Такси превоз

ДИВИТЕ ТАКСИСТИ ГО ПРЕЗЕДОА БИЗНИСОТ?! Нема ефикасни контроли, граѓаните скапо го плаќаат доцнењето

Дивите таксисти повторно задоа замав во Скопје поради тоа што нема редовни инспекциски контроли на овој превоз. Во периодот кога беше драстично скратен превозот со градските автобуси, граѓаните често се решавале за превоз со такси, а некои од нив доживеале мошне непријатни искуства кои скапо ги чинеле.

Скопјанецот Мартин. Ј. одлучил да се качи во такси од трговскиот центар „Ист гејт“ бидејќи брзал за да стаса на работа. Иако бил свесен дека таксистите што стојат на оваа локација се нелегални, на крајот бил непријатно изненаден од сумата што ја платил.

– Знам дека таксистите што чекаат таму се диви, ама порано барем имаа таксиметар. Сега, забележувам дека користат мобилни телефони со апликација која симулира таксиметар. Телефонот таксиметар покажа астрономска сума за релација од неколку километри, некои 400 денари. Го прашав таксистот зошто е толкава сумата, а тој се насмеа и ми рече: „Тоа е, другар“. Сфаќам дека не може секој да работи во такси компанија, но барем да го наштелуваат телефонот да одбројува како таксиметрите. Не мора да ги ограбуваат луѓето и да им земат цела дневница за едно возење – вели нашиот соговорник.

Тој истакнува дека вакви инциденти се чести и дека дивите таксисти стојат на различни локации во градот, вклучувајќи ги и популарните места како што се спроти „Холидеј ин“ и „Ла делишс“ во Буњаковец.

– Некој како мене ќе се расправа, ама има луѓе на кои им е срам да се расправаат. Понекогаш нема достапни такси возила од такси компании и луѓето немаат избор, па мора да се качат кај некој таков. На крајот на краиштата, можеби и воопшто не треба да се качуваме кај нив и треба да ги саботираме, и така повеќето не работат легално и немаат свои фирми – вели скопјанецот Мартин.

Проблемот со дивите таксисти не се одразува само врз џебот на патниците, туку и врз приходите на легалните такси компаниии и приливите од даноци во државната каса.

Претседателот на Групацијата на авто-такси превозници, Сашо Рајчановски за Плусинфо истакнува дека бројот на нелегални такси возила во Скопје е во пораст, што ја прави ситуацијата алармантна.

– Секој ден сè повеќе патници се одлучуваат за овие возила, а ние како легални превозници не можеме да им излеземе во пресрет. Таксистите не ги следат прописите и овој проблем станува сè поочигледен – вели Рајчановски.

Според него, основната причина за зголемената активност на дивите таксисти е големата побарувачка за транспортни услуги, особено поради проблемите со градскиот автобуски превоз, но и недостигот на контрола и санкции од градските власти.

– Граѓаните не само што се соочуваат со нелегални превозници, туку исто така мора да платат многу повеќе отколку што би платиле за легално такси возење. Иако стандардната цена е од 150 до 200 денари, многумина од нив плаќаат по 400 или дури 500 денари – додава Рајчановски.

Тој апелира до градските власти да преземат мерки за да ја решат ситуацијата. Според него, доволно е да се насочат инспекторите да ги контролираат нелегалните таксисти и да се санкционираат оние кои не ги исполнуваат прописите.

– Не ни требаат нови средства. Бараме само сообраќајните инспектори да ја засилат контрола и да го спроведат законот. Проблемот ќе продолжи да расте ако не се преземат мерки. Ако не се реши ова во блиска иднина, тогаш организираната такси служба може да исчезне. Градот не го спроведува доволно строго законот, а инспекциските контроли не се доволно ефективни. Овој проблем не се решава само со казни за возачите, туку и со зголемена свест кај самите граѓани за тоа како да препознаат нелегални превозници. Ние бараме од градските власти да го регулираат овој сектор и да се грижат за граѓаните – вели тој.

Од Групацијата на авто-такси превозници истакнуваат дека и граѓаните треба да бидат повнимателни при изборот на такси превозник.

– Граѓаните не треба да плаќаат за услуги ако не добијат фискална сметка. Секој легален таксист е должен да издаде фискална сметка. Ако не ја добиете, тоа е јасен знак дека станува збор за нелегално возило. Ако продолжи оваа пракса, иако цената може да изгледа пониска или понудата пофлексибилна, последиците може да бидат сериозни. Мораме да работиме на зголемување на јавната свест и на мотивирање на граѓаните да пријавуваат неправилности – велат од Групацијата.

За подемот на дивите таксисти во Скопје, такси-превозниците ја обвинуваат градоначалничката Данела Арсовска, зашто не спроведува инспекциски надзор.

– Градот Скопје е најголем виновник за колапсот на такси превозот. Никој не контролира, и нормално е дека сè повеќе колеги ги напуштаат компаниите каде имаат давачки и си возат на диво. Дури 80 отсто од таксистите се диви. За една година нема да остане ниту една такси-компанија, ќе нема граѓаните каде да бараат такси, ќе има само диви таксисти. Не е нормално за три години мандат градоначалничката Данела Арсовска да нема ниту една средба со нас. Со претходните градоначалници сме имале средби во Градот еднаш месечно – коментира Рајчановски.

Според актуелната тарифа, стартот во такси возилата е 40 денари, а за секој изминат километар се наплаќаат 25 денари кога цената на горивото е до 75 денари за литар. Втората тарифа предвидува старт од 50 денари и 30 денари за километар кога цената на горивото е помеѓу 75,50 денари и 119,50 денари, додека третата тарифа е 60 денари за старт и 35 денари за километар кога цената на горивото е над 120 денари за литар.

Од Министерството за внатрешни работи велат дека не се надлежни да вршат надзор врз дивите таксисти.

– Единицата за безбедност на патниот сообраќај при СВР Скопје не е надлежна за контрола на такси возила кои вршат нелегален превоз. Ваквите контроли се спроведуваат во соработка со Град Скопје, конкретно со Секторот инспекторат, кој е надлежен за вакви случаи – велат од МВР.

Оттаму додаваат дека за поконкретни информации и податоци во врска со бројот на откриени случаи на диви таксисти, граѓаните треба да се обратат директно до надлежните инспекциски служби во Град Скопје.

https://plusinfo.mk/divite-taksisti-go-prezedoa-biznisot-nema-efikasni-kontroli-gra-anite-skapo-go-pla-aat-docne-eto/

БИТОЛСКИТЕ ТАКСИСТИ БАРААТ ПОКАЧУВАЊЕ НА ЦЕНИТЕ, ВЕЛАТ ДЕКА СЕ ТОЛКУ ЕВТИНИ ШТО ЛУЃЕТО СО НИВ ОДАТ И ПО СОЦИЈАЛНА ПОМОШ

Битолските таксисти поднесоа иницијатива до општинскиот Совет за отпочнување постапка за измена и дополнување на тарифата за вршење на автотакси превозот во Битола.

Поради зголемувањето на трошоците за работа, тие бараат корекција на цените, со тоа што стартот во прва тарифа останува 60 денари, а секој следен километар ќе се наплатува 35 денари. Во втора тарифа, која би се вовела во специјални околности, стартот да биде 60 денари со 40 денари за дополнителен километар. Тарифата за трета смена да биде со почетни 60 денари, а потоа по 45 денари за извозен километар. Доколку таксистот го чека патникот еден час, тој ќе треба да му плати 400 денари. Сегашната цена има ист старт, а потоа секој километар се плаќа според таксиметар.

„Отпорано размислуваме да ја укинеме третата смена, оти не сака никој да вози. Не вадат пари, а прават многу празни километри. Ако нема покачување, ќе нема ни трета смена. Такси превозот во Битола досега никогаш не бил во ваква ситуација. Трошоците енормно ни се зголемија, а возиме по стари цени. Последното минимално покачување се стопи за два месеца. Дојдовме во ситуација да не вршиме такси превоз, туку да сме доставувачи на роба. Си порачуваат такси до најблиската пицерија, нарачуваат две пици и по 30 денари им е поевтина зашто ги земаат за дома, а ние за беспари, за 60 денари, ручекот им го носиме на маса“, рекоа од Здружението на такси превозници на општинската Комисија за финансии и буџет.

Велат поскапени се и поправките на возилата. Ако претходно плаќале од 2.500 до 3.000 денари за работна рака кај механичар за промена на ламела, сега услугата чини 5.000 до 6.000 денари. Поскапеле и вулканизерските услуги и администрацијата за лиценца.

„Наместо да се подобруваме во такси превозот, ние стагнираме. Таксистите се скоро сите пред пензија и ќе возат уште некоја година. Ниту возен парк можеме да подобриме, ниту на некој возач да му понудиме подобра плата. Затвори уште една компанија. Останавме една база да го покрива целиот град. На фирмите поевтино им е да се возат со такси отколку да имаат свое возило. Па, има граѓани кои по социјална помош одат со такси“, рекоа од Здружението.

Денеска на седница на Советот повеќето советници гласаа за отпочнување на ваквата иницијатива, а дел од советниците бараа да им се образложи точно методологијата по која се бараат новите цени и критикуваат дека Општината не успеала да обезбеди општински јавен превоз.

https://sdk.mk/index.php/dopisna-mrezha/bitolskite-taksisti-baraat-pokachuvane-na-tsenite-velat-deka-se-tolku-evtini-shto-lugeto-so-niv-odat-i-po-sotsijalna-pomosh/

ОХРИДСКИТЕ ТАКСИСТИ ОДБИВААТ ДА ВОЗАТ НИЗ ГРАД, СЕДАТ ПРАЗНИ И ЧЕКААТ ТУРИСТИ ЗА НАДВОР ОД ОХРИД ЗА ПОВИСОКА ЦЕНА

Дел од охридските таксисти одбиваат да ги возат патниците на градски локации и ги препраќаат кај други колеги, додека тие чекаат патници кои за поголема сума би патувале надвор од Охрид.

„Се возев со такси од центарот на Охрид до апартманот каде што сме сместени кој е оддалечен 3 километри од центарот. Според таксиметарот, платив 150 денари. Утредента, сакав да фатам од такси од главната станица во центарот, спроти чаршијата. Знаејќи дека возилата заминуваат по ред, сакав да се качам во првото. Таксистот ме препрати ‘поназад’ кај колегите. Вториот и третиот го направија истото. Кога на четвртиот му ја кажав адресата ми рече: ‘Може, 250 денари’. Кога го прашав како вчера било 150 а денес 250 и од каде знае колку ќе покаже таксиметарот тој ми подвикна: ‘Ало, бегај, не шири негативна енергија“, вели еден турист од Скопје.

На крајот, кога и петтиот таксист го прашал колку поназад да оди во редот за да најде возило, тој му рекол: „Бегај горе на патот. Нема да возиме низ град, чекаме за подалеку“. Откако му го кажал тоа, таксистот заедно со другите колеги продолжил да игра и да пее на музика која свирела од околина кафулиња.

Според отворените податоци на Секторот за комунални дејности, сообраќај и улици на Општина Охрид објавени на официјалната веб-страница и ажурирани во април 2022, во Општината има 32 регистрирани компании за такси превоз.

„Бевме со пријателка во Охрид на почетокот од јули и од Автобуската станица до населбата Далјан плативме 200 денари. Кога дојдовме на почетокот од август и побаравме такси до истото место, ни рекоа дека чини 400 зашто е сезона и цените скокнале“, ни рече туристка од Велес и додава дека кога на таксистот му побарале да вклучи таксиметар тој им рекол дека е зафатен и да побараат друго возило.

Охриѓани велат дека не им е чудно ваквото однесување на тексистите.

„Ако викнеш такси од некоја од плажите а таксистот доаѓа од центар, се има случено да ја наплати цената во двата правци“, ни рече еден охриѓанец.

САКАМДАКАЖАМ.МК пред три дена испрати е-пошта до Општина Охрид со прашање дали Општинскиот инспекторат ги казнува таксистите кои не вклучуваат таксиметар и кои одбиваат да возат патници кога се слободни. Исто така, дали има поплаки од граѓании дали и како постапува Инспекторатот. Вчера, во телефонскиот разговор од Општината ни рекоа дека уште чекаат одговор од колегите од Инспекторатот, а до објавувањето на текстот не добивме одговор на прашањата.

https://sdk.mk/index.php/dopisna-mrezha/ohridskite-taksisti-odbivaat-da-vozat-niz-grad-sedat-prazni-i-chekaat-turisti-za-nadvor-od-ohrid-za-povisoka-tsena/

Уште еден аргумент зошто дивите таксисти ги нарекуваат „диви

Нелегалниот такси-превоз им го уништува угледот на главниот град и на државата

Состојбата со такси-превозот во Скопје се чини дека никогаш не била полоша. Диви таксисти „ловат“ патници, а најголема цел во последно време им се странците, кои се магнет за брза и нереална заработка за несовесните и диви такси-возачи. Се наплатуваат нереални цени за кратки дестинации, бидејќи многумина од дивите возачи мислат дека ако се странци, не ги разбираат парите, па се обидуваат да им наплатат големи суми и брзо да заработат.

СТРАНЦИТЕ СЕ НАЈЧЕСТА ЦЕЛ

„Ако сме странци и првпат доаѓаме во Скопје, не значи дека сме глупави и дека не ја разбираме вредноста на парите“. Со овие зборови го започна разговорот Италијанецот Алекс, кој туристички беше дојден во Скопје, каде што остана три дена, а потоа замина за Охрид.
Алекс е 29-годишен Италијанец, кој ова лето одлучил да шета на Балканот. Особено интересно му било да дојде во Скопје и Македонија, бидејќи неговите пријатели му раскажале за убавините на Матка и Водно, за старата скопска чаршија, но и за модерните трговски центри.
Сепак, нешто го разочарало. Тој за нашата редакција истакна дека како главен град имаме сериозен проблем со нереални цени на такси-превозот. За превоз од „Ист гејт мол“ до зградата на Владата, таксистот му побарал неверојатни две илјади денари. И, како што би звучеле рекламите, „тоа не е сѐ!“. Наместо таксиметар, возачот вклучил апликација на телефон, која во секунди го накачувала износот на превозот.
– Ми побара две илјади денари, без никаков срам! Добро велам, дај ми сметка, сакам да знам колку чини километар и зошто е толку скапо. Наместо да ме услужи, избега. Знаете, ние сме странци, но не сме глупави. Пред одмор сите ние ја анализираме земјата каде што одиме, а особено внимание ни се парите, за да знаеме колку ни требаат и слично. Но ваков обид за „грабеж“ досега немам никаде видено – вели Алекс.
На нашето прашање да објасни какво било такси-возилото, тој рече дека не можел да утврди дека станува збор за нелегален таксист.
– Возилото беше исто како и сите други такси-возила. Не можеше да се утврди дека станува збор за див таксист – вели тој.

СОСТОЈБАТА СО ТАКСИ-ПРЕВОЗОТ ОД ПРВА РАКА

Според претседателот на Групацијата на автотакси-превоз на Град Скопје, Сашо Рајчановски, моменталната состојба во автотакси-превозот во градот Скопје е катастрофална, кој сака става табла и вози такси со каква било боја на такси-возило, без таксиметар, нелиценцирано возило, непријавен такси-возач.
– Сѐ почесто се жалат граѓани корисници на автотакси-превозот дека им се наплатуваат високи цени не по таксиметар туку по некоја апликација од мобилен телефон. „Ист гејт“, Транспортниот центар и Клиничкиот центар се местата од каде што доаѓаат најголемиот број жалби. Вакво безредие во автотакси-превозот никогаш немало. Дававме предлози за решавање на автотакси-дејноста во градот Скопје што институциите ќе ги чинеа 0 (нула) денари, а со кои гарантиравме намалување на сообраќајниот хаос, намалување на загадувањето, намалување на невработеноста и зголемување на буџетот по основа на придонеси на нововработени лица – вели тој.
Според него, безуспешни се сите залагања на Групацијата на автотакси-превоз за институционално решавање на проблемите во автотакси-превозот во градот Скопје.
– Запознаена е инспекцијата за патен сообраќај на Град Скопје, Трудовата инспекција, Град Скопје, имавме изјави во медиуми, апел до соодветни институции да се преземе нешто со што ќе се стави ред во автотакси-превозот, ама никој ништо не презема. Во фаза на изготвување е новиот закон за превоз во патниот сообраќај, каде што во делот на таксито НЕ се предвидува подобрување на состојбата, напротив зголемување на хаосот поради намалување на казните, кои и онака не беа високи. Дадовме свои реални забелешки, мислења и предлози, кои доколку бидат игнорирани, хаосот во такси-превозот ќе биде поткрепен со закон – нагласи Рајчановски.

https://novamakedonija.com.mk/makedonija/skopje/ushte-eden-argument-zoshto-divite-taksisti-gi-narekuvaat-divi/

Taxi-Skopje-2022,

eden mal izvestaj za kvalitetot na skopskoto taxi.
Posle nekolku godini povtorno bev patnik i gost na skopskite taksisti.
Prvicniot zaklucok e deka ova lici na se samo ne na Taxi-prevoz vo glaven grad na edna drzava. Stari, dotraeni i krajno necicti avtomobili avtomobili, kako na izgled taka i na miris (Vo site avtomobili se pusi). Na izgled neuredni taxi-vozaci koi cesto ne gi pocituvaat soobrakajnite pravila. Glasna radiostanica koja za vreme na patuvanjeto treba da bide isklucena ili barem namalena na minimum, i red drugi sitnici koi skopskiot taxi-prevoz go pravat bukvalno grozen. Na krajot posle tolku pominati godini se prasuvam dali navistina vo Makedonija nema sila koja ke stavi red i pristojnost vo ovaa kategodija na prevoz!?

Предложени нови, повисоки цени на такси услугите во Скопје

Поради зголемувањето на цената на горивата и упатените барања до Град Скопје од страна на такси компаниите, предложени се измени на цените на такси услугите. Советот за сообраќај на Град Скопје изготви три тарифни модели по кои таксистите ќе ги наплаќаат услугите за граѓаните на главниот град, а првиот е на сила веќе 11 години. Која од трите тарифи ќе се применува ќе зависи од тоа дали цената на горивата ќе расте или ќе се намалува, велат од Град Скопје.

Тарифа 1: Старт на превоз – 40 денари, за секој изминат километар – 25 денари и за чекање во место 1 час – 300 денари;
Тарифа 2: Старт на превоз – 50 денари, за секој изминат километар – 30 денари и за чекање во место 1 час – 420 денари;
Тарифа 3: Старт на превоз – 60 денари, за секој изминат километар – 35 денари и за чекање во место 1 час – 480 денари.
Тарифите се усогласени и прифатени од Асоцијацијата на легални таксисти, Синдикатот на таксисти и Групацијата на такси превозници.Од Град Скопје велат дека при формирањето на новите цени на такси- превозот биле земени предвид цените на горивата, но и други фактори.

https://telma.com.mk/2022/07/09/predlozheni-novi-povisoki-ceni-na-taksi-uslugite-vo-skopje/

ОД 1 МАЈ ПОСКАПУВА ТАКСИ ПРЕВОЗОТ ВО ОХРИД, СЕ ВОВЕДУВА И НОЌНА ТАРИФА

Од први мај ќе поскапи такси превозот во Охрид. Советот на Општина Охрид го прифати барањето на такси превозниците за зголемување на цените, но им побара да ги подобрат услугите и односот кон граѓаните и туристите.

Новата цената на услугата за првиот километар е 50 денари, а секој следен километар во период од 5 часот наутро до 23 часот ќе се наплаќа по 35 денари. Се воведува и ноќна тарифа, односно од 23 часот до 5 часот наутро секој изминат километар ќе се наплаќа по 45 денари. Досега, такси превозниците возеа за 50 денари прв километар, и 30 денари за секој следен километар.

Советниците сметаа дека е основано ваквото барање на такси компаниите за да можат да се справат со предизвиците и да имаат континуитет во работата, но како што рекоа, повеќе да не се повторуваат познатите појави на одбивање од таксисти да возат на пократки релации, неможноста да се повика такси по телефон во летната сезона и слично.

Такси возила треба да имаат на видно место лиценца, беџ за возачот, а ќе биде зголемена и инспекциската контрола, посебно во текот на главната туристичка сезона.

„Јас како градоначалник и советниците ќе излезиме во пресрет, она што го имаат такси превозниците како барање да се реализира, но ќе бидам крајно ригорозен, мислам заедно со инспекциските служби, ако увидам дека работите не се одвиваат како што треба“, рече градоначалникот на Охрид Кирил Пецаков.

За некоректниот однос на таксистите во текот на туристичката сезона, како одбивањето да возат патници на пократки релации или возење без вклучен таксиметар, градоначалникот најави поставување информативни табли со број на кој незадоволни граѓани и туристи ќе можат да пријавуваат такси превозници.

Проблемот со нелиценцирани таксисти кој долги години е присутен во градот ќе се решева со жолти регистарски таблички, со кои ќе бидат означени сите лиценцирани субјекти кои вршат авто-такси превоз согласно законските измени.

https://sdk.mk/index.php/dopisna-mrezha/od-1-maj-poskapuva-taksi-prevozot-vo-ohrid-se-voveduva-i-nokna-tarifa/

ТЕТОВСКИТЕ ТАКСИСТИ СЕ ЖАЛАТ ДЕКА ВО ГРАДОТ ИМА 40 ЛЕГАЛНИ ТАКСИ ВОЗИЛА И 350 ТАКСИСТИ КОИ ВОЗАТ НА ДИВО



Растот на цената на горивата се одразува и на такси превозот во Тетово. Деновиве таксистите беа принудени минимално да го поскапат превозот, но велат дека поголем проблем за нив е големиот број лица кои вршат нелегален такси превоз и со години не се санкционираат. Лиценцираните такси фирми побарале помош од новиот градоначалник Касами, кој им ветил брзо решавање на проблемот.

„Дивите таксисти се голем проблем во сите градови во Македонија, а овој проблем е најизразен во Тетово. Десет години ништо не е преземено за да се реши овој проблем и тоа придонесе во градот сега да има околу 350 таксисти кои работат на диво. Има и такви кои имаат и по десетина возила на име на такси фирма, а таа нема никаква лиценца за такси превоз. Наспроти нив има само 42 возила од четири такси компании кои поседуваат лиценци за вршење такси превоз и работат според законите. Вчера имавме средба со градоначалникот Касами и го изнесовме овој наш, со години присутен проблем. Тој вети дека ќе им даде рок од еден месец на дивите таксисти да се легализираат. Во Тетово до неодамна имаше само еден сообраќаен инспектор, а сега примиле на работа уште еден, но дали тоа е доволно“, вели Зоре Томоски, сопственикот на такси компанијата „Зоки комерц“ и потпретседател на Асоцијацијата на такси превозници на Македонија.

Поради зголемувањето на цените на горивата тие велат дека биле принудени да ги поскапат своите услуги, но од друга страна, прометот им опаднал за половина бидејќи новите цени одвратиле голем број редовни корисници.

„Наглото поскапување на горивата придонесе за кратко време да бидат затворени околу 25 такси компании во државата. Со секое покачување на цената на превозот опаѓа и бројот на лицата кои користат такси превоз. Кога горивото чинеше 72 денари, нашата цена на превозот беше 70 денари на релација до два километра. Но, денес горивото достигна до 97 денари за еден литар. Сега ние бараме Советот на Општината да донесе одлука стартот да биде 20 денари и 70 денари за релација до два километра. Ние бараме од државата да се намали акцизата барем за 50 проценти, најавеното намалување на ДДВ нема многу да ни помогне. Но, кога барем за 40-50 отсто би се намалил бројот на дивите таксисти, ние и со вака повисоки цени на горивата би можеле да опстоиме и да понудиме поприфатлива цена на такси услугите“, посочува Томоски.

https://sdk.mk/index.php/dopisna-mrezha/tetovskite-taksisti-se-zhalat-deka-vo-gradot-ima-40-legalni-taksi-vozila-i-350-taksisti-koi-vozat-na-divo/

ЗА 10 ДЕНАРИ ПОСКАПЕ СТАРТНИНАТА НА ТАКСИ ПРЕВОЗОТ ВО ШТИП, ЌЕ СЕ МЕНУВА СПОРЕД ЦЕНАТА НА ГОРИВОТО



Штипските такси компании најавија дека стартнината се зголемува од 70 на 80 денари до 2 километри, а секој нареден километар ќе чини по 25 денари.

„Принудени сме за вакви корекции на цените затоа што Регулаторната комисија за енергетика веќе секојдневно ги коригира цените на горивото и ги зголемува. Такси компаниите се врзани за одлуките од Општините, но државната регулаторна комисија ни наметнува и ние да ја имаме истатата методологија, па ако се намалува цената на горивото и ние ќе ја намалуваме цената на такси услугата и обратно“, вели претседателот на Здружението на такси компаниите во Штип, Глигор Арсов.

Тој вели дека во изминатиот месец, се затворија 20 помали такси компании неможејќи да ја издржат енергетската криза и постојаното зголемување цените на горивото, а вработените останаа без работа. Уште возат само 5-6 компании.

Здружението бара и поголема контрола на дивите таксисти. На пример, само во Штип од 200 такси возила, едвај половината се легални со жолти таблици. Оваа состојба ќе се толерира до септември до кога е рокот за лиценци, но потоа МВР мора да ги засили контролите и да казнува.

Според Арсов, компаниите за такси услуги деновиве имаат сериозни проблеми и со набавката на гориво. Не само што цената постојано се зголемува и го намалува бројот на патниците, туку горивото и го нема секогаш. Вчера и денеска седумте бензински пумпи во Штип останаа без гориво, освен бензинската пумпа на „Лукоил“ која се наоѓа на излезот од Штип кон Скопје.

Со оглед на аларамантната состојба на такси компаниите во државата, деновиве во Штип се одржа и заеднички состанокот на сопственицитеод целата држава затоа што проблемот е ист и во Битола и во Берово, во Скопје и во Штип. Тие се во постојана комунуикација и велат дека ако не се подобрат условите за нивно егзистирање сериозно ќе реагираат кај надлежните државни органи, а до Владата ќе поднесат и посебни предлог-мерки.

https://sdk.mk/index.php/dopisna-mrezha/za-10-denari-poskape-startninata-na-taksi-prevozot-vo-shtip-ke-se-menuva-spored-tsenata-na-gorivoto/

Ova e mesanje babi i zabi. Taxi-prevozot ednostavno ne moze da propadne. Problemot e vo vas. Izgubeni ste vo vremeto i prostorot. Nitu imate novi avtomobili nitu licite na taxi-prevoz.