НАЦИСТИЧКА СВАСТИКА НА СПОМЕНИКОТ НА ЈОСИП БРОЗ ВО СКОПЈЕ

Извршен напад на Тито и Југославија

"Тито е мртов" од едната страна и нацистичкиот кукаст крст од другата страна од пред некој ден стојат на споменикот на доживотниот претседател на СФРЈ, Јосип Броз Тито, поставен во строгиот центар на градот. Иако е подигнат на френквентно место, пред влезот на гимназијата Јосип Броз Тито", вандализмот, што е за секоја осуда, неколку дена никој не го забележал, ниту вработените во гимназијата ниту од органите на власта

Непознати вандали со автолак го оскрнавеле единствениот споменик на Јоспип Броз Тито, поставен во центарот на градот, пред гимназијата што го носи неговото име. Тито е мртов" од едната страна и нацистичкиот кукаст крст од другата страна од пред некој ден стојат на споменикот на доживотниот претседател на СФРЈ, Јосип Броз Тито, поставен во строгиот центар на градот. Иако е подигнат на френквентно место, пред влезот на гимназијата, вандализмот, што е за секоја осуда, неколку дена никој не го забележал, ниту вработените во гимназијата ниту од органите на власта.

Директорката на гимназијата Јосип Броз Тито", Снежана Мирковска, за ВЕЧЕР изјави дека не забележале дека споменикот пред гимназијата е ишчкртан.
- Не, не сум го забележала ишчкртаниот споменик ниту пак некој од вработените ме информирал дека е општетен. Ве уверувам дека ќе видам за што станува збор и иако одржувањето на споменикот не е во наша надлежност, ќе сториме се истиот да се врати во првобитна состојба, рече директорката на скопската гимназија. Ни полицијата досега не добила никаква пријава за уништениот споменик. Од МВР информираат дека екипи од полициската станица Беко, која го опфаќа реонот каде што е споменикот на Тито, ќе излезат на терен, но прво мора да добијат соодветна пријава. Штом ќе ја добијат пријавата, екипите ќе постапат по неа и ќе изработат записник за направената штета на споменикот. За овој вандализам единствено знаел , уште од пред пет дена, лидерот на Титовите леви сили, Слободан Угриновски. Тој тврди дека посегањата по споменикот на Јосип Броз во Скопје е политички атак врз него.
- Поради приватни причини бев одсутен од Скопје, но информацијата дека е ишчкртан споменикот на Тито ја добив уште пред пет дена. На гестот можам само да им честитам на глупоста како акт, и непознавањето на историските факти за улогата на Тито за Македонија. Лично не стигнав да отидам и го видам споменикот во каква состојба е, но уверувам дека уште денес ќе го сторам тоа, а до крајот на неделава споменикот ќе биде вратен во првобитната состојба. Лидерот на Сојузот на Титовите леви сили тврди дека мета на напад на вандалите деновиве бил и ѕидот на поранешниот ресторан Југославија" кај старата железничка станица. Угриновски вели дека таму го затекнал графитот Смрт на комунизмот, слобода на народот". Тој сиве овие гестови ги оценува како политички притисок врз него и неговата партија.
- Уште еднаш сакам да им порачам на сите политички неистомисленици дека Титотвите леви сили и јас како претседател на партијата ќе бидеме истрајни во нашата политичка битка, за која никој не ни помага, а најмалку СДСМ како коалиционен партнер.

Инаку пишување на графити со навредлива и вулгарна содржина на споменици од културно и историско значење претставува кривично дело, што е казниво во согласност со Кривичниот законик на Република Македонија. Санкциите од ваков вид се предвидени и за оштетување или уништување на спомениците, за што освен парично, се сенкционира и со казна затвор до 3 години. Токму поради тоа МВР потсетува, односно укажува за законските последици кои произлегуваат од таквите непромислени и штетни последици. Покрај тоа, а зависно од видот и обемот на оштетување, споменичното сквернавење е и прекршок против јавниот ред и мир, за што е предвидена глоба од 1.500 до 2 илјади евра. Пишувањето, особено на графити со вулгарна и навредлива содржина на споменици или други јавни објекти, е спротивно и на Законот за јавна чистота.