Бензински пумпи

Владиниот договор со „Окта“ пречка за „Лукоил“

Инвестициите на рускиот нафтен гигант „Лукоил“ во земјава се најниски во регионот поради нелојалната конкуренција и монополската позиција на „Окта“. Ова е ставот на Валентин Златев, директорот на Балканската регионална асоцијација на „Лукоил“ со седиште во Софија.

- Во ниеден случај износот на инвестиции не е одраз на некаков поинаков однос кон Македонија. Има проблеми за кои би сакале да дискутираме и да ги решиме. Тоа се увозните царини и монополската позиција на „Окта“ - изјави Златев на средбата со балканските новинари во Софија, мислејќи притоа на царинското ослободување што скопската рафинерија го доби со купопродажбениот договор. Тој очекува соработка со Владата за да се реши ова прашање. Веќе биле одржани неколку средби и се подготвуваат чекори за подобрување на конкурентноста.

- За жал, Владата на РМ со „Окта“ има обврзувачки договор за повеќе од 20 години, кој создава нееднаква конкурентска позиција на фирмите на пазарот - вели Златев.„Лукоил“ во Македонија има девет бензински пумпи и држи 4,5 отсто од пазарот. До крајот на годината инвестициите во земјава ќе достигнат 12,2 милиони долари. Тоа е најниска сума на инвестиции во споредба со сите балкански земји во кои е присутен рускиот нафтен гигант. Вкупните инвестиции во земјите од Балканскиот Полуостров се 566 милиони долари. „Лукоил“ во Бугарија има инвестирано 403 милиони долари, во Хрватска 69 милиони долари, во Црна Гора 54, а во српски „Беопетрол“ - 27 милиони долари.

Според Златев, поради светската економска криза, вкупната сума идни инвестиции на „Лукоил“ е ставена под знак прашање. Сепак, првичниот план предвидува до 2009 година во Македонија да работат 15 бензински пумпи со кои ќе освојат 10 отсто од пазарот на продажба на горива.