Жардињери

Еден од најзабележителните проекти во изминатите три години, со кој значително се измени ликот на булеварите во градот Скопје е проектот за изградба на бетонски жардиниери.

Со реализацијата на жардиниерите на булеварите Партизански одреди и Јане Сандански, Град Скопје унифицирано ги уреди средишните делови на сите булеварски решенија /освен булеварот Свети Климент Охридски, кој треба во средишниот дел да се проширува/.

Заедно со последните два булевари, Скопје на 7 булевари, доби 30 километри, хортикултурно уредени средишни жардиниери, кои го чинеа Град Скопје 90 милиони денари.

- Должината на жардиниерите кои ги започнуваме денеска, на булеварот Партизански одреди и на булеварот Јане Сандански изнесува 11 километри во двете насоки. Очекуваме тие да бидат комплетно уредени до мај. Ефектот од жардиниерите е најголем, тие го разубавуваат просторот, зеленилото во нив овозможува филтрирање на воздухот, а бетонските конструкции спречуваат улицата да се преминува на недозволени места. За ефективно наводнување и одржување на зеленилото во жардиниерите ќе се постави систем за наводнување „капка по капка“. Во жардиниерата на булеварот Јане Сандански би сакале да воведеме медитерански видови дрвца кои добро успеваат и на овие простори – рече градоначалникот Трифун Костовски при денешната посета на жардиниерите на булеварот 8-ми Септември и на Јане Сандански.

Новиот лик на булеварските средишта е препознатлив од влезот во Скопје, низ централните градски артерии, на левата и на десната страна на Вардар.

ЈП „Паркови и зеленило“ доби задача која успешно ја спроведува, за хортикултурно уредување на жардиниерите. Договорено е сите жардиниери да се уредат со разновидно зеленило, како оние што се градат, така и оние што денеска ги започнуваме.

Град Скопје, покрај изградбата ги финансираше и проектите за жардиниерите, како и хортикултурното уредување.

Средишните жардиниери, комплетирањето на велосипедско-ролерската патека по должината на десниот брег на Вардар; целосната реконструкција на влезната партија во Градскиот парк со платото пред споменикот на Гоце Делчев; обележувањето на велосипедските патеки во градот; неколкуте видиковци на Водно, Гази Баба и во Градскиот парк и проектот за реконструкција на мостовите и зеленилото во Градскиот парк, претставуваат сериозни зафати за подобрување на стандардите на урбаното живеење на скопјани.