Попрво под камион одошто во подземен премин

Ретко кој сака да се движи низ скопското подземје. Граѓаните попрвин ризикуваат да ги удри некој автомобил или камион одошто да вртат, да се симнат или да се качат по скали за да преминат некој булевар под подземен премин. Не за друго, туку ги бие лош глас. Со децении се запуштени, неосветлени, преполни со ѓубре, вистинска мека за неволји. Истата судбина ја имаат и надземните, иако градоначалниците на Kарпош и на Чаир, кои изградија неколку, убедуваат дека многумина се задоволни и ги користат. Градоначалникот на Kарпош, Стевчо Јакимовски, го изгради „Влајко“, а Изет Меџити на Чаир, изгради два - еден на Бит-пазар и уште еден на „Цветан Димов“.



Двајца преминуваат, стотина трчаат меѓу автомобили

Во Скопје има вкупно четири подземни премини на разни локации, односно булевари каде што возилата се движат со голема брзина: на „Александар Македонски“, и тоа кај хотел „Kонтинентал“ и кај средното сообраќајно училиште „Боро Петрушевски“, на Јужен булевар и на „Јане Сандански“, кај трговскиот центар „Скопјанка“ во Аеродром. Оној на Јужен булевар е одамна затворен, заклучен со катанец. Оној кај АСУЦ е претворен во депонија и во дувло на зависници. Другите два се во функција, осветлени, а во нив има дуќани. Но и тоа не е доволно за луѓето и за младинците да посакаат да изгубат време и да преминат преку нив.

- Се случува по цели групи ученици опасно да претрчаат преку коловозот, дури и во присуство на униформирани сообраќајни полицајци, кои стојат со „крајслерите“ во непосредна близина. Тука се и студентите од домот „Стив Наумов“. Нема обележано пешачки премини, но не ги казнуваат. Сепак, сметам дека со тоа им прават само лоша услуга - вели Лидија М., вработена во непосредна близина на преминот кај „Kонтинентал“.

Други граѓани, пак, се искрени и велат дека полесно и побргу им е да претрчаат отколку да вртат кругови и, според нив, да губат време по булеварски тунели.



Џабе чистење и осветление

Овие четири премини се изградени пред осамостојувањето, а оттогаш нема нови. Освен надземни, но и тие ретко кој ги користи. Доволно е човек да постои половина час пред кој било од нив и ќе сфати дека само двајца преминале за тоа време, а стотина други претрчале улица.

Премините се под надлежност на Град Скопје, а ги одржува јавното претпријатие „Kомунална хигиена“. Надлежните објаснуваат дека одржувањето на постојните подвозници е многу сложен процес.

- Градот вложува голем напор за нивната функционалност. Во повеќе наврати сме укажувале дека и покрај сите средства што ги инвестираме, подвозникот кај АСУЦ не може да се доведе во функционална состојба. Чистењето од „Kомунална хигиена“ го изведуваат со специјална опрема и со заштитни маски. Проблемот е во тоа што по завршувањето на сите интервенции, чистење и осветление, повторно се случуваат кражби на електричните инсталации, уредениот простор се демолира и  граѓаните го избегнуваат -изјавија од одделението за односи со јавност.

http://dnevnik.com.mk/?ItemID=204797FA33630F44B78533B24E722E0E

Подземните премини се психолошки поприфатливи

Со новиот буџет се планира изградба на неколку подземни премини, но нивниот број сé уште не е точно дефиниран

Експертите сметаат дека подземните премини се попрактични и побезбедни

Подземни и поскапи или надземни и поевтини пешачки премини? За граѓаните изборот е едноставен - подземните се подобри, бидејќи, како што велат, полесно им е да се спуштаат отколку да се качуваат, иако и кај едните и другите има качување и симнување само по обратен редослед. Досегашните искуства покажуваат дека надземните премини поретко се користат, како на “Бит-пазар&рдљуо; или пред училиштето “Лирија&рдљуо; во Чаир, каде што претрчувањето преку улица останува „стара добра навика“. И експертите се согласуваат дека подземните премини се попрактични и побезбедни, иако се поскапи.

За изградба на подземните пешачки премини е потребно внимателно да се избере вистинската локација, односно на прво место да се посвети внимание на безбедноста за пешаците и градежно да е дозволиво, велат експертите.

- Надземен или подземен пешачки премин се гради кога има голема раздвиженост на пешаци, кои го попречуваат движењето на сообраќајот.

Од психолошка причина, најчесто се избира да се изгради подземен пешачки премин поради тоа што на луѓето им е полесно, попристапно и попримамливо да се спуштаат отколку да се качуваат. Граѓаните кога ќе видат скали нагоре се двоумат дали да тргнат. Подземните се попрактични, но и поскапи. Во изборот дали ќе биде подземен или надземен влијае многу цената - вели Јован Христовски, сообраќаен инженер.
За идната година е најавена изградба на неколку подземни пешачки премини.

- Со новиот буџет се планира и изградба на подземни премини, но нивниот број сé уште не е точно дефиниран. Изминатите две години беа правени истражувања за подземниот катастар и, врз основа на тие испитувања, ќе се направи идејно решение за најмалку еден подземен премин, за кој во наредниот период ќе треба да се спроведат постапки за изработка на изведбен проект и за избор на изведувач. Се очекува до крајот на првото тримесечје да се утврдат бројот и локациите за изведба на подземни премини - ни соопштија надлежните од градот.

Оттаму додаваат дека подземните премини се побезбедно решение, а некаде, како на пример во центарот на градот, се и единствено изводливи. Според досегашните планови, предвидена е изградба на четири подвозници, и тоа на булеварот Александар Македонски, кај „Алкалоид“, на улицата Македонија, на булеварот Јане Сандански кај ТЦ „Бисер“ и во близината на Градежен факултет.

Скопјани сметаат дека подземните пешачки би биле пофункционални доколку нема друг премин на улицата, ако имаат комерцијален карактер со продавници и слични објекти, да се одржува редовно и да има камери во нив за поголема безбедност.