Скопски сообраќај (општо)

Кружната крстосница – кружен тек меѓу улиците Ѓорче Петров, Воин Драшкоци и Радушка во општината Ѓорче Петров од денеска /27.05.2011 година/ и официјално е отворена за сообраќај. Вкрстувањето на овие три улици е решено со кружен тек со две коловозни ленти широки 7 метри и со нови пешачки и велосипедски патеки.

На официјалното отворање за сообраќај на кружниот тек во Ѓорче Петров присуствуваа градоначалникот на Град Скопје, Коце Трајановски, претседателот на Собранието на Република Македонија, Трајко Велјановски, министерот за внатрешни работи, Гордана Јанкуловска и градоначалникот на општината Ѓорче Петров, Сокол Митровски.

- Изградбата на кружниот тек меѓу улиците Ѓорче Петров, Воин Драшкоци и Радушка во голема мера ќе го намали сообраќајниот метеж што се создава во овој дел од градот. Големите редици возила кон излезот на Скопје, во правец кон Тетово што беа секојдневие на оваа крстосница ќе станат минато. Новиот кружен тек ќе овозможи поголема проточност на возила, без задржување на семафор. Со тоа ќе се зголеми и безбедноста во сообраќајот. Би сакал да им се заблагодарам на граѓаните за покажаното разбирање и трпение додека се изведуваа градежните работи на кружниот тек. Ова е прв кружен тек на толку прометна улица во градот, а Градот Скопје ќе продолжи да гради кружни крстосници на повеќе локации за да се намали сообраќајниот метеж – рече денеска градоначалникот Трајановски.

Кружниот тек во Ѓорче Петров е формиран на ниво на постојниот коловоз. За потребите на новото решение постојниот асфалт на вкрстувањето беше раскопан, сообраќајните знаци и осветлувањето беа дислоцирани, беше направен ископ на земја и формиран кружен тек. По должината на новоформираниот коловоз се поставени рабници, површината е тампонирана и покриена со нов асфалтен слој (БНС – 19 сантиметри и АБ – 6 сантиметри). Влезот во улицата Радушка е проширен и уреден.

Тротоарите и велосипедските патеки на кружната крстосница се покриени со бекатон-плочки. Велосипедските патеки се означени со црвена боја. Поставени се и заштитни столбчиња. Уличното осветлување на крстосницата е обновено.

Атмосферската канализација на кружниот тек е реконструирана и е во функција, со дополнителен број шахти. Одведувањето на атмосферските води е овозможено со изведба на вертикални сливници. На кружниот тек се поставени нови сообраќајни знаци, без семафори. Сообраќајот се одвива по принципот вртење во лево. 

На терен работеа екипите на градежната компанија „Пелагонија – Гостивар“.

Градоначалникот Трајановски рече и дека реконструкцијата на петте големи сообраќајници во централното градско подрачје е завршена и дека се очекува почетокот на градежните работи за проширување и реконструкција на булеварот Свети Климент Охридски.

- Булеварот Свети Климент Охридски треба да добие по три ленти во секоја насока, средишно зеленило и нови тротоари – рече градоначалникот Трајановски.