GPS покриеност на MK

Џи-пи-ес што говори македонски

Патната мрежа на Македонија од почетокот на наредната година во целост ќе биде целосно вклучена во глобалната база на податоци, а ГПС-уредите ќе содржат детаљна дигитална мапа на сите патни правци во земјава

Благодарение на системите за глобална навигација на компанијата „Томтом“ и ГПС-уредите што веќе 10 години ги произведува „Мобиком ЛТД“, од почетокот на наредната година на домашниот пазар првпат ќе бидат понудени модели што ќе ги кажуваат упатствата за движење на возилото на македонски јазик.

Од македонската фирма, која е ексклузивен застапник на холандската компанија „Томтом“, велат дека патната мрежа на Македонија од почетокот на наредната година ќе биде целосно вклучена во глобалната база на податоци.

- Ова се први модели што ќе содржат детаљна дигитална мапа на сите патни правци во земјава. Односно, моделите нема да ги покажуваат само основните сообраќајници, туку и локацијата на сите споредни рути - објаснува Слободан Златановиќ, сопственик на „Мобиком ЛТД“.

Златановиќ, кој истакна оти монтажата на уредите се врши во сопствен сервис по европски стандарди, додаде дека овие ГПС-системи важат за светски бренд, а карактеристично за нив е што базата што ги содржи податоците за мапите се обновува секојдневно.

- Овие ГПС-системи можат да се вградат на сите возила, а уредот ја потврди веродостојноста на информациите на едномесечниот тест-период низ Европа. Нашата екипа помина над 5.000 километри низ Стариот континент, а системот ги доведе до стартната позиција без грешка - тврди тој.

Во пакет со ексклузивното застапништво на „Томтом“, доаѓаат и помошните алатки „Перот“ и „Бродит“.

„Перот“ е хендс фри уред кој во текот на возењето овозможува пристап до мобилниот телефон и аудиосистемот на возилото, без возачот да ги крене рацете од воланот.

- Ова се помошни алатки што го овозможуваат концептот на безбедно возење. На овој начин возачите ги почитуваат законите и безбедноста во сообраќајот, без притоа да страда можноста за комуникација, што е посебно важно за бизнисмените и луѓето чии професии бараат постојан контакт - изјави Златановиќ.

Со оглед на се' поголемиот број мотоцикли, „Перот“ нуди специјални модели за оваа група возачи. Помошниот уред се монтира на заштитниот шлем, а во случај на телефонски повик го известува возачот, кој може да разговара во текот на возењето беа да ја загрози сопствената и безбедноста на другите учесници во сообраќајот.

Помошната алатка „Бродит“, пак, е кориснички ориентиран уред што овозможува беспрекорно функционирање на целиот систем. Овие уреди се дизајнираат специјално за секој модел на автомобил. Така, за сите модели постои единствен вид алатка што овозможува безбедност во сообраќајот во согласност со законските регулативи.