29 July 2011

Општината  Битола ќе ги редизајнира и реставрира сите 13 мостови на реката Драгор што се поставени во старото градско јадро.

Постапката за реализацијата на проектот во првата фаза ќе ја реализира веќе формираниот одбор кој распиша јавен конкурс за идејни решенија за што ќе додели награда од 65.000 денари, или по 5.000 денари за мост.

Заинтересираните учесници уметници и други стручни лица треба да ги испратат своите графички предлози со текстуално образложение и во 3Д анимација. Предлозите мора да бидат комплетни, односно со пристапни патеки, партерна обработка, елементи од урбана опрема и други обликовно-естетски објекти.

Градоначалникот Владимир Талески се осврна на постапката.

-Според планираното до досегашниот Црн мост ќе се гради уште еден мост, наменет исклучиво за движење на автомобилите. Со сигурност можам да потврдам дека постоечкиот ќе остане пешачки мост, а таму е предвидена и крстосница којашто ќе биде кружен тек во дел над речното корито и во еден дел каде што е сегашната крстосница. Од Црн мост сите мостови надолу ги понудивме на креативните  професионалци  да укажат и да покажат што знаат и да видиме како сето тоа да добие еден комплетно нов и различен лик од постоечкиот - изјави градоначалникот Талески.

Сега останува да се види какви идејни решенија ќе понудат на тендерот професионалците кои како искуства можат да им послужат фасцинантните мостови во многуте европски држави.

Најголем дел од мостовите на реката Драгор во Битола се стари и по повеќе од 70 години, а повеќето се препознатливи по своите имиња како што се Црн мост, Ленски мост, “Мостот кај валајчарите, Дрвен мост, Мостот кај сали, Мостот на вљубените, Мостот безистен и други во зависност од објектите до кои се доаѓа преку мостот.