Зеленило

Message Topic Search Topic Options Post Reply Create New Topic Printable Version

   ЗГРАДИТЕ „ИЗЕЛЕ“ ПОЛОВИНА ЗЕЛЕНИЛО ЗА ЕДНА ДЕЦЕНИЈА

Трендот на градење во последната деценија „изел“ дури 50 отсто од постојното зеленило во опфатот на строгиот центар. Во делот на Малиот ринг во 2002 година имало 75.649 квадрати зелени површини, а до 2013 драстично се намалиле на само 34.994 квадрати. Доколку продолжи истата динамика на подигнување објекти врз зелени појаси, до 2017 година би останале само 18.680 квадрати зеленило, односно 3,4 отсто од целиот ДУП Мал ринг. Површината на крошните на дрвјата, пак, од 2002 до лани се намалила за 20 отсто, што е директен резултат на континуирано сечење високи разгранети дрвја стари по 50-60 години. Ваквата тенденција за уништување на дрвниот фонд за три години би ги скратила крошните за уште 8 проценти, или вкупно 25 отсто за периодот 2002-2017 година. А, помали крошни значат и поголемо аерозагадување, а влијаат и на температурата и бучавата, што се одразува и на квалитетот на живот во Мал ринг.

Ова е дел од анализата на невладината „Плоштад слобода“ изнесена во студијата „Состојби и тенденции за намалување на градското зеленило во Мал ринг во Скопје 2002-2017“. Документот е изработен во периодот меѓу 2012 и 2013 година во рамките на проектот „Сосед чувар“, поддржан и од УСАИД, а бројките се направени врз основа на синтетизирани прикази од урбанистичките планови од централното подрачје, нивните измени и дополнувања, но и со помош на сателитски снимки од „Google Earth“. 

„Последен пат кога зеленилото било јасно обележано и категоризирано, било во ДУП-от од 1997. Би биле дополнително револтирани кога би виделе на кој начин се води евиденција во службите на ’Паркови и зеленило’ (со пенкало во тетратка), иако тие, како јавна институција, се едни од најангажираните во оваа област. За сите овие проблеми кои ги лоциравме подготвивме и Документ за јавна политика, кој ќе го поднесеме до надлежните, иако новата администрација на Општина Центар е ’со врзани раце’ и не изгледа дека може да дејствува“, велат од „Плоштад слобода“.

Студијата беше презентирана во вторникот во монтажната галерија во Паркот на франкофонија, при што се зборуваше и за густината на дрвјата до проектираната состојба до 2017 година. Со досегашните промени, особено во источниот дел од Мал ринг, рамномерно распределените дрвни насади стануваат концентрирано групирани во неколку одделени области. Ова значи дека во иднина би постоеле два центра каде што би биле групирани дрвните насади - паркот „Жена-борец“ и квартот меѓу улиците „Орце Николов“ и „Максим Горки“. До лани, пак, забележано е масовно сечење дрвореди и садници на источниот брег од Вардар, на плоштадот „Македонија“, пред Дом на АРМ и покрај Пошта. 

„Иако во периодот 2002-2013 се исечени само 63 дрвја повеќе одошто се засадени, површината на крошни, која ја одразува реалната зелена маса, во 2013 е за 22 отсто помала отколку во 2002 година. Доколку продолжи сечењето дрвја, вкупниот број би се намалил за уште 185“, стои во студијата.

Ланскиот попис за дрвниот фонд покажа дека низ овој урбан дел виреат вкупно 1.646 дрвја, од кои 313 зимзелени и 1.333 листопадни. Активистите наведуваат и архива на настани поврзани со зеленилото, а се надвор од Мал ринг. На 22 април 2013 се исечени 33 дрвја кај седиштето на ВМРО, беше избетониран дел од парк во Тафталиџе, а имаше масовна сеча на сметка на згради околу „Бристол“. Ланскиот јули чаирчани протестираа против 17-те маркички наменети за објекти врз локалниот парк. Тогаш градоначалникот Изет Меџити објави дека поништува 12 од 17 маркички, со што Општината ќе изгуби 5 милиони, но ќе зачува 12 парка.

Сепак, мора да се напомене и дека, откако е финализирана студијата, низ централното подрачје изникнаа неколку нови градби, но се спроведоа и нови акции за садење дрвја. Иако, на свежите садници ќе им требаат 10, 20, па и 30 години да добијат поголема крошна и да попримат својство на филтри на амбиенталниот воздух. 

 http://www.utrinski.mk/?ItemID=FA9B493B46ED204C81FF7D801F333ECC

Зеленило

Жерновски сече дрвја во Дебар Маало