ДЦ Аркадија

БЕСПРАВНИОТ ОБЈЕKТ УСОГЛАСЕН СО УРБАНИСТИЧKИОТ ПЛАН „БУЊАKОВЕЦ 1“

Легализирани дивите делови од зградата „Аркадија“

На последната седница на Советот на Центар немаше забелешки за градежните отстапки на оваа зграда, но имаше за две други, кои не добија зелено светло - една во Дебар Маало, а друга на „Максим Горки“

Советот на Општина Центар на последната седница ги легализира бесправните делови од станбениот објект, изграден на местото на поранешната сендвичарница „Аркадија“. Станува збор за три парцели споени во една - 11776/1, 11776/2 и 11778, дел од катастарската општина „Центар 1“. 

Советникот Јован Тагасовски од СДСМ на седницата праша колкава површина отстапува од она што е дозволено, на што раководителот на Секторот за урбанизам во Општина Центар, Александар Јанакиевски, му одговори дека станува збор за отстапување од 30 сантиметри. Не појасни во кој дел од градбата - дали во висина или во ширина. 

- Отстапувањето е минимално и не им пречи на околните објекти - истакна раководителот за усогласување на дивите делови од зградата во планот „Буњаковец 1“. 

На истата седница имаше барање за планска легализација на уште два објекта - едниот во Дебар Маало, а другиот на улицата Максим Горки, во околината на плоштадот Македонија. Раководителот Јанакиески образложи дека тоа не е можно. Во образложението на двете одлуки пишува дека објектите не можат да се вклопат во урбанистичко-планската документација бидејќи не се исполнети нормативите утврдени со Правилникот за стандарди за вклопување бесправни објекти. 

- Во спротивно, се задржува постојната состојба на бесправниот објект и за него не се исцртува информативна линија, а не се утврдуваат услови за идна градба - се вели во образложенијата. 

Станува збор за градба на улицата Максим Горки, која е во редот на некогашната печатница „Гоце Делчев“, на катастарската парцела 11961, дел од „Мал ринг“. Истото се однесува и за објект што се наоѓа на две парцели, 5349 и 5350, кои се дел од планот „Дебар Маало 2“. (А.П.)