GPS покриеност на MK

АГЕНЦИЈА ЗА КАТАСТАР НА НЕДВИЖНОСТИ

GPS станици за глобално позиционирање

Вкупно 14 активни GPS станици поставени на растојание од 50 до 70 километри, ќе го сочинуваат системот за глобално позиционирање - МАКПОС кој ќе овозможи на брз и сигурен начин да се дојде до геопросторни податоци на било која позиција на територијата на земјава. Со помош на МАКПОС системот и користење на услугите на глобалните сателити ќе може да се дојде до точни податоци што се во границите од еден сантиметар до половина метар, во зависност од потребите на корисниците. Внимателно следејќи ја презентација на системот од страна на одговорни од Агенцијата за катастар на недвижности (АКН), министерот за транспорт и врски, Миле Јанакиески рече дека со неговото пуштање во комерцијална употреба до крајот на 2009 година, придобивките ќе ги почуствуваат корисници од областа на геодезијата, инженерството, сообраќајот, рударството, шумарството, земјоделието, екологијата и слично.

- Владата постојано иницира и поддржува нови проекти што ги следат светските трендови во однос на примената на современи технологии што се употребуваат во транспортот, телекомуникациите и градежништвото. Тие и овозможуваат на Македонија да стане посакувано место за инвестиции и основање бизнис - потенцира Јанакиески.

Според директорот на АКН, Љупчо Георгиевски засега има поставено само пет активни GPS станици во Скопје, Велес, Прилеп, Кичево и Тетово и со нив е покриена 45 проценти од територијата на земјава. До крајот на оваа година треба да се постават уште две вакви станици во Охрид и Битола, со што покриеноста ќе достигне 65 проценти. До почетокот на 2010 година, заинтересираните корисници ќе можат бесплатно да ги користат податоците на овој систем.