Градот полупразен, жичницата преполна

Според статистиките на претпријатието, во текот на летото во работните денови жичницата ја посетувале од 600 до 800 граѓани, додека, пак, за викендите и по 2.500 патници

Во ЈСП се изненадени од посетеноста на жичницата во летниот период

И покрај тоа што е сезона на годишни одмори, а температурите во Скопје се неподносливо високи, скопјани не се колебаат за да се качат на жичницата на Водно. Во изминативе 15 дена Јавното сообраќајно претпријатие продало 16 илјади билети, иако од 1 јули тие чинат по 100 денари, за разлика од промотивниот период во јуни кога се продаваа по 50 денари. Оттаму велат дека се изненадени од посетеноста.

- Не очекувавме дека ќе има толку многу посетители во период кога градот е речиси празен и кога температурите достигнуваат и до 40 степени. Од почетокот на месецов, па до вчера продадени се вкупно 16 илјади билети, не броејќи ги оние бесплатните, за пензионери и за деца - велат од ЈСП „Скопје“. 

Според статистиките на претпријатието, во текот на летото во работните денови жичницата ја посетувале од 600 до 800 граѓани, додека, пак, за викендите и по 2.500 патници. Некои што годинава не отишле на одмор велат дека жичницата им била единствена разонода во летните денови. 

- Градот беше празен и не се чекаше на ред за возење, како што беше во првите месеци. Се случуваше со друштвото да одиме на Водно и по неколку пати неделно, наместо на базен, се разладувавме во сенките кај Милениумскиот крст. За разлика од порано, мислам дека минатиот месец имаше и најмногу странци што се возеа на жичницата, а голем беше и бројот на баби и дедовци што ги носеа внуците - вели скопјанецот Марко Михајловски.

Од ЈСП велат дека наскоро ќе се почнат да работат и дрвените куќарки, кои се наоѓаат на почетната станица на жичницата. Тендерот со кој претпријатието требаше да ги даде под концесија е веќе завршен, но поради тендерската постапка сé уште не смеат да кажат кои фирми ги добиле куќарките под наем.