Следната пролет со работа ќе почне најголемото казино во Македонија, кое се протега на површина од 30.000 квадратни метри. Во Гевгелија и околината каде што е лоцирано казиното Принцес веќе функционираат неколку казина од кои добро профитираат газдите, гевгеличани, но и државата

Текст и фотографии: Петре ДИМИТРОВ

На само неколку метри пред досега најпознатото македонско казино Фламинго, пред граничниот премин со Грција, Богородица, никнува ново, три пати поголемо казино - Принцес, зад кое стои турската компанија Принцес група на компании. Казиното се гради на површина од 30.000 квадратни метри. Во склоп на Принцес има и хотел од брендот Шератон (за кој турската компанија има купено лиценца) со 120 соби, неколку ресторани и шопинг-центар. Градоначалникот на Гевгелија Иван Франгов кој летово имаше средба со Суди Озкан, претседател на Принцес група на компании, за Форум вели дека казиното треба да почне со работа во март следната година.
“Работите се одвиваат со забрзано темпо и според планираното казиното ќе биде подготвено првите гости да ги прими во март следната година”, вели Франгов.
Градежните работи на новото казино од кое Форум објавува ексклузивни фотографии ги изведува македонската компанија Гема-груп .
Според Озкан, кој летово ја посети Гевгелија, овој инвестициски зафат ќе чини над 30 милиони евра, а во комплексот ќе се отворат нови 700 до 800 работни места.

КОИ МУ СЕ КОНКУРЕНТИ НА ПРИНЦЕС?

Лукзус, дискреција, забава, висок адреналин, одлична храна и чувство дека сте најбогатиот човек на светот. Тоа е светот на казината во Гевгелија, кој не се разликува многу од атмосферата во еден Лас Вегас, на пример. Богатиот свет што ве опкружува и односот на менаџметот и персоналот кон клиентите, ќе направат да се чувстувате опуштено и да заборавите каде сте, а оптимизмот дека ќе добиете на една од многуте игри на среќа е задолжителен. За врвниот професионализам на менаџерските тимови на казината и персоналот често пишуваат и грчките медиуми. Додека македонската јавност не знае многу за овој бизнис, грчките медиуми им препорачуваат на своите менаџери да одат во казината во Македонија за да научат што е добра услуга и менаџмент.
Фламинго, кое работи неколку години, важи за едно од најлуксузните казина на Балканот и едно од најубавите во Македонија. Странските и домашните инвеститори, кои во ова казино вложиле 30 милиони евра, внимавале и на најситните детали. Подвижни скали ве носат директно во главното казино. Коцкарницата е со позлатен плафон и кристални лустери. Наоколу ве опкружуваат скапи репродукции од дела на познати светски сликари, меѓу кои и сликата на големиот ренесансен мајстор Сандро Ботичели Раѓањето на Венера. Масите за рулет се од најпознатата италијанска фирма Абијати. Казиното е наменето исклучиво за странци, а во последно време среќата може да си ја пробаат и побогатите Македонци. Повеќе од 90 отсто од гостите доаѓаат од соседна Грција. Во казиното работат над 400 лица.
Во Гевгелија работи и казиното Аполонија во рамките на поранешниот хотел Југо, а за обичните смртници тука е и електронско казино Базен, а од пред извесно време и казиното Александар. 
Принцес има конкуренција и во Дојран каде што работат Хит Горица и Аполонија.
Неофицијално во текот на една вечер во овие казина се вртат и до еден милион евра. Понекогаш и повеќе, велат дискретно менаџерите.
Најчести гости се луѓе од средната грчка класа од Солун, Воден, Лерин и други градови од северниот дел на Грција. Во казината велат дека неретко имаат гости дури и од Атина. Сите поголеми казина функционираат на принципот на клуб-картички и во нив пристапот е дозволен само за членовите на клубовите. Кој ќе стане член на овие клубови е одлука на менаџерскиот тим на казиното. За менаџерите ваквата бизнис-стратегија значи постојана клиентела која сака дискреција и доверба. За да се олесни транспортот на клиентите, казината имаат сопствен возен парк со кој ги земаат гостите од граничните премини и ги пренесуваат до казината. За викендите, кога има најголема фреквенција, за гостите се ангажира и дополнителен транспорт.

ЕМАНЦИПАЦИЈА НА ГЕВГЕЛИЧАНКИ

Вработените во казината се претежно млади лица кои одлично зборуваат грчки, англиски и по уште некој странски јазик. Тие имаат и одлична можност за доусовршување на своите вештини. Сите казина инвестираат во дообразување на своите вработени. Вработените не сакаат да зборуваат за своите плати, но се шпекулира дека најниската изнесува околу 500 евра. Вработените се задоволни. Велат дека со казината се отвори можност да се најде работа во родното место. Високите плати и престижот на казината се доволна причина секој во овој регион да посака да работи во нив.
Вработувањето во казината има и родова димензија. Гевгличани на хумористечен начин велат дека откако се отворија казината, жените во Гевгелија станаа поеманципирани и независни.
“Веќе има и неколку растурени бракови. Жените се искурназија. Заработуваат добро, имаат одлична можност за дообразување, но и можност да запознаат пософистицирани типови мажи, па не секое момче или сопруг е среќен кога неговата девојка или сопруга ќе соопшти дека ќе работи во казино”, велат Гевгеличани.

ЌАРОТ ЗА ДРЖАВАТА

Освен сопствениците и вработените, корист од казината има и државата. Казината плаќаат фиксен надомест за секој апарат за коцкање. Колку повеќе маси и автомати има во едно казино, давачките кон државата месечно се повисоки. Според информации од Министерството за финансии, за секоја рулет маса се плаќа по 3.000 евра месечно, по 1.725 евра за други маси,
675 евра за автомат на кој истовремено може да играат повеќе играчи и
375 евра за автомат на кој може да игра еден играч. За секоја добивка над 10.000 денари се плаќа персонален данок од 10%. Сопствениците на казината ја полнат државната каса и по основ на давачки за вработените.
Лиценцата за отворање казино е 520.000 евра (лиценцата важи 6 години, со тоа што половина од изнозот се уплаќа веднаш, а останатиот дел од износот на шест месечни рати).
Менаџерите велат дека, и покрај тоа што со скепса се гледа на овој бизнис, во практика се покажува дека се работи за чиста ситуација каде што не се можни малверзации. Очигледно Македонија треба да ги искористи позитивните законски регулативи за коцкарскиот бизнис до влезот во Европската Унија, кога правилата за игри на среќа ќе се заострат.    

Ништо без добра храна
Добрата забава оди со добра храна, па магнет за соседите Грци, кои повторно почнаа да се враќаат во Гевгелија не само по коцката, се и добрите ресторани во градот каде што се нуди типична храна за ова поднебје. За еден од најдобрите важи ресторанот Јавор-Агапи, со кој раководи Агапи Ефтимова. Ресторанот има традиција од над 28 години. Овде се подготвуваат традиционални јадења, а надалеку е познато јагнешкото месо. Чести гости овде се познати политичари, грчки, српски бизнисмени… Без храната на овој ресторан, кој нуди и кетеринг, не поминува ниту еден коктел во Гевгелија.

http://forum.com.mk/#_tools/article/9898/view