Булевар Борис Трајковски (Првомајска)

Како што информираат надлежните од Град Скопје во тек е процедурата за одобрување на заемот од Европската банка за обнова и развој од која бараат 350 милиони денари или 5,7 милиони евра за проширување на оваа улица, но и за проектот за изградба и опремување на Центарот за управување и контрола на сообраќајот

Проширувањето на улицата "Првомајска" и отстранувањето на едно од најтесните сообраќајни грла е приориотет за градските власти, но не знаат кога ќе започнат градежните работи. Како што информираат надлежните од Град Скопје, преку задолжување во Европската банка за обнова и развој ќе побараат заем од 350 милиони денари или 5,7 милиони евра кои се потребни за проширување на улицата "Првомајска", но и за проектот за изградба и опремување на Центарот за управување и контрола на сообраќајот. Оттаму додаваат дека проширувањето на улицата зависи од тоа кога ќе биде одобрен заемот од банката.
- Се уште трае процедурата за одобрување на финансискиот заем од Европската банка за обнова и развој и откако ќе заврши таа процедура ќе се започне со процедурите за проширување на улицата "Првомајска", велат одговорните од Град Скопје. Од таму додаваат дека за проширување на улицата "Првомајска" предвидени се средства во износ од 190 милиони денари, со што значително ќе се подобри одвивањето на сообраќајот на оваа сообраќајница по која поминуваат повеќе од 40.000 возила дневно.
- Проширувањето на улицата "Првомајска" ќе се одвива на потегот од крстосницата со улицата "11 Октомври" до крстосницата со улицата "Народни херои" и од фабриката УСЈЕ до Драчево. Со овие средства е предвидена и изградба на колектор од Транспортниот центар до улицата "Првомајска", велат од Град Скопје.

За изградба на Центарот за управување и контрола на сообраќајот ќе бидат искористени средства од заемот од Банката во износ од 160 милиони денари.
- Со формирањето на Центар за управување и контрола на сообраќајот ќе се овозможи унапредување на ефикасноста и безбедноста на урбаниот сообраќај, зголемување на пропусната моќ на сообраќајниците и крстосниците, скусување на времето на патување, заштита на животната средина и намалување на потрошувачката на гориво, велат од Град Скопје.
Но надлежните од Град Скопје се соочуваат и со уште еден проблем, а тоа е нивниот напор за проширувањето на булеварот "Илинденска" кој треба да продолжи проширен од стеснувањето кај бензинската на "Макпетрол" се до бунарите во Нерези. Но, главниот проблем за почеток на изградбата и проширувањето се нерешените имотно-правни односи кои ја кочат доизградбата на булеварот, но и голем број од сопствениците на земјиштата на кои треба да продолжи изградбата бараат обесштување многу поголемо од реалната вредност. Од Град Скопје додаваат дека се уште се преговара и се надеваат дека наскоро ќе се изнајде заедничко решение. http://vecer.com.mk/?ItemID=353B481A0DC5224AACF742E78BEA60BF