Македонски народен театар (Стар театар)

Роза Петкова

За новиот објект на поранешниот Народен театар, лоциран на левиот брег на Вардар, веднаш до Камениот мост, неодамна е избран најповолен понудувач кој ќе ја набави сценската технологија.
Од Министерството за култура информираат дека изградбата тече како што е предвидено, а до крајот на месецов треба да се заврши карабината на објектот. Во тек е работата на бетонската конструкција, а паралелно со тоа се подготвуваат и другите фази. Веќе е избрана фирма што ќе ги изработи хидротехничките инсталации, а се бара изведувач на електротехничките инсталации и се подготвува документација за распишување јавен повик за машинство и за ентериерно уредување.
Од Министерството велат дека сите избрани изведувачи на фазите постапно ќе бидат воведени во работата.
- Изградбата на Стариот театар е во полн ек. Се работи интензивно на сите фази од проектот. Веруваме дека овој објект ќе го разбранува носталгичниот гламур на македонската метропола – објаснува Анита Јованоска, портпаролка на Министерството.
Според проектот, градбата на стариот театар треба да претставува една целина, која ќе ги задоволува современите тенденции и ќе го зачува ликот на некогашниот објект, кој е врежан во меморијата на старите скопјани. Однадвор театарот ќе го задржи својот автентичен изглед на стара барокна архитектура, а внатре ќе нуди услови според современите стандарди.
Од Министерството велат дека токму поради специфичната архитектура, декорацијата, како и современата сценската технологија, работите ќе се одвиваат во повеќе фази.
Истовремено до стариот театар тече и изградбата на музејот „Македонска борба“, кој, според најавите на премиерот Груевски, треба да биде готов налето. Објектот интензивно се гради на површина од 2.500 квадратни метри, а пред извесен период се објави повик за собирање експонати од револуционерниот период. Надлежните велат дека и на овој објект се работи на бетонската конструкција, а во тек се подготовките за преостанатите фази, како и изработката на восочните фигури кои ќе бидат поставени.
Од Министерството објаснуваат дека на оваа градба се работи постапно поради нејзината сложеност со оглед на тоа дека во неа треба да се сместат повеќе содржини, а треба да се обезбедат и посебни услови за чување на фигурите.
Комплексот во кој ќе бидат сместени музејот на ВМРО и музејот на жртвите од комунизмот е замислен како пантеон на македонската револуционерна борба и израз на нашиот национален идентитет, на традициите и борбата за самостојна држава. Покрај историските поставки, во музејот на ВМРО ќе има 40 восочни фигури на историски личности и сцени од различни периоди од развојот на државава, со фигури од истиот материјал.