Административно раководење на Скопје

Или околу 30 отсто од буџетот на РМ, а не како досега минимални еден отсто или 27-28 милиони евра. Ова, заедно со загарантираната двојазичност на цела територија на Град Скопјe и стеснување на територијалните граници само во урбаните квартови, се дел од предлозите на градската администрација кои ќе бидат дадени на експертиза во неколку министерства

За урбан, економски и социјален развој на Град Скопје потребно е 60 отсто од персоналниот данок и 10 отсто ДДВ да се слева во градската каса, а централната власт да обезбеди блок дотации за реализација на капитални проекти. Тоа во бројки би изнесувало околу 700-800 милиони евра или околу 30 отсто од буџетот на РМ, а не како досега минимални еден отсто или 27-28 милиони евра. Ова, заедно со загарантираната двојазичност на цела територија на Град Скопје и стеснување на територијалните граници само во урбаните квартови, се дел од предлог-измените на Законот за Град Скопје кои од вчера се доставени на разгледување во Министерството за транспорт и врски.

Официјалното предавање на пакет-документот го изврши скопскиот градоначалник Трифун Костовски, кој по вчерашната средба со министерот Миле Јанакиески изјави дека добил уверување од министерот дека предлог-измените многу студиозно ќе се разгледуваат во неколку ресорни министерства и резултатите ќе бидат познати во најскоро време. Костовски најави дека за новите законски измени ќе се организира и јавна расправа.
- Наш предлог е Скопје да биде една општина, а не како денеска расчеречен меѓу општините и Градот со не додефинирани и јасни ингеренции во поглед на правата и надлежностите а и обврските. Да биде направена територијална промена на Градот во кој ќе влезат само урбаните делови: Карпош, Центар, Чаир, Аеродром до Лисиче, дел од Кисела Вода, посебни општини да бидат Шуто Оризари, Ѓорче Петров и Сарај да бидат самостојни општини. Само на тој начин и порационална организација на администрацијата на локално ниво, би се одбегнала потребата од создавање на нови јавни претпријатија, а ќе се избегне и судирот на надлежности од сите сфери-вели Костовски.

Во Министерството немаа никаков коментар околу иницијативата на градоначалникот Трифун Костовски

Министерството за локална самоуправа на чуден и нелогичен начин е тргнато од проектот што се однесува на иницијатива на градоначалникот Трифун Костовски за корекции во Законот за Скопје. За главен координатор во постапката за измени на Законот за метрополата и за своевиден контакт-мост на релација централна и локална власт Владата го ангажира министерот за транспорт и врски, Миле Јанакиески.

Имено, токму Јанакиески го прими предлогот на Костовски на кој се работело цела година, а подразбира многу суштински, сериозни измени, како во територијалната организација, така и во начинот на финансирањето.

Во Министерството за локална самоуправа вчера немаа никаков коментар околу иницијативата на градоначалникот Трифун Костовски.

"Предлогот не е стигнат кај нас. Ќе се произнесеме откако ќе го добиеме", беше кусата изјава од МЛС, каде што и во изминатиот период, за време на некои поранешни министри имало слични идеи чија заедничка цел била измени на Законот за градот Скопје.

Министерот за локална самоуправа, Муса Џафери, вчера беше на седница на Владата, така што не можевме да добиеме директен одговор околу ситуацијата со неговото прескокнување во случајот со иницијативата.

"Владата го назначи министерот Миле Јанакиески да ги води контактите меѓу централната и локалната власт што се однесуваа на измените на Законот за градот Скопје", изјави владиниот портпарол, Шефик Дураки. Тој немаше одговор зошто Владата одлучила наместо министер за локална самоуправа координатор да биде министер за транспорт и врски. Контактирав и со министерот Муса Џафери, но тој не сака ништо да коментира", додаде портпаролот на Владата, Дураки.

Ваквата ситуација со проект што е првенствено надлежност на локалната самоуправа може да се објасни на неколку начини. Не е никаква тајна тоа што ресорот локална самоуправа отсекогаш бил маргинализиран. Имено, во барабанот секогаш стоел на располагање само за да задоволи нечии партиски апетити за министерска фотелја. Така било, и веројатно и во иднина локалната самоуправа ќе остане монета за поткусурување меѓу коалициските партнери во Владата.

Може да се објасни и зошто Јанакиески, а не Џафери ја доби довербата на преговарач за локалната сфера. На првата отворена владина седница нетрпеливоста на премиерот Никола Груевски спрема членот на Кабинетот, Муса Џафери, беше повеќе од очигледна. Груевски буквално го замолча Џафери и не му дозволи да каже ништо повеќе од она што тој го замислил за финансирањето на општините.

Едноставно, се чувствува во воздух како ќе заврши иницијативата на скопскиот градоначалник. Ако владејачката гарнитура замислила Скопје да функционира како што е тоа сега, тогаш предлогот и да е најквалитетен ќе се изгуби низ сложените процедурални лавиринти и никогаш нема да види бел ден. Дали е тоа интерес на Скопје и на скопјани? Одговорот го знаат Владата и премиерот Никола Груевски.

Градоначалникот Трифун Костовски во неколку наврати се жалеше на притисок и на преземање на ингеренциите од централната власт.

http://utrinski.com.mk/?ItemID=789E035471554447BD6209BA06C64A58