БЕЗРЕДИЕ И САМОВОЛИЕ НА ТРАНЗИТНИОТ БУЛЕВАР

Пластичарската улица како Бејрут

Иако со четири ленти, и иако булеварско решение, „Никола Kарев“ во Чаир личи на тесна маалска улица по која одвај се разминуваат возила, камоли два камиона. Важи за брза транзитна сообраќајница, бидејќи без да навлегува во градот води кон Kосово, но и кон градовите во западниот дел на Македонија. Посетителите на дуќаните со години возилата ги паркираат пред продавниците, односно на коловозот, а со тоа го блокираат сообраќајот во должина од два километра.



Ретко кој почитува правила

Пешаците се посебна приказна, мора сами да се снаоѓаат и да се грижат за себе. Тротоари има, ама не за нив, туку им служат за продажба на с` и сешто на локалните трговци, кои својата стока ја изложуваат на јавните површини, а со тоа го попречуваат движењето.

Она што е најголема опасност за учесниците во сообраќајот се испаркираните возила на коловозот од двете страни на оваа улица, позната како пластичарска. Неодамна, тоа беше и причина за тешката несреќа во која животот го загубија четири лица, кога со своето возило во движење удрија во автобус што бил паркиран на втората лента.

Kоментарот на дел од граѓаните е дека, кога можат, претпочитаат да ја избегнуваат оваа улица. Особено поради фактот што по неа се движат тешки товарни возила. Сметаат дека тамошните жители и трговци со своите навики создаваат хаос, кој се одразува и во сообраќајот. По пешачките површини се распослани пластични маси, столови, лустери, килими, градинарски производи, па и автомибилски гуми. Дури и камиони. И совесните возачи, поради ова, се принудени да не ја почитуваат патната сигнализација и правилата за возење.



Чувари го обезбедуваат асортиманот и ноќе

- Во 11 претпладне има метеж како да е шпицот во четири часот кога сите со своите возила се враќаат од работа. Две ленти од коловозот се секогаш зафатени од паркираните возила, од тротоарите никнуваат како пешаци така и автомобили. Пешаците самоуверено ја пресекуваат улицата, дури и кога се далеку од пешачките премини - смета Маја П. од населбата Автокоманда.

Жители од населбата под Kале раскажуваат како асортиманот останува на тротоарите и ноќе, а обезбедување се чувари најмени од сопствениците на дуќаните. Никој не им ја одзема.

- Се вози лудо. Не знам до кога градот и полицијата ќе толерираат ваква состојба. Безредието, особено самоволието на голема група граѓани го прави реонот да личи на Бејрут. Не треба да н` чуди доколку се случи уште потрагична несреќа - смета граѓанинот Ѓорѓи Л.

Лета Барџиева

СВР Скопје: Полицијата казнува, а исто и УЈП

Според Лиза Бендевска, портпарол во Секторот за внатрешни работи-Скопје, полицијата си ја врши работата, а исто и останатите државни институции. Само во летниот период, УЈП и Пазарната инспекција им изрекле 120 казни на пазарџии што ги попречуваат јавните површини со своите артикли.

- Според член 11 од Законот за сообраќајот, забрането е продавање производи на јавен пат и казната чини 300 евра, што сепак не е малку. Од „Градски паркинг“, со асистенција од МВР, редовно одат на оваа улица и креваат непрописно паркирани возила со Пајак-службата - тврди Бендевска.

Од Градот се оградија од моменталниот хаос и немили случки. Преупатија за одговорност на МВР. Според Одделението за односи со јавноста, работа на градската власт е само поставување на сигнализацијата, а за с` друго е надлежна полицијата.