Скопска обиколница [A2/A4]

Делницата од Хиподром до Оризари ќе биде предадена во употреба в понеделник

Билјана Ангеловска

Заврши изградбата на обиколницата на Скопје од Хиподром до Оризари и в понеделник ќе биде предадена во употреба. Конечно, по цели седум години изградба, завршена е една од најзначајните сообраќајни инвестиции во државава. Според состојбата на терен, комплетно се завршени градежните работи, до крајот на неделава ќе се комплетира и последната активност околу еден насип, трасата е обележена, се поставуваат страничните табли и во наредниве денови ќе треба да се вклучи струјата. Потоа, ќе може да следува и свеченото сечење лента.

Иако министерот за транспорт и врски, Миле Јанакиески, најавуваше дека обиколницата ќе биде завршена до април, како што се покажа, на градежниците им требаше повеќе време да го комплетираат проектот, пред се', поради незавршената обврска на Агенцијата за државни патишта (поранешниот Фонд за патишта), која не успеа навреме да се договори со МЕПСО да ги исклучи од напон далноводите за да можат да се дислоцираат. Но, откако зимоска Јанакиески го посети градилиштето, работата тргна од мртва точка, па проблемите беа надминати, а на оперативата и' се отвори фронт да може да работи.

Сега се' е завршено, останува уште да се вклучи струјата и објектот да биде предаден во употреба. Иако обиколницата официјално не е пуштена, по трасата веќе се одвива интензивен сообраќај. Со оглед на тоа дека сообраќајницата е завршена и обележена, по неа секојдневно можат да се забележат камиони, кои користејќи ги изградените клучки, лесно се приклучуваат на новиот автопат.

Маратонската изградба на првата фаза од скопската обиколница стартуваше во август 2002 година. Оваа делница од Хиподром до Оризари, во вкупна должина од 14,7 километри, ја градеше скопски „Гранит“, додека втората делница од Оризари до Сарај, со должина од 11,8 километри, ја изгради „Терна“ од Грција. Како што е познато, за разлика од „Гранит“, грчката фирма немаше проблеми со трасата, доби релативно „чисто“ земјиште неоптоварено со имотноправни проблеми и брзо ја заврши својата работа. „Гранит“ мораше цели седум години да „се бори“ со несериозниот однос на одговорните во поранешниот Фонд за патишта. Одамна стана јасно дека релативизирањето на проблемите не води кон нивно решавање, бидејќи беше очигледно дека Фондот тешко се справува со експропријацијата на земјиштето. Една година откако беше предаден во употреба вториот дел од обиколницата, правата делница конечно е завршена. Со тоа се комплетирани вкупно 26,7 километри од северната обиколница на Скопје, од Хиподром до Сарај.

Обиколницата е автопат со вкупна широчина од над 22 метра, со девет приклучоци кон градот, три големи објекти - вијадукти и многу натпатници што ќе им го олеснат движењето на жителите од бројните скопски села. Клучките преку кои ќе биде овозможен влез и излез од Скопје се кај Хиподром, Стајковци, Ченто, Бутел, Оризари, Стенковец, Орман, Стопански Двор и Сарај. Обиколниот пат на Скопје е дел од Коридорот 8 и има посебна важност за Македонија, бидејќи ја поврзува со Бугарија и со Албанија.