Реставрација на Камени Мост

Конечно светло на темниот Камени мост

Во рок од 40 дена ќе треба да се постават новите светилки на Камениот мост. Како што дознаваме тие треба да бидат набавени од Италија, а до Новата година се очекува дел од мостот да биде осветлен

Камениот мост кој кратко време по негова реконструкција и осветлување пред неколку години, повторно беше во темница, ќе се илуминира по втор пат. Конзерваторскиот центар -Скопје, минатата недела потпиша договор со фирмата "Макаус" која во рок од 40 дена ќе треба да ги постави новите светилки на мостот. Како што дознаваме, тие треба да бидат набавени од Италија, а до Нова година се очекува дел од мостот да биде осветлен.
-Проектот се однесува на поставување на вградени светилки на бочната страна од мостот односно на оградата, на газечката површина, како и на лаците на мостот кон реката Вардар, со што мостот целосно треба да биде осветлен. Средствата се обезбедени од Министерството за култура, но колку ќе бидат искористени ќе зависи од тоа што од постоечката инсталација ќе може да се искористи. Допрва треба да се изврши проверка кои од каблите се употребливи со оглед дека во моментот светилките се откорнати од своите лежишта, а дел од инсталацијата уништена, вели Стојчевска Љиљана, инженер проектант.

Инаку, поставените светилки на мостот само неколку месеци по негова реконструкција, беа уништени од несовесните граѓани.
Скопјани, пак, се сомневаат дека и оваа илуминација ќе биде од подолг век на траење.
-Срамота е мостот кој е во самиот центар на градот ноќе да биде во целосна темница, а при секое поминување по него во вечерните часови да ве лазат морници и да очекувате дека некој ќе ве нападне и ограби. Ова е сепак историски споменик кој доколку се осветли соодветно, ќе му даде сосема нов и атрактивен изглед на целото централно градско подрачје, сметаат скопјани.
Довршувањето на клуновите на мостот и затворање на лежиштата од конзолите, кои стојат во вид на отвори, според надлежните пак, ќе остане за наредниот период кога ќе бидат обезбедени пари за таа намена. Од конзерваторскиот центар потенцираат дека како трета фаза останува да се доврши и поврзувањето на Камениот мост со плоштадот кон Скопската чаршија. Во овој дел неопходно е отворање на една третина од мостот, а предвидено е да се извршат и археолошки истражувања. Овој проект би предвидел и уривање на околу 60 метри постојни кејски ѕидови и изведување на нови со партерно уредување и илуминација на непосредна околина.


Даниела ТРАЈКОВСКА
Фото:Ѓ.Личовски