Скопска обиколница [A2/A4]

Проблеми на неразвозената обиколница

На делницата што ја градеше „Терна“ дошло до слегнување на насипот кај Стопански Двор

Билјана Ангеловска

Неколку месеци откако беше пуштена во сообраќај, на делницата од Оризари до Сарај од обиколницата на Скопје се јави проблем. На делот од автопатот околу главниот град, што го градеше грчката фирма "Терна", дојде до слегнување на насипот кај Стопански Двор. Проблемот се појавил пред повеќе од половина година, што значи само по четири месеци откако овој дел од обиколницата официјално беше предаден во употреба.

Иако, за среќа, нема никакви поголеми последици за учесниците во сообраќајот, бидејќи недостатокот бил забележан навреме, сепак, неоспорен е фактот дека толку голем и важен проект доживеа непријатност многу брзо откако профункционира.

Како што дознава „Утрински весник“, без поголема врева веднаш е интервенирано, така што санацијата веќе е при крај. Наспроти обидите да се минимизира случајот, настојувањето да се убеди јавноста дека аномалиите се појавиле во гарантниот рок и без пречки ќе се санираат, како и одбивањето отворено да се говори за тоа, внесуваат сомнежи околу сериозноста на проблемот.

Некои градежни работници неофицијално велат дека проблемот настанал поради лошо извршеното фундирање, но дека главна причина најверојатно е фактот што не се оставени специјални отвори во ѕидот, таканаречени барбакани, низ кои би истекувала водата. Поради ваквиот пропуст, бидејќи нема каде да истекува, водата што се слева кон насипот врши притисок врз ѕидот, поради што дошло до слегнување на насипот.

Наспроти тоа, други стручни лица тврдат дека воопшто не може да се зборува за нечиј пропуст или вина за настанатиот проблем. Според нив, станува збор за вода што доаѓа од горниот дел и се слева во рамнината кај потпорниот ѕид. Бидејќи, како што објаснуваат експертите, темелењето е правено на цврст камен материјал (лапор), не е можно точно да се предвиди од каде и во колкава количина ќе дојде водата, бидејќи се' до пробивањето на трасата воопшто и ја немало на тоа место. Набрзо по предавањето во употреба на обиколницата се забележани пропаѓање на коловозот на една страна и појава на одредени деформации, по што веднаш е интервенирано. Нашите соговорници велат дека населението од околните места, најверојатно, ја пренасочило водата за наводнување на своите обработливи површини, па така таа сега се слева кон трасата и прави проблеми. Поради тоа, направена е длабока дренажа покрај ѕидот што ќе ја прифати водата.

„На насипот не се направени барбакани, бидејќи такво нешто не предвидел проектот, а доколку и би постоеле, можеби би направиле поголеми проблеми. Во случајов, објективно нема проблеми, се' е во гарантниот рок, така што 'Терна' ќе го реши проблемот“, изјави Димитар Тасевски од Агенцијата за државни патишта.

Проблемот што се јави на обиколницата на Скопје, колку и да е мал или да претставува нормална појава во тек на гарантниот рок на еден објект, сепак, остава непријатен впечаток дека работата можеби не била доволно квалитетно сработена.