Шест децении стариот дрвен мост на реката Црн Дрим во Струга денеска почна да се урива. Пред повеќе од еден месец беше демотиран само дел од него, но со денешните активности кои треба да завршат до крајот на оваа недела ќе се создадат сите потребни услови за изградба на новиот мост. Од општината за Алсат М рекоа дека новиот мост нема да биде дрвен, туку бетонски, а констрикцијата ќе биде од челик за да може да издржи товар од десет до петанесет тони. Покрај за пешаци , низ мостот ќе можат да поминуваат и возила, со приоритет за брза помош, полиција и против пожарна служба. Овој проект ќе ја чини општината повеќе од еден ипол милион евра

„Само бетонските зидови ќе останат како сведок дека некогаш овде постоел мост. Со оглед на тоа дека не фати сезона, а овде ќе треба да се работи со прав, не е препорачливо сега да го градиме новиот мост. Мостот беше целосно оштетен и можеби и доцниме, но ете дојде време овој мост да се отстрани бидејќи постоеше опасност по животите и на стружани и на туристите“Петко Кутаноски директор на Комунално Струга

Од Комунално очекуваат да извадат повеќе од пет тони дрво. Инаку, одовде  некогаш поминувала железничка пруга која Струга ја поврзала со Охрид и Кичево.

„Беше железнички мост. Кога се укина железницата бидејќи немаше друго решение, а луѓето неможеа да се префрлуваат од едната на другата страна на реката, тогашното собранието реши мостот да биде пешачки. Служеше до сега добро мостот, но никој не го одржуваше. Ако го одржуваа можеби уште ќе служеше“

Новиот мост кој ќе се гради од наесен по изборот на фирмата изведувач ќе се разликува и според изгледот. Ќе биде рамен за да може да има непречен поглед кон дримот. Мостот кој беше целосно оштетен повеќе од една година беше затворен за движење, бидејќи имаше многу несреќни случаи кога случајни минувачи паѓаа во реката,меѓу кои имаше и деца.
Мики Трајковски