Маџир Маало

Роза Петкова

Деталните урбанистички планови за Маџир маало и на Крњево се уште не се завршени, иако општина Центар во декември најави дека ги очекува нацрт-верзиите, а потоа требаше да следи процедурата за нивно донесување. Во Општината сега немаат одговор каде заглавиле плановите, ниту, пак, потврдуваат дали го чекаат новиот Генерален план за градот, кој е во изработка и според предвидувањата треба да биде готов дури до крајот на идната година. - Деталните урбанистички планови се уште не се подготвени за презентација. Тие и натаму се во фаза на изработка на нацрт-планот - рече портпаролот Јовица Ацковски. За двете градски јадра, кои спаѓаат меѓу најстарите во Скопје, неколкупати неуспешно се прават обиди да се урбанизираат и да се реши прашањето дали ќе се спојат со сегашниот изглед на градот или ќе се задржат како културно наследство. Градоначалникот Владимир Тодоровиќ неодамна изјави дека предвидено е Маџир маало да остане старо маало, во кое нема да има високи градби, туку, само до два ката и приземје, но дали и натаму остануваат овие најави во Општината не кажаа. Освен урбанистичките планови, нереализирани останаа и проектите за покривање на отворениот канал кај основното училиште „Кочо Рацин“ и уредувањето на кејот „13 Ноември“, во делот кај „Дрводекор“. Во каналот требаше да се постави атмосферска канализација и да се затвори, а слободниот простор да се направи паркинг. Според портпаролот, Општината за оваа година го вклучила каналот во програмата за работа, а во моментот се работи главен проект. - По комплетирањето на проектот ќе се преземат активности заедно со Град Скопје за негова реализација. Во програмата за урбано планирање, во делот за уредување на градежно земјиште, предвидено е и комплетно партерно уредување на кејот „13 Ноември“ - вели Ацковски и додава дека при уредувањето ќе се постават кошници за отпадоци, клупи и ќе се направат нови патеки со бекатон-плочи. И монтажниот паркинг во Капиштец, кој градоначалникот Тодоровиќ го најавуваше како еден од поважните проекти, никако да почне да се гради. Тендерот за избор на фирма, која ќе монтира паркиралиште на еден кат, по целата должина на улицата Народен Фронт, пропадна, поради тоа што пристигнатите понуди биле скапи. - Тендерот е поништен, а планирано е во најскоро време да се распише нов - вели Ацковски. Паркингот, како што најавуваат општинарите, треба да биде решение за проблемот со паркирање, што го имаат жителите од оваа населба, но и сите кои гравитираат во населбата, а преморени се да се паркираат на тротоарите или на коловозот на Народен фронт.


Се опипа пулсот на граѓаните


Анкетата, која градоначалникот Тодоровиќ ја нарача за да го измери мислењето на граѓаните за неговата работа, покажа дека 38,9 проценти од нив се задоволни со сработеното во општина Центар, а незадоволни се 28,9 проценти. Сепак, најголем дел од анкетираните се изјасниле дека приоритети на градоначалникот треба да бидат урбанистичкото планирање и инфраструктурата.
Опозицијата во Советот го обвини Тодоровиќ дека нарачал анкета за сопствениот рејтинг, која ја чинела општинската каса 4.000 евра.