Скопски сообраќај (општо)

проект на владата, нато и на градот скопЈе

Се проширува клучката кај Момин Поток

Работите ќе траат 40 дена, а ќе се скратат пешачките острови заради поголем проток на возила

Со поставувањето камен-темелник, вчера симболично беше означен почетокот на реконструкцијата на раскрсницата

Со поставувањето камен-темелник, вчера симболично беше означен почетокот на реконструкцијата на клучката кај Момин Поток . Станува збор за делумно проширување на клучката од страната на булеварот 8 Септември кон касарната „Илинден“, почнувајќи од раскрсницата со влез кон Момин Поток. За изведба на работите, од буџетот на Министерството за транспорт и врски се издвоени 7 милиони денари, НАТО ќе учествува со 180.000 евра, а Градот Скопје ќе учествува со комплетно поставување семафори и со надзор над изведувањето на работите, за што е ангажирана и контролна лабораторија ГИМ. Клучката се проширува за да се олесни и да се растовари отежнатиот сообраќај во овој дел на градот. Целта е да се скратат пешачките острови заради поголем проток на возила на раскрсницата. Во меѓувреме, внатре ќе се заштитат инсталациите, ќе се постават нови и ќе се изврши нов распоред на столбовите за семафори.

- Ќе се постават портални столбови, нов уред и лантерни за семафорите, а ќе се изведат и нови рабници. Исто така, се предвидува да се смени оградата на постојниот мост, а истиот ќе се прошири за да се добијат побезбедни ленти - рече Бранко Андонов, советник во Секторот за уредување во Градот. Работите нема да го попречуваат одвивањето на сообраќајот и ќе траат 40 дена, до крајот на октомври годинава. Проектот го изработи „Балкан консалтинг“, а градежните зафати ќе ги изведува АД „Гранит“.

- Владата и понатаму ќе работи на изградба на патиштата заради рамномерен регионален развој на сите делови од нашата земја, за економски развој и за влез на странски инвестиции, преку кои ќе се овозможи отворање нови работни места - истакна министерот за транспорт и врски Миле Јанакиевски. Тој потенцираше дека за завршување на овој проект се поставени кратки рокови, заради големата фреквенција во овој дел од патната мрежа во Скопје.

Владата, во соработка со НАТО, ги презеде работите за проширување и на булеварот 8 Септември, преку обновување на севкупната инфраструктура, пешачките мостови и на подземната инсталација, за што се обезбедени средства од Буџетот на Република Македонија. Како што изјави бригадниот генерал на НАТО во Скопје, Генков, реконструкцијата на оваа раскрсница е уште еден пример на добрата соработка меѓу НАТО, Министерството за транспорт и врски и Градот Скопје.

- Во изминатите неколку години ние постигнавме значајни резултати од нашето партнерство. Ги поправивме раскрсниците во Автокоманда и кај касарната „Илинден“. Убеден сум дека ќе ја продолжиме оваа одлична традиција и ќе имаме резултати токму тука, на оваа раскрсница, на која и' треба сериозна поправка - истакна бригадниот генерал на НАТО во Скопје, Стојан Генков.

Тој го спомена и проектот на НАТО и на Министерството за транспорт и врски за подобрување на патната инфраструктура во земјава, вреден 35 милиони евра, кој е во својата завршна втора фаза, а третата се очекува да стартува на почетокот на 2009 година.

Анела Петрова