Скопска обиколница [A2/A4]

Збунувачки патокази на обиколницата во Скопје

Иако таблата покажува дека за Велес да се вози право, сепак по само неколку километри мара да се врти десно, да се влезе во Скопје и да се вози по градските улици, за потоа повторно да се излезе на автопат на другиот крај на градот

Домашните возачи знаат, но на странците не им е познато дека обиколницата е во употреба само делумно

Билјана Ангеловска

Шест години од официјалниот старт на изградбата на обиколницата на Скопје, автопатот што треба да го обиколи главниот град од неговата северна страна се' уште не е комплетно завршен. Нашите граѓани знаат дека сообраќајницата е само делумно предадена во употреба, но странците, особено оние што доаѓаат на пример од Охрид и сакаат транзитирајќи низ Македонија да заминат за Белград или за Грција, без да влегуваат во Скопје, ќе останат затечени на половина пат и ќе бидат принудени, сепак, да возат низ Скопје.

Пред самиот влез за Скопје кај Сарај, кога се доаѓа по автопатот од Тетово, поставена е голема табла на која по сите прописи и стандарди е испишано дека право се продолжува за Велес, до каде што има 80 километри, а десно се излегува од автопатот за да се влезе во Скопје. Но, оној кој со полна брзина од 120 километри ќе продолжи за Велес, само по десетина километри ќе мора да подзастане, да се исклучи од автопатот и сепак да влезе во Скопје, бидејќи тука, кај Оризари, сообраќајницата е затворена за возење во правецот кон Маџари.

Тука некаде завршува втората делница од обиколницата и почнува првата делница, која се протега се' до Хиподром. Но, овој дел од патот се' уште не е предаден во употреба, бидејќи на одредени делови и натаму се работи. Оперативата на скопски „Гранит“ се' уште „се бори“ со нерешените имотноправни проблеми со месното население. Поради тоа што Фондот за магистрални и регионални патишта никако да си го заврши својот дел од задачата, изградбата на оваа фаза од обиколницата се пролонгира веќе шест години.

За разлика од „Гранит“, екипите на грчката фирма „Терма“, кои ја градеа втората фаза од обиколницата, делницата од Оризари до Сарај, пред себе имаа речиси комплетно чист терен, па без мака го реализираа проектот во предвидениот рок. Делот од обиколницата кој веќе е предаден во употреба е солидно направен, осветлен по целата траса, поставени се звучни ѕидови за заштита од бучава, косините веќе почнуваат да се зазеленуваат.

Северната обиколница на Скопје е со должина од 26,7 километри и се протега од Хиподром до Сарај. Има автопатско решение со вкупна широчина од над 22 метра, со девет приклучоци кон градот, три големи објекти - вијадукти и многу натпатници што ќе им го олеснат движењето на жителите од бројните скопски села. Клучките преку кои ќе биде овозможен влез и излез од Скопје се кај Хиподром, Стајковци, Ченто, Бутел, Оризари, Стенковец, Орман, Стопански Двор и Сарај. Автопатот се градеше во две фази. Првата фаза, делницата од Хиподром до Оризари што ја гради „Гранит“, е во вкупна должина од 14,7 километри, додека втората од Оризари до Сарај е долга 11,8 километри и ја изведуваше „Терна“.

Обиколниот пат на Скопје е дел од Коридорот 8 и има посебна важност за Македонија, бидејќи ја поврзува со Бугарија и со Албанија. Изградбата на овој автопат треба значително да го намали транзитниот сообраќај низ Скопје. Според податоците од Студијата за оправданост на изградба на обиколницата, со предавањето на автопатот во употреба, прогнозираниот сообраќај низ Скопје до 2010 година треба да биде намален за околу 30 проценти. Намалувањето на транзитниот сообраќај се очекува директно да влијае на подобрувањето на животната средина.