Телеком арена (арена Филип II Македонски)

„Филип Втори“ куртули од лавови и споменици

Владата имала желба стадионот со античките скулптури да заличи на арена

Деспина Трајковска

Градскиот стадион, кој до пролетта 2011 година треба да добие нов изглед, куртули од лавови, штитови и дваесетметарски споменици. Изградба на вакви и други антички скулптури на објектот чија реконструкција е во тек, посакувала Владата, со цел стадионот кој неодамна го преименуваше во „Филип Втори“ да заличи на арена и да асоцира на времето на македонскиот војсководец. Идејата се родила во времето на проектирањето, кога биле и исцртани лавови, штитови, копја и споменици од кои некои достигнале висина дури до дваесет метри.

Од „Македонија проект“ каде што се работел проектот за реконструирање на спортскиот објект, потврдуваат дека било планирано во делови од стадионот, во поттрибинскиот простор, на фасадата и на други сегменти да се исцртаат или, пак, изградат антички симболи. Сепак, идејата што ја иницирал инвеститорот на објектот, во случајов Владата, а која делумно била поддржана и од проектантите, не се реализирала во конечниот проект.

Андреја Андреев, извршен директор во „Македонија проект“, тврди дека ниту во идејното решение ниту во главниот проект за реконструкција на објектот нема антички скулптури, ниту, пак, какви било други обележја од времето на Филип Втори.

„Точно е дека постоеше идеја за вцртување такви делови, меѓутоа по убедување на архитектите и останатиот стручен тим, лавовите, штитовите и другите обележја не се проектираа. Истовремено, во тој период се откажавме и од идејата стадионот да биде од затворен тип“, вели Андреев, горд што „Македонија проект“ е автор на проектот за спортскиот објект на кој тимот автори работел половина година.

Според Андреев, стадионот ќе биде најубав во регионов, специфичен и во поглед на конструкцијата и според функционалноста, а при изградбата во најголем дел ќе се користат специфични најсовремени материјали и врвна технологија.

Моментално се приведува кон крај изградбата на северната трибина која беше во план да биде готова за еден месец. Роковите за изведба, според надлежните од Јавното станбено претпријатие, не се пробиени ако се има предвид дека повеќе од еден месец временските услови за работа беа несоодветни. Од ЈПССДП уверуваат дека северната трибина ќе биде функционална до 12 август, за кога е закажан пријателскиот фудбалски натпревар меѓу македонската репрезентација и селекцијата на Шпанија. Идната недела, пак, треба да се одбере најповолната понуда на изведувач за источната и западната трибина.

Според проектот, целосната реконструкција на стадионот „Филип Втори“ треба да заврши пролетта 2011 година. Објектот ќе има илуминација слична на минхенската арена „Алијанс“, капацитет од 33.000 гледачи, нова атлетска патека и повеќе од 22.000 квадратни метри поттрибински простор каде што ќе бидат сместени разни содржини. На источната и на западната трибина на три нивоа ќе бидат распоредени по 5.996 седишта, на три нивоа на јужната трибина се предвидени 11.477 седишта, а по изградбата на северната трибина таа ќе има капацитет од 10.030 седишта, од кои 474 ВИП-места распоредени на пет нивоа. Стадионот ќе располага и со поттрибински простор од 22.148 квадратни метри кои ќе се издаваат како деловни објекти. Во нив е предвидено да има спа-центар, сала за фитнес, игротека, мултимедијален салон, сала за танци, продавница за сувенири, сместувачки капацитети...

Од ЈПССДП велат дека не можат да ја кажат целосната вредност на проектот, бидејќи таа допрва ќе се дефинира по изборот на понудата за реконструкција на источната и западната трибина. Изградба, пак, на северната трибина, која му е доверена на АД „Бетон“, чини околу 14,5 милиони денари.