Црква на Плоштад Македонија

Уставниот суд треба да испрати допис до Општина Центар со кој ќе бара таа да одговори на обвинувањата што ги испрати градоначалникот Трифун Костовски во врска со Деталниот урбанистички план за Малиот ринг и процедурата за неговото усвојување. Дури откако судиите ќе ги разгледаат сите документи ќе се изјаснат во врска со барањето на градоначалникот Костовски да се донесе привремено решение за запирање на овој план, кој го опфаќа строгиот центар, кое би важело се додека не се донесе конечна одлука за оценувањето на неговата законитост.

Решението за запирање би значело дека никој не би можел да гради ништо на тоа подрачје додека трае постапката во судот. Не се знае точниот датум кога судиите ќе одлучат дали ќе го замрзнат планот, но се очекува таа одлука да се донесе до крајот на месецов. Дотогаш нема да има никаква пречка да почне изградбата на црквата на плоштадот Македонија, која беше најспорна точка во овој план.

Од судот објаснуваат дека тие се обврзани да испратат писмо до претседателот на Советот на Општина Центар и да побараат нивно мислење за случајот. Со тоа на општинарите ќе им се испрати и примерок од претставката на градоначалникот Костовски.

- Градоначалникот на Скопје ја поднесе иницијативата за оценување на законитоста на 28 јули, но Уставниот суд беше на годишен одмор до крајот на август. Затоа не можевме да ја разгледаме претставката. Допис до Општината ќе испратиме во наредните неколку дена, а тој ќе содржи мислење од судот и документот од Костовски. Општинарите ќе имаат рок од 15 дена да се изјаснат за случајот, односно да одговорат на тврдењата дека процедурата за донесување на Деталниот урбанистич ки план за Малиот ринг била незаконска. Кога таа процедура ќе заврши Судот ќе формира предмет и во рамките на анализата референтите ќе донесат одлука во врска со привременото решение за запирање на планот - објаснуваат од Уставниот суд.

Градоначалникот Костовски ја поднесе претставката до Уставниот суд веднаш штом Одлуката на Советот за усвојување на планот се објави во општинскиот службен весник. Уште кога почнаа најавите за изградба на црква на плоштадот и кога Општината отвори процедура да го менува ДУП за да ја вметне, тој остро се спротивставуваше на идејата затоа што е спротивна на Генералниот урбанистички план. Костовски даде неколку предлози каде Владата, која е иницијатор на идејата, би можела да го изгради храмот. Тој предлагаш е да се гради во паркот “Жена борец“ или да се обнови црквата “Света Мина“ на левиот брег на Вардар.

Костовски посочи неколку главни аргументи со кои побара да се поништи тој план. Првиот е дека градот дал негативно мислење за него, кое, според градските власти било обврзувачко, а според општинските советодавно. Вториот е дека тој не се вклопува во Генералниот урбанистички план и затоа мора да се приспособи. Третиот аргумент се забелешките во стручната ревизија што Општината не ги прифатила. Како четврти аргумент Костовски посочи дека со Генералниот урбанистички план се предвидува за планирање во поголем обем да се распише меѓународен тендер.

http://www.porta3.com.mk/index.php?option=com_content&task=view&id=918&Itemid=54