Зонско паркирање во Скопје

Зонско паркирање пред „Тренд“

До крајов на неделава пред кафулето „Тренд“, како и спроти „Мекдоналдс“ во Аеродром ќе почне да се наплаќа за паркирање по зонскиот систем за наплата. Капацитетот пред „Тренд“ е само за шест возила со можност за паркирање од максимум два часа, а еден час ќе чини 45 денари. Во Аеродром, пак, на паркингот покрај зелените згради се обележани 220 места за паркирање. Таму ќе биде дозволено неограничено паркирање што ќе чини 25 денари од час. За станарите, месечниот билет изнесува 100 денари, односно 300 денари за второ возило. (Дс.Т.)

Зонското паркирање во Центар ќе добие нов газда

ЈП „Паркинзи на Општина Центар“ го презема паркирањето на општинските улици

Деспина Трајковска


Јавното претпријатие „Паркинзи на Општина Центар“ и, дефинитивно, ќе му ги одземе зонските паркиралишта на ЈП „Градски паркинг“ што се наоѓаат на општинските улици во Центар. Такви засега се паркинзите на „Ленинова“ и на „Орце Николов“. Иако ова се' уште е само на хартија, општинското претпријатие за паркирање има се' што е потребно да ја реализира идејата. Ја има поддршката од Советот како негов основач, градоначалникот Владимир Тодоровиќ му вети субвенции за имплементација на системот, а и градоначалникот на Скопје, Коце Трајановски, неодамна најави дека „Градски паркинг“ ќе му ги отстапи зонските паркиралишта на Центар во оној момент кога нејзиното претпријатие ќе биде подготвено да ги реализира намерите на терен.

Тоше Делјановски, директор на ЈП „Паркинзи на Општина Центар“, вчера информираше дека наскоро претпријатието ќе распише тендер за избор на фирма што ќе го имплементира софтверот за зонскиот систем. Во меѓувреме Советот ќе треба да донесе конечна одлука за реализација на идејата, како формалност во целата постапка откако на последната седница едногласно усвои соодветен заклучок.

„Со едногласната поддршка од Советот, практично, се отворија вратите за реализација на нашите планови околу зонското паркирање. Со оглед на тоа дека Општината ќе не' субвенционира, нема пречки за реализација на идејата. Останува уште да видиме дали ќе најдеме средства за купување пајак-возила потребни за функционирање на зонскиот систем за наплата или, пак, нив ќе ги обезбедиме преку јавно-приватно партнерство“, објаснува Делјановски, кој во зонското паркирање гледа извор на средства за непречено функционирање на претпријатието што неколкупати досега добиваше субвенции од општинската каса.

Инаку, од фирмите што имплементираат соодветни софтвери ќе зависи дали зонското на Центар ќе биде идентично како она на ЈП „Градски паркинг“ во однос на начинот на наплата и другата потребна организација. Извесно е дека интерес на тендерот ќе пројават некои од осумте фирми што неодамна изразија подготвеност за 100.000 до 120.000 евра да го имплементираат системот за потребите на „Паркинзи на Општина Центар“. Генерално, сите тие дале гаранции дека би вовеле пософистициран систем во однос на оној што го применува „Градски паркинг“, како во однос на начинот на плаќање на паркирањето, така и од аспект на регулирање на сообраќајот. Системите нуделе можност за плаќање, освен преку мобилен телефон и преку Интернет, како и со кредитни и со дебитни картички. Истовремено, нуделе и разработени сообраќајни решенија што би гарантирале растоварување на сообраќајниот метеж, односно, систем за правец на движење на возилата.

Од ЈП „Градски паркинг“ вчера не беа изненадени од новонастанатата ситуација. „Претпријатието не стравува толку од конкуренција колку што смета дека најголема штета ќе трпат граѓаните. Тие ќе се доведат во ситуација да се соочуваат со паралелни зонски системи на наплата за паркирање доколку во случај од Центар имаат поразличен систем“, накусо коментира директорот Борче Јакимовски.

Тој и натаму смета дека формално-правно единствено ЈП „Градски паркинг“ ги има ингеренциите да го регулира паркирањето во Скопје. Сепак, според него, Градот Скопје како основач на „Градски паркинг“ ќе го има последниот збор. Оттаму, пак, во последниве месеци не се противат на идејата на Општина Центар, што не беше случај и претходно.

Лисици за автомобилите на неплаќачите на зонското паркирање во Аеродром

Јавното претпријатие за јавни паркиралишта „Градски паркинг“ од понеделник ќе поставува блокатори за тркала (лисици) на возилата паркирани на паркинзите во Општината Аеродром што не ги почитуваат правилата на зонскиот систем на работа.

Од „Градски паркинг“ појаснуваат дека блокаторите за тркала ќе им се поставуваат на оние возила кои не платиле за паркирање, доплатен билет или други трошоци, кои го пречекориле дозволеното време на паркирање, не ја почитуваат хоризонталната и вертикална сигнализација, паркирале на место за лица со посебни потреби. Ќе се постапува и по Одлуката за јавни паркиралишта од значење за градот Скопје и Правилникот за начинот и мерките за отстранување на оштетени, неисправни, неправилно и непрописно паркирани возила на подрачјето на град Скопје.

На возилата на кои ќе им бидат поставени блокатори за тркала ќе биде прикачена и писмена опомена во форма на налепница, со која имателот на возилото се повикува доброволно да го отстрани блокаторот, односно да се обрати на наведениот телефонски број за да се деблокира возилото. Налепниците ќе ги поставуваат комунални инспектори, односно контролорите на зонско паркирање во „Градски паркинг“.

По поставување блокатор, ако сопственикот на возилото не се појави во рок од 60 минути од моментот на поставување, возилото ќе биде транспортирано во депото на пајак-службата.