Скопски сообраќај (општо)

Што повеќе клучки и кружни текови се изградат во Скопје, толку подобро ќе биде регулирањето на сообраќајот, сметаат експертите. Според нив, на овој начин би се избегнале семафорите и би се овозможил поголем протек на возилата, со помали застои.

Јован Христовски, раководител на градскиот сектор за сообраќај, објаснува дека тие се подобра опција, но треба да се исполнат некои критериуми, затоа што не може на секоја крстосница да се изгради клучка или кружен тек.

- Најважна е широчината на раскрсниците, како и бројот на возила што доаѓаат од сите насоки. Пред да се почне таков проект треба да се направат детални анализи дали тоа ќе придонесе за намалување на метежот и пред се на застоите. Ако има голем прилив на возила од повеќе страни тогаш овој модел е поприфатлив - смета Христовски.

Во предвид се земаат и регулирањето на предноста на минување, како и цените за изградба на овие модели. Естетиката е важен фактор пред се за кружните текови и многу луѓе сметаат дека тие имаат многу поатрактивен изглед од обичните крстосници. Овој модел се применува и на места каде што има потреба од забавување на сообраќајот, а мора да се најде решение и за движењето на пешаците. Бидејќи асфалтните површини на кружните текови обично се поголеми, треба да се пресмета и можноста за што подобро одведување на атмосферските води.

МНОГУ ИДЕИ И ПРОЕКТИ ЧЕКААТ НА РЕД

Од градската управа велат дека имаат седум проекти за замена на семафорите со кружни текови кои треба да се реализираат. Прва на ред ќе биде крстосницата меѓу улиците Митрополит Теодосиј Гологанов и Мито Хаџивасилев Јасмин кај Католичката црква, која возачите ја сметаат за една од најопасните во градот. Слични сообраќајни решенија се планирани и улицата 16-та македонска бригада во населбата Железара, на булеварот Босна и Херцеговина, на Втора македонска бригада, како и на улицата 588 кај Бригадата за противпожарна заштита.

Освен градските власти, и скопските општини имаат голем број идеи, предлози, но и конкретни проекти за кружни текови или надвозници на своите улици за да го намалат сообраќајниот метеж. Од Карпош велат дека планирале да направат кружен тек на раскрсницата меѓу улиците Никола Тесла и Орце Николов, но се откажале бидејќи коловозите имале исти димензии, па изградбата не била изводлива. Тие сметаат дека тој модел повеќе би одговарал на крстосницата меѓу Париска и Варшавска.

Гази Баба веќе доставила предлози до градот за измена на неколку сообраќајни решенија, односно за изградба на кружни текови на раскрсницата меѓу 16-та македонска бригада и Коце Металец во Автокоманда и кај последната станица на автобусот со број 45 во населбата Ченто.

Момо Николовски, портпаролот на Ѓорче Петров, смета дека кружните текови се подобро решение од обичните раскрсници, но надвозниците се уште поефикасни.

- Улиците во нашата општина се маалски и тесни, па се сомневам во можноста на нив да се направат кружни текови. Се надевам дека метежот ќе се намали кога обиколницата ќе се пушти во употреба. Најгуст сообраќај има на крстосницата меѓу улиците 4 Јули, Лука Геров и Македонска војска. Тука би требало да се направи надвозник или барем кружен тек - вели Николовски.

Општината Кисела Вода, пак, се обидела да направи кружен тек кај пазарчето во населбата Драчево. Тие во соработка со полицијата поставиле соодветни сообраќајни знаци, но жителите не ги почитувале новите правила и метежот уште повеќе се зголемил.

„КОНТИНЕНТАЛ“ ЗАВРШИ, СЛЕДУВА ДЕТЕЛИНКАТА

Клучката кај хотелот „Континентал“ е веќе пуштена во употреба и со неа се овозможува директно поврзување на влезот во Скопје кај населбата Автокоманда со центарот, автобуската и железничката станица, судовите, Универзитетот „Свети Кирил и Методиј“, сајмиштето и други значајни објекти. За оваа намена досега се користеа фреквентниот булевар Крсте Петков Мисирков кај Бит-пазар или претесната уличка 537 во населбата Керамидница, која се протега покрај пругата од противпожарната бригада до службениот влез на сајмиштето.

Почна да се гради и детелинката кај Битпазар, со која ќе се заокружи бессемафорското регулирање на сообраќајот во овој дел од градот. Наместо да чекаат на семафорите да завртат лево, возачите ќе треба само да поминат преку или под надвозникот и двапати да завртат десно за да се упатат во саканата насока.

Општинарите од Чаир со најголемо нетрпение ја очекуваат изградбата на овој објект, бидејќи сметаат дека на тоа место се создава најголемиот сообраќаен хаос на нивното подрачје. Тие планираат и кружни текови за дополнително да го намалат метежот.

- Имаме план да направиме кружен тек на раскрсницата кај што се гради Американската амбасада. Но сметаме дека и со надвозници можеме да го решиме застојот на сообраќајот во Чаир - истакна Авни Калаба, портпарол во општината Чаир.

Триумфалната порта - најстар кружен тек во светот

Околу познатата Триумфална порта во Париз се наоѓа најстариот кружен тек во светот, изграден уште во 1901 година. Таа е и една од најголемите раскрсници, каде што се вкрстуваат вкупно 12 улици. Втор бил кругот Колумбус во Њујорк, направен четири години подоцна. Еден од најатрактивните е и тој во австралискиот главен град Канбера, каде што огромен сообраќај кружи околу зградата на парламентот.

Овој модел за регулирање на сообраќајот не бил многу популарен во минатото, бидејќи се дозволувало возење во двете насоки и судирите биле чести. Но, по 1960-те години, кога почнал да се применува еднонасочен сообраќај на кружните текови, нивната изградба зела замав. Во американскиот град Сиетл биле направени дури сто кружни текови во изминатите две децении, а стотици мини кружни раскрсници имало и во предградијата околу оваа метропола.