дека на денешната средба со претставниците од ЗЗС и Музеј на град Штип и претставници од Министерството за култура е соопштено оти овие два локалитети се истражени и раководтсвото на рудникот може да почне со постапката за барање за проширување на рудното наоѓалиште „Боров дол“.

- Овие два локалитети не се наоѓаат во нашето концесиско подрачје. Рудникот „Бучим“ сега ќе бара од Владата да се прошири нашето концесиско подрачје или да распише тендер. Нашиот рудник во археолошките истражувања на овие два локалитети финансираше 60.000 евра, вели Николов.

Тој додава дека новиот рудник „Боров дол“, кој се наоѓа во општините Конче и Штип, ќе овозможи да се продолжи векот на радовишкиот рудник за бакар „Бучим“ од 2020 до 2030 година.

Археолозите ќе истражуваат и на локалитетот „Вршник“, кој е дел од концесиското подрачје на рудното наоѓалиште „Боров дол“. Николов најави дека средствата за истражувањето и на овој локалитет ќе бидат обезбедени од „Бучим“.

Новото рудно наоѓалиште „Боров дол“, се наоѓа во непосредна близина на рудникот „Бучим“ и засега се претпоставува дека има рудни резерви од 40 милиони тони бакар.

Кај Иловица ќе никне голем рудник за бакар и за злато

Мостри од рудата во Иловица се испитувани во Софија, во најсофистицирана лабораторија за метали

Иван Бојаџиски



Штип – Седумгодишните истражување во атарот на селото Иловица во општината Босилово покажаа дека во блиска иднина овде ќе никне еден од најголемите рудници за бакар и злато во Југоисточна Европа. Во поголемиот дел од вкупно 28 дупчења, од кои најдлабокото е близу 650 метри, утврдени се рудни резерви на бакар и злато кои, согласно со содржините на металите во рудата и нивната континуирано растечка цена на светската берза на метали, се мошне погодни за економска експлоатација.

Канадската компанија „Еуромакс“, која ги врши истражувањата, неодамна го објави извештајот со резултатите од една мала и две средно длабоки дупки. Од компанијата најавуваат дека до крајот на годината ќе ги објават и резултатите од најдлабоката дупка од 635 метри, на која работите неодамна се завршени и чии резултати, во домашните рударски кругови, се очекуваат со најголем интерес. На три дупчења со длабочина од 345, па се' до 545 метри, на разни нивоа во нив, според објавените резултати, содржината на бакарот се движи од 0,19 до 0,30 проценти по тон руда, а на златото од 0,20 до 0,45 грама по тон руда. Овие содржини се побогати и повеќе ветувачки ако се споредат со содржините на бакар и злато кои се експлоатираат во „Бучим“, единствениот рудник за вакви метали во Македонија. Во овој рудник од тон руда се добиваат 0,22 проценти бакар и 0,22 грама злато. Покрај овие поволности, локалитетот Иловица по количината на рудата, која засега официјално не се објавува, но за која во научните кругови кај нас се говори како за исклучителна големина, би требало да биде еден од најголемите рудни наоѓалишта за бакар и за злато во Југоисточна Европа.

Мостри од рудата во Иловица се испитувани во главниот град на Бугарија, Софија, во најсофистицирана лабораторија за метали, каде што испитувањата се вршени според меѓународно прифатени методи и процедури. Процесот бил надгледуван од д-р Роџер Мос, квалификувано лице за Иловица, кој потврдил дека испитувањата биле извршени во согласност со најдобрите познати практики во светот за ваков вид испитувања на квалитетот и содржината на металите.

Во однос на доистражувањата на Иловица, од „Еуромакс“ најавуваат соработка со некоја позната светска рударска компанија, а во план е во оптимален рок од 90 дена да се изврши дупчење на уште неколку локации на Иловица во вкупна длабочина од 10.000 метри, процес во кој партнерот ќе треба да вложи три милиони евра. Поради утврдените квантитативни и квалитативни капацитети на Иловица, се цени дека повеќе светски рударски компании ќе покажат интересирање за ова истражување. Д-р Квинтон Хениг, технички советник на канадската компанија, вели дека тие се задоволни од добрите резултати на Иловица и дека се надева на решавање на сопственичките интереси во овој проект.

Рударски експерти од Источниот регион во кој се сконцентрирани најголемите македонски рудници „Саса“, „Злетово“,„Бучим“ и „Тораница“ вчера не беа расположени да ги коментираат утврдените параметри на Иловица. Од сите добивме одговор дека е тоа процес што го води странска компанија и дека не би било фер, онака неповикани, да се мешаат во нивниот бизнис во рударството. Сепак, дел од нив ни рекоа дека јавно објавените содржини на металите бакар и злато во рудата се на средно ниво, но оптимизмот дека тие содржини ќе бидат и повисоки го влева фактот дека во подолните слоеви на локалитетот Иловица може да се очекуваат зголемени вредности на бакарот и на златото.

Инаку, процените на светските експерти за металите и нивната употреба во светската економија се дека бакарот и златото, покрај оловото и цинкот, ќе бидат се' побарани на нашата планета. На светскиот конгрес на стопанските комори одржан уште во 2004 година во Бразил, беше најавена зголемена побарувачка на метали, а со тоа и нивни повисоки цени. На тој конгрес беше точно предвидено дека бакарот во тековната година ќе достигне цена од 10.000 долари по тон, а беше погодена и берзанската цена на златото. Светските експерти прогнозираат дека во 2017 година бакарот ќе има цена од 17.000 долари по тон и дека цената на златото, со секоја тековна година, постојано ќе се зголемува.