Возен парк (ЈСП - двокатни автобуси)

Со директива од 2005 година Европската Унија побарала од градовите што користат двокатни автобуси да го намалат нивниот број поради негативните искуства пред сè во безбедноста на сообраќајот. Со одлука на Владата, пак, Министерството за транспорт и врски го измени тендерот за набавка на двокатни автобуси за Скопје, па наместо претходно предвидените 102, ќе се купат 302 возила. Од Јавното сообраќајно претпријатие, на кое ќе му се подарат автобусите, велат дека оваа набавка нема сама по себе да донесе поквалитетен јавен превоз ако не се исполнат и други предуслови. Експертите за сообраќај во градот, пак, истакнуваат дека замената на возилата може да предизвика многу проблеми.

ПОГОЛЕМ ТРОШОК ЗА ИСТ КАПАЦИТЕТ

Според градскиот сектор за сообраќај, одлуката на Владата е позитивна, но одржувањето на автобусите може да предизвика негативни последици. Оттаму велат дека еден од проблемите е што возачот ќе нема прегледност што се случува на двата ката ако не се постават камери во горниот дел.

- Капацитетот и на двата типа автобуси е ист, тие собираат од 90 до 100 патници. Но двокатните се покабести и имаат поголеми трошоци за одржување и за гориво. Потребно е целосно да се смени јавниот превоз и да се воведат нови технологии за да се одржуваат возилата - велат оттаму.

СЕ ОДЛОЖУВААТ И ТЕНДЕРСКИТЕ РОКОВИ

Бидејќи бројот на бараните автобуси се зголеми за трипати, Министерството за транспорт и врски го одложи и рокот за доставување понуди во веќе распишаниот тендер. Наместо на 3 ноември, како што беше предвидено досега, тој ќе заврши на 1 декември.

- Првите 102 автобуси би требало да ги добиеме во почетокот на идната година. Од нив 100 се од затворен тип и ќе служат за јавен превоз, а два од отворен и ќе бидат наменети за панорамско разгледување на Скопје и на Охрид. Останатите 200 возила треба да се достават во рок од три години. Откако ќе ги купи, Владата ќе му ги предаде на ЈСП како донација, а претпријатието ќе треба да ги одржува - вели Драган Симоновски, портпарол на Министерството.

ДОПОЛНИТЕЛНИ МЕРКИ

Александар Бошковиќ, в.д. директорот на ЈСП „Скопје“, вели дека претпријатието не било консултирано за измените во набавката и дека треба да се исполнат повеќе услови за Скопје да добие квалитетен јавен превоз.

- Со оваа набавка целосно ќе се заменат старите автобуси. Сега користиме од 260 до 290 возила дневно, што значи дека кога ќе ги добиеме новите, нема да мораме да ги користиме постојните. Но за квалитетен јавен превоз пресудно е жолтите сообраќајни ленти наменети за автобусите да бидат слободни, да се регулира зонското паркирање, да се воведат „интелигентни билети“ и слично. Мора да се подобри и однесувањето на граѓаните. Сè би било поинаку кога не би ни требале редари да ја одржуваат дисциплината во автобусите. Не можеме да го решиме овој проблем и затоа сè оставаме на свеста на граѓаните - додава Бошковиќ.